Kisan Sabha : किसान सभेचे (Kisan Sabha) 23 वे महाराष्ट्र राज्य अधिवेशनाला उद्यापासून (31 ऑक्टोबर) सुरुवात होणार आहे. हे अधिवेशन 31 ऑक्टोबर ते 2 नोव्हेंबर 2022 पर्यंत अकोले (Akole) जि. अहमदनगर या ठिकाणी आयोजित करण्यात आलं आहे. या अधिवेशनात ओला दुष्काळ प्रश्नी करणार आरपार लढ्याचे नियोजन करण्यात आल्याची माहिती किसान सभेचे नेते डॉ. अजित नवले (Ajit Nawale) यांनी दिली. अधिवेशनात 300 प्रतिनिधींसह किसान सभेचे 71 राज्य कौन्सिल सदस्य उपस्थित राहमार आहेत.
दरम्यान, राज्य अधिवेशनापूर्वी किसान सभेची राज्यभर रीतसर गाव, तालुका व जिल्हा अधिवेशन घेण्यात आली असल्याची माहिती नवले यांनी दिली आहे. या अधिवेशनाच्या निमित्ताने शेतकरी तसेच श्रमिकांच्या विविध प्रश्नांबाबत राज्यव्यापी लढ्याचं नियोजन करण्यात येणार आहे. तसेच विविध शेतकऱ्यांच्या प्रश्नासंदर्भात या अधिवेशनात चर्चा होणार आहे. तसेच अन्य काही मुद्द्यांवर देखील या अधिवेशनात चर्चा होणार आहे.
या प्रमुख मागण्यांवर अधिवेशनात चर्चा होणार
परतीच्या पावसाने नुकसान झाल्याने शेतकऱ्यांचा खरीप हंगाम पूर्णपणे वाया गेला आहे. यामुळं शेतकरी उध्वस्त झाले आहेत. या पार्श्वभूमीवर शेतकऱ्यांची खरीप हंगामासाठी घेतलेले संपूर्ण कर्ज सरकारने माफ करावे तसेच शेतकऱ्यांना उपजीविकेसाठी सहाय्य म्हणून प्रति एकर 50 हजार रुपये भरपाई द्यावी, पीक विमा कंपन्यांनी अग्रिम भरपाई व विमा भरपाई द्यावी, दुधाला एफ.आर.पी. व रेव्हेन्यू शेअरिंगचे धोरण लागू करावे, उसाला एफ.आर.पी. अधिक 200 रुपये एकरकमी द्यावेत, सर्व पिकांना उत्पादन खर्चाच्या दीडपट हमीभाव देणारा कायदा करावा, दारिद्र्यरेषेच्या यादीत पात्र लाभार्थींचा समावेश व्हावा, वनजमिनी कसणारांच्या नावे कराव्यात, हिरड्याची सरकारी खरेदी सुरू करून हिरड्याला रास्त भाव द्यावा, श्रमिकांना घरकुल, रेशन व वृद्धापकाळ पेंशन द्यावे, रस्ते, कोरीडॉर, धरणे, रेल्वे, हायवे, विमानतळ आदी विकासकामांसाठी जमिनी संपादित केलेल्या शेतकऱ्यांना 2013 च्या भूसंपादन कायद्याप्रमाणे भरपाई व पुनर्वसन द्यावे, या व इतर मागण्या या अधिवेशनात करण्यात येणार आहेत.
सोमवारी (31 ऑक्टोबर 2022) रोजी अकोले येथे होणाऱ्या अधिवेशनात डॉ. अशोक ढवळे, पी. कृष्णप्रसाद, माजी आमदार जे. पी. गावीत, किसन गुजर, डॉ. अजित नवले, आमदार विनोद निकोले, अर्जुन आडे, उमेश देशमुख हे प्रमुख वक्ते म्हणून उपस्थित राहणार असल्याची माहिती डॉ. अजित नवले यांनी दिली.
महत्त्वाच्या बातम्या: