Raigad Save Land: रायगडात ठाकरोली गावाचा आदर्श, जमिनीच्या विक्रीवर बंदी

म्हसळा तालुक्यातील (Mhasla Taluka) ठाकरोली (Thakroli) गावाने एक नवा आदर्श निर्माण केला आहे. कोकणात जमीन खरेदी-विक्रीचा व्यवसाय जोरात सुरू असताना आणि दलालांच्या फायद्यामुळे शेतकरी उद्ध्वस्त होत असताना, या गावाने जमिनीचे संरक्षण आणि स्थलांतर रोखण्यासाठी महत्त्वपूर्ण पाऊल उचलले आहे. 'जमिनी वाचवा आणि स्थलांतर थांबवा' ही संकल्पना राबवून गावकऱ्यांनी गावात जमीन विक्री करण्यावर पूर्णपणे बंदी घातली आहे. या निर्णयामुळे गावाचे 'गावपण' टिकून राहील, अशी गावकऱ्यांना आशा आहे. कोकणातील अनेक गावांमध्ये जमीन विक्रीमुळे मूळ रहिवासी भूमिहीन होत असून गावे ओस पडत आहेत. या पार्श्वभूमीवर, ठाकरोलीच्या गावकऱ्यांनी गावाच्या वेशीवर जमीन विक्रीस बंदी घालणारा फलक लावला आहे, जो आता सर्वांचे लक्ष वेधून घेत आहे. या सामूहिक निर्णयाचे सर्वत्र कौतुक होत आहे.