कोल्हापूर : राजस्थानमधील जेलमधून पळून गेलेल्या आणि गेले काही वर्षे फरार झालेला कुख्यात गुंड पपला गुर्जर याला कोल्हापुरात अटक करण्यात आली आहे. राजस्थान पोलीसांनी कोल्हापुरातील सरनोबतवाडी नजीकच्या उजळाईवाडी कॉलनीत मोठ्या शिताफीने अटकेची कारवाई केली आहे.
संबंधित गुंड कोल्हापुरात दोन वर्षे वास्तव्यास होता अशी माहिती समोर आली असून राजस्थान पोलिसांनी त्याला रात्री अटक केली. राजस्थानमधील कुख्यात गुंड पपला गुर्जर याला 6 सप्टेंबर 2019 रोजी त्यांच्या साथीदारांनी ए-के 47 फायरिंग करून पळवून नेले होते. तेव्हापासून तो फरार होता. त्याच्यावर राजस्थानमधील विविध पोलीस ठाण्यात अनेक गुन्हे दाखल आहेत. काही गुन्ह्यात त्याला न्यायालयाने शिक्षाही सुनावली आहे. शिक्षा भोगत असतानाच तो अल्वर राजस्थान येथील जेलची सुरक्षा भेदून पळाला होता.
संबंधित कुख्यात गुंडाने कोल्हापुरात आश्रय घेतल्याची माहिती राजस्थान पोलीसांना मिळाली. तो गुंड कोल्हापुरात उजळाईवाडी कॉलनीत रहात होता अशी माहिती समोर आली होती. त्यानुसार राजस्थानमधील पोलीसांचे एक पथक कोल्हापुरात दाखल झाले. कोल्हापूर पोलीसांच्या समवेत राजस्थान पोलीसांनी मध्यरात्री पोलिस फौजफाटा तैनात करुन त्या गुंडाला ताब्यात घेतले. त्याला काल रात्रीच त्याला राजस्थानला नेण्यात आले आहे. दरम्यान, या कारवाईमध्ये पोलिसांनी कमालीची गुप्तता पाळली होती. पपलासोबत त्याच्या मैत्रीणीलासुद्धा पोलिसांना अटक केली आहे. एका जिममध्ये तरूणी आणि पपला याची ओळख झाल्याची माहिती मिळाली असून गेल्या महिनाभरापासून मैत्रीण कोल्हापुरात येत होती.