Pune Land Row: 'व्यवहार रद्द केला', पण पार्थ पवारांसाठी अजित पवारांना २१ कोटींचा दंड भरावा लागणार?

पुण्याचे राजकारण उपमुख्यमंत्री अजित पवार (Ajit Pawar) आणि त्यांचे पुत्र पार्थ पवार (Parth Pawar) यांच्याभोवती फिरत आहे. पुण्यातील मुंडवा येथील वादग्रस्त जमीन व्यवहार रद्द केल्याची घोषणा अजित पवारांनी केली आहे. 'माझा मुलगा पार्थ आणि त्याचा भागीदार यांना ही जमीन सरकारी असल्याची माहिती नव्हती,' असे स्पष्टीकरण अजित पवारांनी दिले. या प्रकरणामुळे अजित पवार पहिल्यांदाच पुण्यात दाखल झाले असून, त्यांनी राष्ट्रवादी काँग्रेसच्या कार्यालयात कार्यकर्त्यांच्या भेटीगाठी सुरू केल्या आहेत. आगामी स्थानिक स्वराज्य संस्थांच्या निवडणुकांच्या पार्श्वभूमीवर या दौऱ्याला महत्त्व आहे. मात्र, हा व्यवहार रद्द करण्यासाठी सुमारे २१ कोटी रुपये मुद्रांक शुल्क भरावे लागण्याची शक्यता वर्तवली जात असल्याने पवार कुटुंबाच्या अडचणीत वाढ झाली आहे. मुख्यमंत्री देवेंद्र फडणवीस यांनी या प्रकरणाच्या चौकशीसाठी एक समिती स्थापन केली असून, तिचा अहवाल एका महिन्यात अपेक्षित आहे.