Satish Bhosale Khokya News : 'खोक्या' प्रकरणात व्हिलन ठरवून माझ्या हत्येचा कट, सुरेश धसांचा दावा

Satish Bhosale Khokya News : 'खोक्या' प्रकरणात व्हिलन ठरवून माझ्या हत्येचा कट, सुरेश धसांचा दावा

बीड: सतीश भोसले उर्फ खोक्या प्रकरणात मला व्हिलन ठरवून माझ्या खुनाचा कट आखण्यात आला होता, असा खळबळजनक दावा भाजप आमदार सुरेश धस यांनी केला आहे. सतीश भोसले (Satish Bhosale) हरणांना मारुन त्याचे मांस हे सुरेश धस (Suresh Dhas) यांना पुरवतो, असे सांगून बिश्नोई गँगच्या काही लोकांना विमानाने मुंबईत आणण्यात आले होते. या लोकांना मला मारण्यासाठी आणले होते, असे सुरेश धस यांनी एका मराठी वृत्तपत्राला दिलेल्या मुलाखतीत म्हटले आहे. सुरेश धस यांच्या या दाव्यामुळे एकच खळबळ उडाली आहे. 

भाजप आमदार सुरेश धस यांनी बीड जिल्ह्यातील सरपंच संतोष देशमुख यांच्या हत्येचं प्रकरण उचलून धरत जवळपास तीन महिन्यांहून अधिक काळ मराठवाड्यासह संपूर्ण महाराष्टाचं राजकारण तापवलं होतं. त्यांनी राष्ट्रवादी काँग्रेसचे नेते धनंजय मुंडेंसह भाजप नेत्या पंकजा मुंडे यांच्यावरही टीकेची तोफ डागली होती. पण तेच सुरेश धस त्यांचा कार्यकर्ता सतीश भोसले उर्फ खोक्यामुळे चांगलेच बॅकफूटला गेले होते. याच 'खोक्या'वरुन आता सुरेश धसांनी आता पुन्हा एकदा बाजी पलटवताना गंभीर आरोप केला आहे. सतीश भोसले उर्फ खोक्या प्रकरणात मला अडकवण्याचा मोठा प्रयत्न करण्यात आला. या प्रकरणात विमानाची तिकीटं फाडून राजस्थानातून बिश्नोई समाजाची काही लोकं थेट मुंबईत आणण्यात आली. त्यांना खोक्यानं सुरेश धसांना हरणाचं मांस कसं पुरवलं याबाबत सांगितलं. आष्टीचे आमदार सुरेश धस यांनी एका मराठी वृत्तपत्राला दिलेल्या मुलाखत दिली. यावेळी त्यांनी खोक्या उर्फ सतीश भोसले याच्या बॅटनं अमानुष मारहाण, उधळलेल्या नोटा, हरणाच्या शिकारी यांवरुन होत असलेल्या आरोपांना जोरदार प्रत्युत्तर देतानाच सर्वात मोठा धक्कादायक खुलासा केला आहे.