Naxal Surrender: नक्षलविरोधी अभियानाला मोठे यश, अनेक जहाल नक्षलवादी शरण;सलग चौथ्या दिवशीही शरणागती

छत्तीसगड (Chhattisgarh) आणि महाराष्ट्र (Maharashtra) राज्यात नक्षलविरोधी अभियानाला मोठे यश मिळाले असून गेल्या तीन दिवसांत ३०० हून अधिक नक्षलवाद्यांनी आत्मसमर्पण केले आहे. केंद्रीय गृहमंत्री अमित शाह (Amit Shah) यांनी याला दुजोरा दिला असून, ‘शस्त्र खाली ठेवणाऱ्यांचे स्वागत आहे, पण जे बंदूक चालवत राहतील त्यांना सुरक्षा दलांच्या कारवाईला सामोरे जावे लागेल,’ असा इशारा दिला आहे. शुक्रवार, १७ ऑक्टोबर रोजी छत्तीसगडमध्ये २०८ नक्षलवाद्यांनी मुख्यमंत्री विष्णू देव साई (Vishnu Deo Sai) यांच्या उपस्थितीत शरणागती पत्करली, जी आजवरची सर्वात मोठी शरणागती मानली जात आहे. यापूर्वी, महाराष्ट्रातील गडचिरोलीत ६१ माओवाद्यांनी मुख्यमंत्री देवेंद्र फडणवीस (Devendra Fadnavis) यांच्यासमोर आत्मसमर्पण केले होते. शरणागती पत्करलेल्यांमध्ये अनेक मोठ्या नेत्यांचा समावेश असून, त्यांच्याकडून AK-47 रायफल्ससारखी अनेक शस्त्रे जप्त करण्यात आली आहेत.