Nana Patole On Farmers Issue : सरकार फक्त आकडे जाहीर करतंय,कोणतीही मदत करत नाहीय

नागपूरमध्ये काँग्रेसने (Congress) शेतकऱ्यांच्या प्रश्नांवरुन आक्रमक पवित्रा घेतला आहे. प्रदेशाध्यक्ष नाना पटोले (Nana Patole) यांच्या नेतृत्वात 'रेल रोको' आंदोलन करण्यात आले, ज्यात त्यांनी शिंदे-फडणवीस-पवार सरकारवर जोरदार टीका केली. 'तुम्हाला शेतकऱ्यांच्या आणखी किती आत्महत्या पाहिजेत?' असा संतप्त सवाल नाना पटोले यांनी सरकारला विचारला आहे. राज्यात ओला दुष्काळ (Wet Drought) जाहीर करण्याची परिस्थिती असतानाही मुख्यमंत्री नकार देत आहेत, पण विरोधी पक्षात असताना देवेंद्र फडणवीस स्वतः याच मागणीसाठी आंदोलन करत होते, अशी आठवण पटोले यांनी करून दिली. सरकारने जाहीर केलेली मदत शेतकऱ्यांच्या खात्यात पोहोचत नसून, केवळ आकड्यांचा खेळ सुरू असल्याचा आरोपही त्यांनी केला. सरकारने जाहीरनाम्यात दिलेले कर्जमाफीचे (Loan Waiver) आश्वासन पूर्ण करावे आणि तातडीने ओला दुष्काळ जाहीर करावा, अन्यथा आंदोलन तीव्र करण्याचा इशारा काँग्रेसने दिला आहे.