नवी दिल्ली : पश्चिम आशियातील तणावाच्या पार्श्वभूमीवर सोन्याच्या बाजारात मोठे चढ-उतार सुरू असल्याचं दिसतंय. एकीकडे सेंट्रल बँका विक्रमी प्रमाणात सोन्याची खरेदी करतायत, ज्यामुळे ग्लोबल गोल्ड रिझर्व 35 वर्षांच्या उच्चांकावर पोहोचलाय. तरीही दुसरीकडे सोन्याच्या दरात घसरण होत असल्याने गुंतवणूकदार संभ्रमात पडलेत.
तज्ज्ञांच्या मते, दीर्घकालीन दृष्टीने सोनं मजबूत असलं तरी सध्या अल्पकालीन दबावामुळे त्याचे दर घसरताना दिसतायत. बाजारात एकाच वेळी सकारात्मक आणि नकारात्मक घटक काम करत असल्यामुळे ही स्थिती निर्माण झाली आहे.
Central Bank Gold Buying : सेंट्रल बँकांचा सोन्यावर वाढता विश्वास
जगभरातील सेंट्रल बँकांकडून सोन्याची खरेदी वाढली आहे. ग्लोबल गोल्ड रिझर्व आता सुमारे 30 टक्क्यांपर्यंत पोहोचलाय, जो 1991 नंतरचा उच्चांक आहे. यावर्षी जवळपास 800 टन सोन्याची खरेदी होऊ शकते, असा अंदाज वर्तवला जातोय. त्यामुळे दीर्घकालीन बाजारासाठी हे सकारात्मक संकेत मानले जातायत.
Comex Inventory Drop : कॉमेक्स इन्व्हेंटरीत मोठी घट
सोन्याच्या घसरणीमागील पहिलं कारण म्हणजे जागतिक बाजारातील कॉमेक्स इन्व्हेंटरीत जवळपास 32 टक्क्यांची घट झाली आहे. सप्लाय टाइट होत असला तरी अल्पकालीन अस्थिरता वाढली आहे. BRICS देशांकडे मोठा साठा असल्याने दीर्घकालीन आधार मिळतोय, मात्र तात्पुरता दबाव कायम आहे.
US Fed Interest Rates : व्याजदर कपातीची शक्यता कमी
दुसरं मोठं कारण म्हणजे अमेरिकन फेडरल रिझर्वने व्याजदर कपातीची शक्यता जवळपास संपवली आहे. सध्या व्याजदर 3.75 टक्क्यांच्या आसपास स्थिर आहेत. त्यामुळे गुंतवणूकदार सोन्याऐवजी इतर पर्यायांकडे वळतायत. त्याचबरोबर ETF मधून मोठ्या प्रमाणात पैसे बाहेर पडल्यानेही सोन्यावर दबाव वाढला आहे.
Gold Price Outlook : पुढे काय होऊ शकतं?
जर सोन्याचे दर पुन्हा वाढले तर ते मोठ्या उंचीवर जाऊ शकतात. काही तज्ज्ञांच्या मते भविष्यात सोन्याचा दर 2 लाख रुपये प्रति 10 ग्रॅमपर्यंत पोहोचू शकतो. मात्र दुसरीकडे जर घसरण कायम राहिली, तर दर 1.17 लाख रुपयांपर्यंत खाली येण्याची शक्यता देखील नाकारता येत नाही.
Investment Advice : गुंतवणूकदारांसाठी सल्ला
सध्याच्या घडीला सोन्याचा बाजार पूर्णपणे जागतिक अर्थव्यवस्था, व्याजदर आणि भू-राजकीय परिस्थितीवर अवलंबून आहे. त्यामुळे घाईत निर्णय न घेता बाजारातील महत्त्वाच्या पातळ्यांवर लक्ष ठेवणं आवश्यक आहे.
ही बातमी वाचा: