Voter List Row : मतदार याद्यांतील घोळावरून मविआ-मनसे आक्रमक, आयोगाला थेट विचारला जाब

महाविकास आघाडीचे नेते उद्धव ठाकरे, शरद पवार आणि मनसे अध्यक्ष राज ठाकरे यांनी मतदार यादीतील त्रुटी आणि दुबार मतदानाच्या मुद्द्यावरून निवडणूक आयोगाची भेट घेतली. दुबार नावे असलेल्या मतदाराला कुठे मतदान करायचे आहे, हे विचारले जाईल पण नाव वगळले जाणार नाही, या आयोगाच्या कथित उत्तरावर उद्धव ठाकरे यांनी, 'हीच तर वोट चोरीची सुरुवात आहे', असा थेट हल्लाबोल केला. या बैठकीत राज ठाकरे यांनी निवडणुकांच्या तयारीवरून आयोगाला अनेक प्रश्न विचारले, तर राष्ट्रवादी काँग्रेसचे नेते जयंत पाटील यांनी लाखो खोटे मतदार असल्याचा आरोप करत सॉफ्टवेअरद्वारे याद्या दुरुस्त करण्याची मागणी केली. मविआने एका निवेदनाद्वारे आयोगाच्या स्वायत्ततेवरच प्रश्नचिन्ह निर्माण केले आहे. ही चर्चा अपूर्ण राहिल्याने नेते पुन्हा निवडणूक अधिकाऱ्यांची भेट घेणार आहेत. दरम्यान, एकनाथ शिंदे यांनी या आघाडीला 'महा कन्फ्युज आघाडी' म्हटले आहे.