Farmer Loan: राज्याकडून केंद्राला कर्जमाफीचा प्रस्वाव गेला नाही,उद्धव ठाकरेंचा दावा

शेतकरी कर्जमुक्ती (Farmer Loan Waiver), पीक विमा (Crop Insurance) आणि अतिवृष्टीच्या नुकसान भरपाईवरून शिवसेना (UBT) पक्षप्रमुख उद्धव ठाकरे (Uddhav Thackeray) यांनी शिंदे-फडणवीस सरकारवर (Shinde-Fadnavis Government) जोरदार टीका केली आहे. ‘बँकांचा फायदा होईल म्हणून आम्ही कर्जमाफी करत नाही आहोत, असं मुख्यमंत्री म्हणतात, मग जूनमध्ये कर्जमाफी केली तर बँकांचा फायदा होणार नाही का?,’ असा थेट सवाल उद्धव ठाकरे यांनी केला आहे. आपल्या काळात कोणताही अभ्यास न करता, हिवाळी अधिवेशनात नागपूरमध्ये आपण शेतकऱ्याला दोन लाखांपर्यंत पीक कर्जमुक्त केलं होतं, याची आठवण त्यांनी करून दिली. तीच महात्मा फुले कर्जमुक्ती योजना, ज्याची संपूर्ण माहिती आणि यंत्रणा तयार आहे, तीच योजना आता का राबवत नाही, असे ते म्हणाले. ठाणे-पालघर जिल्ह्यातील शेतकऱ्यांना पीक विम्यापोटी अवघे दोन रुपये मिळाल्याची बातमी खरी ठरली असून, ही शेतकऱ्यांची थट्टा असल्याची टीकाही त्यांनी केली.