Mumbai Crime News : मुंबईतील कुर्ला (Kurla) पश्चिम परिसरातून एक अतिशय धक्कादायक बातमी समोर आली आहे. जिवलग मित्राचा वाढदिवस साजरा करत असताना वाढदिवसाच्या दिवशीच 21 वर्षीय तरुणावर चक्क पेट्रोल टाकून पेटवून दिल्याची घटना घडली आहे. आधी अंडी, दगड आणि त्यानंतर पेट्रोल टाकून बर्थडे बॉयलाच पेटवून देण्याचा एक अत्यंत खळबळजनक प्रकार घडलाय. या घटनेत अब्दुल रहमान नावाचा 21 वर्षीय तरुण गंभीररित्या भाजला असून त्याची प्रकृती चिंताजनक आहे. सध्या त्याच्यावर रुग्णालयात उपचार सुरु आहे. तर याप्रकरणी भारतीय न्याय संहिता कलम 110 आणि 3(5) अंतर्गत विनोबा भावे नगर पोलीस ठाण्यात गुन्ह्याची नोंद झाली असून पाच आरोपींना अटक करण्यात आली आहे. दरम्यान हि खळबळजनक घटना सीसीटीव्ह कॅमेरात कैद झाली असून त्या आधारे आता पोलीस पुढील तपास करत आहे.
Mumbai Crime : वाढदिवसात मस्करीची कुस्करी, पाच मित्रांना बेड्या
मिळालेल्या माहितीनुसार, मुंबईतील विनोबा भावे पोलीस ठाणे परिसरात वाढदिवस साजरा करण्याच्या बहाण्याने 21 वर्षीय विद्यार्थी अबुल रहमान मकसूद आलम खान याला जिवंत जाळण्याचा प्रयत्न झाल्याची धक्कादायक घटना उघडकीस आली आहे. अबुल रहमानचा वाढदिवस 25 नोव्हेंबर रोजी होता. तो 24 नोव्हेंबरला कॉलेजला गेला नव्हता, म्हणून त्याचा मित्र अयाज मलिक याने रात्री 12 वाजता वाढदिवस साजरा करण्यासाठी बोलावले. अबुल रहमान जेव्हा पोहोचला तेव्हा मित्रांनी त्याला केक कापण्यासाठी सांगितले.
Kurla Crime News : पेट्रोलचा वास आला अन् रहमान ओरडला,
दरम्यान, केक कापत असताना त्याच्यावर आधी अंडी आणि मग दगड फेकण्यात आले. त्याने हे का करत आहात असे विचारताच अशरफ मलिक याने हातातील बाटली त्याच्यावर फेकली. त्या वेळी अबुल रहमानला पेट्रोलचा वास आला आणि तो ओरडला, “तुम्ही काय करत आहात?” यानंतर त्याच्यावर ज्वलनशील पदार्थ ओतून आग लावण्यात आली आणि आग लागल्यानंतर पाचही आरोपी मित्र तिथून पळून गेले.
Kurla Crime : थरकाप उडवणारी घटना सीसीटीव्हीमध्ये कैद
ही संपूर्ण घटना सीसीटीव्हीमध्ये कैद झाली आहे. तर गंभीररीत्या भाजलेल्या अबुल रहमानचा रुग्णालयात उपचार सुरू आहेत. या प्रकरणी पोलिसांनी पाचही आरोपींना अटक करून त्यांना 29 नोव्हेंबरपर्यंत पोलीस कोठडी दिली आहे.
Nagpur Crime : प्रेम प्रकरणाच्या वादातून तरुणाची हत्या
दरम्यान, नागपूरच्या गणेश पेठ पोलीस स्टेशनच्या हद्दीत गाडीखाना चौकात काल मध्यरात्री एका तरुणाची हत्या करण्यात आलीय. अमन मेश्राम (25 वर्ष) असे हत्या झालेल्या तरुणाचे नाव आहे. प्राथमिक माहितीनुसार प्रेम प्रकरणाच्या वादातून ही हत्या झाली आहे. काल रात्री साडेअकरा ते बारा वाजताच्या दरम्यान अमन मेश्राम गाडीखाना चौकात असताना काही मारेकऱ्यांनी त्याच्यावर धारदार शस्त्राने हल्ला केला. लोकांनी गंभीर जखमी अवस्थेत अमनला रुग्णालयात नेले. मात्र तोवर त्याचा मृत्यू झाला होता. आरोपी घटनास्थळीच त्यांची दुचाकी सोडून पळून गेले होते. रात्री उशिरा याप्रकरणी पोलिसांनी एका आरोपीला ताब्यात घेतले असून त्याची चौकशी सुरू आहे.
इतर महत्वाच्या बातम्या