7th Pay Commission : केंद्रीय कर्मचारी आणि पेन्शनधारकांसाठी मोदी सरकारने खूशखबर दिली आहे. पंतप्रधान नरेंद्र मोदी यांच्या अध्यक्षतेखाली आज झालेल्या मंत्रिमंडळ बैठकीत डीए (महागाई भत्ता) चार टक्केंनी वाढवण्याचा निर्णय घेतला आहे. केंद्र सरकारने महागाई भत्ता 38 टक्केंवरुन 42 टक्के केला आहे. मोदी सरकारच्या या निर्णायामुळे कोट्यवधी सरकारी कर्मचारी आणि पेन्शनधारकांना फायदा होणार आहे. प्रत्येकवर्षी मार्चमध्ये केंद्र सरकार डीएमध्ये वाढ करते.
केंद्र सरकारने महागाई भत्ता वाढवण्याचा निर्णय घेतल्यामुळे देशभरातील केंद्रीय कर्मचाऱ्यांचा आणि पेन्शनधारकांना फायदा होणार आहे. पंतप्रधान नरेंद्र मोदी यांच्या अध्यक्षतेखाली झालेल्या बैठकीत चार टक्के महागाई भत्ता वाढवण्याचा निर्णय घेतला. त्यामुळे सध्या असलेला 38 टक्के महागाई भत्ता वाढून 42 टक्के इतका होईल.
केंद्रीय कर्मचार्‍यांचा महागाई भत्ता आणि पेन्शनधारकांच्या महागाई सवलतीत वाढ करण्याचा निर्णय 1 जानेवारी 2023 पासून लागू केला जाईल. कर्मचारी आणि पेन्शनधारकांसाठी महागाई भत्ता आणि महागाई सवलत वाढवण्याच्या निर्णयानंतर सरकारच्या तिजोरीवर वार्षिक 12,815.60 कोटी रुपयांचा भार पडणार आहे. या निर्णयाचा फायदा 47.58 लाख कर्मचारी आणि 69.76 लाख पेन्शनधारकांना होणार आहे. ही वाढ सातव्या वेतन आयोगाच्या शिफारशींच्या आधारे निश्चित केलेल्या सूत्रानुसार करण्यात आली आहे.
किती वाढणार पैसे -
महागाई भत्ता वाढल्यामुळे केंद्रीय कर्मचाऱ्यांचा पगार वाढणार, त्याशिवाय पेन्शनधारकांच्या पेन्शनमध्येही वाढ होणार आहे. किती पैसे वाढणार ते उदाहरणासह पाहूयात.. समजा एखाद्या कर्मचारा बेसिक पगार 25500 रुपये आहे.. सध्याच्या 38 टक्केंच्या डीएनुसार त्याला 9690 रुपये मिळतात.. जर डीए 42 टक्के झाला तर महागाई भत्ता 10710 रुपये होईल.. म्हणजे प्रत्येक महिन्याला 1020 रुपये वाढीव वेतन मिळेल.
चार वर्षात कसा वाढला डीए ?
31 डिसेंबर, 2019 पर्यंत 7th Pay Commission च्या आधारावर वेतन घेणाऱ्या सर्व कर्मचाऱ्यांना 17 टक्कें महागाई भत्ता मिळत होता. त्यानंतर जवळपास दीड वर्ष कोरोनामुळे महागाई भत्त्यामध्ये कोणतीही वाढ झाली नाही. जुलै 2021 मध्ये महागाई भत्ता 11 टक्केंनी वाढवण्यात आला. त्यानंतर ऑक्टोबर 2021 मध्ये यामध्ये तीन टक्के वाढ करण्यात आली. याला एक जुलै 2021 पासून लागू करण्यात आले. सर्व कर्मचाऱ्यांना वेतन अथवा पेन्शनधारकांना पेन्शन डीए एक जुलै 2021 पासून 31 टक्केंच्या दराने मिळत होता. त्यानंतर जानेवारी 2022 मध्ये महागाई भत्त्यामध्ये तीन टक्के वाढ करण्यात आली. त्यामुळे आतापर्यंत सर्व केंद्रीय कर्मचारी आणि पेन्शनधारकांना 34 टक्के महागाई भत्ता दिला जात होता. त्यानंतर गेल्यावर्षी यामध्ये चार टक्के वाढ करण्यात आल्यामुळे डीए 38 टक्के झाला होता. आता यामध्ये पुन्हा चार टक्के वाढ करण्यात आली आहे. त्यामुळे आता 42 टक्के दराने सर्व केंद्रीय कर्मचारी आणि पेन्शनधारकांना महागाई भत्ता देण्यात येईल.