Mumbai Mega Block: मुंबईकरांनो लक्ष द्या! रविवारी मध्य आणि ट्रान्स-हार्बर मार्गावर मेगाब्लॉक

मध्य रेल्वेने (Central Railway) मुंबईतील प्रवाशांसाठी महत्त्वाची सूचना जारी केली आहे. रविवार, २६ ऑक्टोबर रोजी विविध अभियांत्रिकी आणि देखभालीच्या कामांसाठी मध्य आणि ट्रान्स-हार्बर (Trans-Harbour) मार्गांवर मेगाब्लॉक जाहीर करण्यात आला आहे. मध्य रेल्वेच्या माटुंगा ते मुलुंड दरम्यान अप आणि डाउन जलद मार्गावर सकाळी ११:०५ ते दुपारी ३:४५ पर्यंत ब्लॉक असेल. या काळात जलद गाड्या धीम्या मार्गावर वळवण्यात येणार असून, त्या १५ मिनिटे उशिराने धावतील. ट्रान्स-हार्बर मार्गावर, ठाणे आणि वाशी/नेरुळ दरम्यान सकाळी ११:१० ते दुपारी ४:१० पर्यंत सेवा पूर्णपणे बंद राहील. पश्चिम रेल्वेवर (Western Railway) दिवसा कोणताही ब्लॉक नसला तरी, शनिवारी-रविवारी मध्यरात्री वसई रोड आणि भाईंदर स्थानकांदरम्यान रात्रीचा जंबो ब्लॉक असेल. प्रवाशांनी प्रवास करण्यापूर्वी रेल्वेच्या वेळापत्रकातील बदल लक्षात घ्यावेत, असे आवाहन रेल्वे प्रशासनाने केले आहे.