कोल्हापूर: इतिहास अभ्यासक इंद्रजीत सावंत यांना धमकी देणारा आणि छत्रपती शिवाजी महाराज यांच्याबद्दल आक्षेपार्ह वक्तव्य करणाऱ्या प्रशांत कोरटकर (Prashant Koratkar) याने पोलीस कोठडीतील चौकशीदरम्यान आपल्या कृत्याची कबुली दिली आहे. इंद्रजीत सावंत यांना धमकीचा फोन मीच केला होता, असे त्याने पोलिसांना सांगितल्याची माहिती सूत्रांनी दिली आहे. प्रशांत कोरटकर हा तब्बल महिनाभर फरार होता. या काळात त्याने एक व्हिडीओ शेअर करुन आपण इंद्रजीत सावंत (Indrajit Sawant) यांना धमकी दिल्याचे आणि छत्रपती शिवाजी महाराज आणि संभाजी महाराज यांच्याविषयी आक्षेपार्ह बोलल्याचा आरोप फेटाळला होता. मात्र, आता त्याने इंद्रजीत सावंत यांना फोन केल्याची कबुली दिल्याने छत्रपती शिवाजी महाराजांविषयी अपमानकारक टिप्पणी केल्याचाही आरोप खरा ठरण्याची शक्यता आहे.
सूत्रांच्या माहितीनुसार, कोल्हापूर पोलिसांनी मध्यरात्रीनंतर पा तास केलेल्या चौकशीवेळी प्रशांत कोरटकरने महत्त्वाच्या आरोपांची कबुली दिली. तसेच मोबाईलमधील डेटाही स्वत:च डिलिट केल्याचे प्रशांत कोरटकर याने मान्य केले. अटक टाळण्यासाठी आपण हैदराबादमार्गे चेन्नईला जाण्याच्या तयारीत होतो, असेही कोरटकर याने पोलिसांना सांगितले. कोल्हापूर जिल्हा न्यायालयाने प्रशांत कोरटकर याला तीन दिवसांची पोलीस कोठडी सुनावली होती. शुक्रवारी कोरटकरच्या कोठडीची मुदत संपत आहे. त्यामुळे पोलिसांकडून आज पुन्हा एकदा त्याची चौकशी केली जाईल. त्यानंतर उद्या त्याला कोर्टात हजर केले जाईल. तोपर्यंत पोलिसांच्या हाती आणखी कोणकोणती माहिती लागणार, याकडे सर्वांच्या नजरा लागल्या आहेत.
दरम्यान, फॉरेन्सिक पथकाने बुधवारी प्रशांत कोरटकर याच्या आवाजाचे नमुने घेतले. जवळपास तीन-चार तास ही प्रक्रिया समोर होती. त्याचा अहवाला येत्या चार-पाच दिवसांत येण्याची शक्यता आहे. इंद्रजीत सावंत आणि प्रशांत कोरटकर यांच्यातील संभाषणाचे विश्लेषण फॉरेन्सिक टीमकडून केले जाईल. त्यासाठी इंद्रजीत सावंत यांच्या आवाजाचेही नमुने पोलिसांकडून घेण्यात आले आहेत.
कोल्हापूर पोलिसांकडून खास करुन रात्रीच्यावेळी प्रशांत कोरटकर याची चौकशी केली जात आहे. प्रशांत कोरटकर कुठे गेला होता, कोणाची मदत घेतली, कुठे किती दिवस राहिला, यादरम्यान कोणीकोणी मदत केली, असे प्रश्न पोलिसांनी प्रशांत कोरटकर याला विचारले. प्रशांत कोरटकर हा तब्बल महिनाभरापासून पोलिसांना गुंगारा देत होता. त्यामुळे त्याला खरोखरच पोलीस दलातील बड्या अधिकाऱ्यांनी मदत केली होती का, हा पैलूही तपासला जात आहे.
आणखी वाचा