Pimpri-Chinchwad Crime: 'चारित्र्याच्या संशयावरून' वाद विकोपाला, पत्नीकडून पतीची हत्या

पिंपरी-चिंचवडमध्ये एक धक्कादायक घटना घडली आहे, जिथे पत्नीनेच आपल्या पतीची हत्या केली आहे. सामाजिक कार्यकर्ते नकुल भोईर (Nakul Bhoir) यांची त्यांची पत्नी चैताली भोईर (Chaitali Bhoir) हिने गळा आवळून हत्या केली. 'पती सतत चारित्र्यावर संशय घेत असल्याने त्यांच्यात वाद होत असे, आणि याच वादातून पत्नीने ओढणीने गळा आवळून पतीचा जीव घेतला', अशी माहिती पोलिसांनी दिली आहे. मृत नकुल भोईर हे सामाजिक कार्यात सक्रिय होते आणि आगामी पिंपरी-चिंचवड महानगरपालिका निवडणुकीत आपल्या पत्नीला नगरसेवक म्हणून उभे करू इच्छित होते. मात्र, पती-पत्नीमधील वाद विकोपाला गेला आणि शुक्रवारी पहाटे चैतालीने नकुल यांची हत्या केली. या दाम्पत्याला दोन लहान मुले असून, या घटनेनंतर चिंचवड पोलिसांनी आरोपी पत्नी चैताली भोईरला ताब्यात घेतले आहे. या घटनेमुळे परिसरात मोठी खळबळ उडाली असून पोलीस पुढील तपास करत आहेत.