ठाणे : वाहनमालकांना जास्त भाड्याचे आमिष दाखवून तब्बल कोट्यवधींची फसवणूक करणाऱ्या रॅकेटचा अखेर पर्दाफाश झाला आहे. ठाणे गुन्हे शाखा घटक-5 ने केलेल्या धाडसी कारवाईत 32 चारचाकी वाहने जप्त करण्यात आली आहेत. या प्रकरणी उलवे, नवी मुंबई येथील 38 वर्षीय संदीप रघु शेट्टी याला अटक करण्यात आली आहे.
नवी मुंबई, लोणावळा, पुणे (आळेफाटा), कल्याण आणि पनवेल अशा विविध भागांतून जप्त करण्यात आलेल्या वाहनांची एकूण किंमत सुमारे 2 कोटी 44 लाख 15 हजार इतकी असल्याचे समोर आले आहे. या कारवाईमुळे वाहनमालकांमध्ये मोठी खळबळ उडाली आहे.
जास्त भाड्याचे आमिष, आणि वाहन थेट गहाण (Vehicle Rental Fraud Racket)
पोलीस तपासात धक्कादायक बाब समोर आली आहे. आरोपी संदीप शेट्टी हा वाहनमालकांना जास्त मासिक भाडे देण्याचे आमिष दाखवत असे. विश्वास संपादन केल्यानंतर तो वाहने आपल्या ताब्यात घेत असे आणि नंतर तीच वाहने इतरांकडे गहाण ठेवत असल्याचे उघड झाले आहे. या पद्धतीने अनेक वाहनमालकांची आर्थिक फसवणूक करण्यात आली. काही मालकांना आपली वाहने नेमकी कुठे आहेत याचाही पत्ता नव्हता.
तांत्रिक विश्लेषणातून गुन्ह्याचा छडा ( Police Technical Investigation)
ही संपूर्ण कारवाई तांत्रिक विश्लेषण (Technical Analysis) आणि गुप्त माहितीच्या आधारे करण्यात आली. पोलिसांनी विविध ठिकाणी समन्वय साधत वाहनांचा माग काढला आणि अखेर मोठ्या प्रमाणावर जप्ती केली.
या प्रकरणाबाबत ठाणे गुन्हे शाखेचे पोलीस उपायुक्त अमरसिंह जाधव यांनी सांगितले की, “नागरिकांनी वाहन भाड्याने देताना योग्य कागदपत्रे, लेखी करार आणि पूर्ण पडताळणी करणे अत्यावश्यक आहे. केवळ जास्त भाड्याच्या आमिषाला बळी पडू नये.”
नागरिकांना पोलिसांचे आवाहन (Police Advisory)
पोलिसांनी आवाहन केलं आहे की, वाहन भाड्याने देताना –
अधिकृत करार (Agreement) करणे
ओळखपत्र आणि पत्त्याची खातरजमा करणे
व्यवहाराची लेखी नोंद ठेवणे
असे आवश्यक उपाय करावेत. अन्यथा अशा रॅकेटला बळी पडण्याची शक्यता नाकारता येत नाही.
सध्या या प्रकरणाचा पुढील तपास सुरू असून आणखी काही धागेदोरे हाती लागण्याची शक्यता पोलिसांनी व्यक्त केली आहे. तसेच या आरोपीला अजून कुणी मदत केली का? याच्यामागे अजून कुणाचा हात आहे का? याचा तपासही पोलीस करत आहेत.
ही बातमी वाचा: