पुणे : पुण्यातील लोहगाव परिसरातून मानवतेला काळिमा फासणारी आणि अत्यंत संतापजनक घटना समोर आली आहे. कौटुंबिक वादाचा राग मनात धरून एका महिलेने अवघ्या 9 महिन्यांच्या निष्पाप बाळाच्या तोंडात फेविक्विक ओतल्याचा अमानुष प्रकार घडला आहे. याप्रकरणी लोहगाव पोलीस ठाण्यात एका महिलेसह एकूण तिघांविरोधात विविध कलमांन्वये गुन्हा दाखल करण्यात आला असून, जखमी बाळावर रुग्णालयात उपचार सुरू आहेत.
ही भयानक घटना 31 जुलै रोजी पुण्यातील लोहगाव परिसरातील कलवड वस्ती भागात घडली असून, याप्रकरणी अल्ताफ नबी शेख यांनी पोलिसांत फिर्याद दिली आहे.
Pune Baby Fevikwik : कौटुंबिक वादातून चिमुकल्यासोबत क्रूरता
पोलिसांनी दिलेल्या माहितीनुसार, फिर्यादी अल्ताफ शेख यांची पत्नी जैनाब आणि तिची भावजय आरोपी सानिया शेख यांच्यात काही कौटुंबिक कारणांवरून सतत वाद सुरू होते. हाच वादाचा राग मनात धरून आरोपी सानिया शेख हिने घरात शांत झोपलेल्या अवघ्या 9 महिन्यांच्या निष्पाप बाळाच्या तोंडात फेविक्विक ओतल्याचा गंभीर आरोप करण्यात आला आहे.
Pune Crime News : तक्रार केल्यास जीवे मारण्याची दिली धमकी
या धक्कादायक घटनेनंतर आरोपी सानिया हिने या प्रकाराबाबत कोणालाही माहिती दिली किंवा पोलिसांत फिर्याद दिली तर जीवे मारण्याची थेट धमकी दिली. तसेच, इतर दोन आरोपींनीदेखील फिर्यादी अल्ताफ शेख यांना सानियाविरोधात पोलीस तक्रार केल्यास त्याचे गंभीर परिणाम भोगावे लागतील, असा धाक दाखवल्याचा आरोप फिर्यादीत करण्यात आला आहे.
Baby Hospitalized : बाळावर रुग्णालयात उपचार सुरू; प्रकृती स्थिर
घटनेचे गांभीर्य ओळखून तातडीने बाळाच्या आईने त्याला जवळच्या रुग्णालयात दाखल केले. सुदैवाने डॉक्टरांच्या वेळेवर उपचारांमुळे बाळाचा जीव वाचला असून सध्या त्याच्यावर रुग्णालयात वैद्यकीय उपचार सुरू आहेत. बाळाची प्रकृती सध्या स्थिर असल्याची माहिती पोलिसांनी दिली आहे.
Police Action : लोहगाव पोलिसांकडून तिघांवर गुन्हा दाखल
बाळाच्या वडिलांच्या फिर्यादीवरून लोहगाव पोलिसांनी मुख्य आरोपी सानिया शेख हिच्यासह इतर दोन जणांवर गुन्हा दाखल केला आहे. या प्रकरणातील आरोपींचा शोध घेऊन पुढील कायदेशीर कारवाई लोहगाव पोलीस करत आहेत.
ही बातमी वाचा: