Madhya Pradesh Crime : मध्य प्रदेशात (Madhya Pradesh) घडलेल्या घटनेनं संपूर्ण देश हादरला आहे. ज्या भावाच्या हातावर राखी बांधून बहीण त्याच्याकडून तिचं आयुष्यभर रक्षण करण्याचं वचन घेते, त्याच नराधम भावानं आपल्या सख्या 9 वर्षांच्या बहिणीला वासनेचं शिकार बनवल्याचं प्रकरण समोर आलं आहे. हा नराधम एवढ्यावरच थांबला नाही, तर घडला प्रकरा उघडकीस येऊ नये म्हणून यानं स्वतःच्या सख्या बहिणीचा गळा आवळून जीव घेतला आहे. ही धक्कादायक घटना उघड झाल्यानंतर संपूर्ण देश हादरला आहे. काळीज पिळवटणारी बाब म्हणजे, आरोपी भाऊ अल्पवयीन असून त्याचा गुन्हा लपवण्यासाठी आईनं पुरावेदेखील नष्ट केल्याचं उघड झालं आहे.
मध्य प्रदेशातील धक्कादायक घटनेनं संपूर्ण देश हादरला. एका अल्पवयीन मुलानं आधी स्वतःच्या 9 वर्षांच्या बहिणीवर बलात्कार केला. त्यानंतर त्यानं तिची गळा आवळून हत्या केली. या घटनेपूर्वी आरोपीनं मोबाईलवर अश्लिल व्हिडीओ पाहिल्याचंही समोर आलं आहे. त्यानंतर हे संपूर्ण प्रकरण दडपण्यासाठी आणि आरोपीच्या बचावासाठी आई आणि इतर बहिणीनं अनेक पुरावे नष्ट केल्याचंही पोलीस तपासात समोर आलं आहे.
पोलिसांनी दिलेल्या माहितीनुसार, ही भीषण घटना 24 एप्रिल रोजी घडली. तब्बल 3 महिन्यांच्या कसून चौकशीनंतर पोलिसांनी हा प्रकार उघडकीस आणला. याप्रकरणात 50 जणांची चौकशी करण्यात आली आहे. तसेच, आरोपींची सखोल चौकशी सुरू आहे. तसेच, तांत्रिक पुराव्याच्या आधारे या प्रकरणात आणखी काही गोष्टींची उकल होऊ शकते, असंदेखील पोलिसांनी सांगितलं आहे. पीडितेचा 13 वर्षांचा भाऊ, तिची आई आणि दोन 17-18 वर्षांच्या बहिणींना याप्रकरणी पोलिसांनी ताब्यात घेतलं आहे. पोलिसांकडून याप्रकरणी चौघांची चौकशी सुरू आहे.
घराच्या अंगणात सापडला मुलीचा मृतदेह
पोलीस अधीक्षक विवेक सिंह यांनी दिलेल्या माहितीनुसार, 24 एप्रिल रोजी जिल्ह्यातील जावा पोलीस स्टेशन परिसरात 9 वर्षीय मुलीवर बलात्कार झाला, त्यानंतर तिची गळा आवळून हत्या करण्यात आली. या प्रकरणी मृत तरुणीच्या कुटुंबीयांच्या तक्रारीवरून पोलिसांनी गुन्हा दाखल करून तपास सुरू केला आहे. पीडितेचा मृतदेह तिच्या घराच्या अंगणातून सापडला, जिथे ती घटनेच्या वेळी झोपली होती. कुटुंबीयांची कसून चौकशी केल्यानंतर पीडितेचा 13 वर्षीय भाऊ रात्री तिच्या शेजारीच झोपल्याचं उघड झालं.
अश्लिल व्हिडीओ पाहून सख्या बहिणीवर अत्याचार
पोलिसांनी दिलेल्या माहितीनुसार, अल्पवयीन मुलानं मोबाईल फोनवर अश्लिल व्हिडीओ पाहिल्यानंतर आपल्या बहिणीवर बलात्कार केला. ज्यावेळी पीडितेनं आपल्या वडिलांना ही घटना सांगणार असल्याचं आरोपीला सांगितलं, त्यावेळी घाबरून आरोपीनं बहिणीचा गळा आवळून तिचा जीव घेतला. त्यानंतर आपल्या आईला उठवून सर्व घटना सांगितली. तेव्हाही पीडित मुलगी जीवंत होती. पण, बहिण अजूनही जिवंत आहे, हे समजल्यावर आरोपी भावानं पुन्हा तिचा गळा घोटला आणि तिचा जीव घेतला. धक्कादायक गोष्ट म्हणजे, हे सर्व आईच्या डोळ्यांसमोर होत होतं.
पोलिसांना गुंगारा देण्यासाठी पुरावे नष्ट केले
आरोपीची आई आणि दोन बहिणींना संपूर्ण प्रकार समजला. त्यावेळी लोकांना आणि पोलिसांना गुंगारा देण्यासाठी सर्वात आधी अंथरुणं बदलली. त्यानंतर ज्यावेळी पोलीस घटनास्थळी दाखल झाले, त्यावेळी त्यांनी सांगितलं की, विषारी किडा चावल्यामुळे मुलीचा मृत्यू झाला आहे. त्यानंतर पोलिसांनी मुलीचा मृतदेह ताब्यात घेऊन पोस्टमॉर्टमसाठी पाठवला. त्यानंतर मुलीवर बलात्कार झाला आणि त्यानंतर तिची हत्या झाल्याचं रिपोर्टमधून समोर आलं. आता या प्रकरणाच्या चौकशीसाठी एक एसआयटी गठीत करण्यात आली आहे.