Pradosh Vrat 2024 : आज सोम प्रदोष व्रत! 'या' शुभ मुहूर्तावर करा भगवान शंकराची पूजा; सुटतील सर्व समस्या

जयदीप मेढे | 20 May 2024 09:41 AM (IST)

Pradosh Vrat 2024 : सोम प्रदोष व्रत मुलांच्या सुखासाठी, लवकर विवाह आणि सुखी वैवाहिक जीवनासाठी पाळले जाते.

Pradosh Vrat 2024

Pradosh Vrat 2024 : हिंदू धर्मात प्रदोष व्रताला फार महत्त्व आहे. हा शुभ दिवस भगवान शंकराला (Lord Shiva) समर्पित आहे. प्रत्येक महिन्याच्या कृष्ण पक्ष आणि शुक्ल पक्षातील त्रयोदशी तिथीला हे व्रत पाळले जाते. वैशाख महिन्यातील शुक्ल पक्षातील प्रदोष व्रत (Pradosh Vrat) 20 मे रोजी म्हणजेच आज पाळण्यात येणार आहे.

प्रदोष व्रताचं महत्त्व (Pradosh Vrat Importance)

कोणत्याही महिन्याच्या शुक्ल पक्षातील त्रयोदशीपासून प्रदोष व्रत सुरू करता येते. त्याचबरोबर श्रावण आणि कार्तिक महिन्यातील त्रयोदशीपासून प्रदोष व्रत सुरू करणे अत्यंत शुभ मानले जाते. हे व्रत स्त्री किंवा पुरुष कोणीही करू शकते. प्रदोष व्रत केल्याने माणसाच्या सर्व मनोकामना पूर्ण होतात, अशी धार्मिक मान्यता आहे.

भगवान शकंराला प्रसन्न करण्यासाठी सोम प्रदोष व्रत हा सर्वोत्तम दिवस मानला जातो. सोम प्रदोष व्रत मुलांच्या सुखासाठी, लवकर विवाह आणि सुखी वैवाहिक जीवनासाठी पाळले जाते. सोम प्रदोष व्रत कसे पाळावे? पूजेचा शुभ मुहूर्त कोणता हे जाणून घेऊयात.

सोम प्रदोष व्रत 2024 तारीख (Pradosh Vrat Date)

पंचांगानुसार, वैशाख महिन्यातील शुक्ल पक्षातील त्रयोदशी तिथी सोमवार, 20 मे रोजी दुपारी 3:58 वाजता सुरू होईल आणि ही तिथी दुसऱ्या दिवशी म्हणजेच मंगळवार, 21 मे रोजी सायंकाळी 5:39 वाजता समाप्त होईल. पण, तिथीनुसार सोम प्रदोष व्रत आज पाळले जाणार आहे.

सोम प्रदोष व्रतासाठी शुभ मुहूर्त (Pradosh Vrat Muhurta)

प्रदोष व्रताच्या दिवशी पूजेसाठी सर्वात शुभ मुहूर्त 20 मे रोजी संध्याकाळी 6:15 ते 7:20 पर्यंत आहे. याशिवाय मध्यान्हात म्हणजेच अभिजीत मुहूर्तावरही भगवान शिवाची पूजा करता येते.