Operation Golden Sweep: ऑपरेशन गोल्डन स्वीप: आंतरराष्ट्रीय सोने तस्कर टोळीचा पर्दाफाश

मुंबई विमानतळावर महसूल गुप्तचर संचालनालयाने (DRI) 'ऑपरेशन गोल्डन स्वीप' अंतर्गत केलेल्या मोठ्या कारवाईत आंतरराष्ट्रीय सोने तस्करी करणाऱ्या टोळीचा पर्दाफाश केला आहे. या कारवाईमध्ये १३ जणांना अटक करण्यात आली असून, त्यात दोन बांगलादेशी, सहा श्रीलंकन नागरिक, विमानतळावरील 'मीट अँड ग्रीट' सेवेचे दोन कर्मचारी, दोन हँडलर्स आणि मुंबईतील मुख्य सूत्रधाराचा समावेश आहे. अटक करण्यात आलेल्या आरोपींकडून १०.५ किलो २४ कॅरेट सोने जप्त करण्यात आले आहे, ज्याची किंमत अंदाजे १२.५८ कोटी रुपये आहे. दुबईहून येणारे प्रवासी शरीरात कॅप्सूल लपवून सोने आणत आणि विमानतळावरील कर्मचारी ते बाहेर काढण्यास मदत करत असत. ही टोळी मुंबई आणि दुबईतून चालवली जात होती, ज्यामुळे विमानतळासारख्या संवेदनशील ठिकाणी अंतर्गत सुरक्षेचा धोका निर्माण झाला होता.