Pune Godwoman Fraud : उच्चशिक्षित दाम्पत्याला 14 कोटींचा गंडा, भोंदू मांत्रिकाचा प्रताप

पुण्यात (Pune) एका भोंदू महिला मांत्रिक वेदिका पंढरपूरकर (Vedika Pandharpurkar) हिने आयटी इंजिनियर असलेल्या दीपक डोळस (Deepak Dolas) आणि त्यांच्या कुटुंबाला तब्बल 14 कोटी रुपयांना गंडवल्याची धक्कादायक घटना समोर आली आहे. दीपक डोळस यांनी सांगितल्याप्रमाणे, 'तुमच्या अकाउंटमधे पैसे तुम्ही ठेवले तर यांचे जे दोष आहेत हे दोष जाणार नाहीत,' असे आमिष दाखवून मांत्रिकाने त्यांची फसवणूक केली. आपल्या दोन दिव्यांग मुली बऱ्या व्हाव्यात या आशेने डोळस कुटुंब या अंधश्रद्धेला बळी पडले. 'अंगात शंकर महाराज संचारतात' असा दावा करणाऱ्या वेदिकाने, मुलींच्या उपचारासाठी सगळी संपत्ती विकायला लावली. यानंतर डोळस कुटुंबाने इंग्लंडमधील घर, पुण्यातील फ्लॅट्स आणि वडिलोपार्जित जमीन विकून सर्व पैसे वेदिकाच्या खात्यात जमा केले. या फसवणुकीमुळे एकेकाळी इंग्लंडमध्ये उच्च पदावर कार्यरत असलेले डोळस कुटुंब आज भाड्याच्या घरात राहण्यास मजबूर झाले आहे.