Bhandara Accident: हनुमान मंदिरात महाप्रसादाचा कुकर फुटला, 12 हून अधिक जखमी, 6 जणांची प्रकृती गंभीर

भंडारा शहरातील बाबा मस्तानशहा वॉर्डातील हनुमान मंदिरात एक मोठी दुर्घटना घडली आहे, जिथे महाप्रसाद तयार करत असताना प्रेशर कुकरचा भीषण स्फोट झाला. सायंकाळच्या सुमारास मंदिरामध्ये चाळीस किलो वजनाच्या कुकरमध्ये महाप्रसादासाठी डाळ शिजत असताना हा अपघात घडला. जेव्हा कुकर उघडण्याचा प्रयत्न करण्यात आला, तेव्हा त्याचा स्फोट होऊन गरम डाळ परिसरात पसरली. या दुर्घटनेत तिथे उपस्थित असलेल्या बारा पेक्षा अधिक जणांच्या अंगावर वाफाळलेली डाळ पडल्याने ते गंभीररित्या भाजले गेले आहेत. जखमींना तात्काळ रुग्णालयात दाखल करण्यात आले असून, त्यापैकी सहा जणांची प्रकृती चिंताजनक असल्याचे सांगण्यात येत आहे.