Raigad Land Mafia: आमच्या गावात जमीन विकायला बंदी, कोकणातील गावचा आदर्श निर्णय

कोकणातील जमिनींच्या खरेदी-विक्रीच्या वाढत्या व्यवसायाला आणि त्यातून होणाऱ्या स्थलांतराला रोखण्यासाठी म्हसळा तालुक्यातील ठाकरोली गावाने एक आदर्श पाऊल उचलले आहे. 'जमिनी वाचवा आणि स्थलांतर थांबवा' ही संकल्पना घेऊन गावकऱ्यांनी गावात जमीन विकण्यावर बंदी घालण्याचा निर्णय घेतला आहे. या व्यवसायात दलाल श्रीमंत होत असून मूळ भूमिपुत्र शेतकरी मात्र उपाशी राहत असल्याची भावना बळावल्याने हा निर्णय घेण्यात आला. गावपण टिकवण्यासाठी उचललेल्या या कौतुकास्पद निर्णयानुसार, गावकऱ्यांनी गावाबाहेर 'या गावात जमीन विकण्यास बंदी आहे' असे फलक लावले आहेत. या अनोख्या भूमिकेमुळे ठाकरोली गावाचे सर्वत्र कौतुक होत आहे.