Zero Hour Full : 7 July | भारतीय रेल्वेचा प्रवास महिलांसाठी सुरक्षित आहे असं वाटतं का? | ABP Majha
भारतात महिलांसाठी ट्रेनचा प्रवास सुरक्षित आहे का? या प्रश्नाचं उत्तर तुम्ही होय असं देणार असाल तर शनिवारची बातमी तुमच्या कानावर आलीय का? ही बातमी तुम्ही जर ऐकलीत ना, तुमच्याही तळपायाची आग मस्तकात जाईल. तुमचंही रक्त उसळायला लागेल. तुम्हालाही प्रश्न पडावा की, हा सारा निंदनीय प्रकार घडत असताना भारतीय रेल्वेचे तिकीट तपासनीस किंवा रेल्वे पोलीस होते कुठे? लांब पल्ल्याच्या ट्रेनमध्ये महिलांचा विनयभंग होत असताना त्या नराधमांना रोखणारं कुणीच तिथं नव्हतं का? गर्दीचा फायदा घेऊन आरक्षित डब्यातून प्रवास करणारे हे नराधम आणि त्यांच्याकडे डोळेझाक करणारी भारतीय रेल्वे यांचा वेळीच पर्दाफाश करण्याची गरज आहे. आपल्या नागपुरातल्या या महिलांसाठी शनिवार, तीन जुलैची मध्यरात्र खूपच भयंकर ठरली. हातात आरक्षित डब्याचं तिकीट आणि सोबतीला कुटुंबीय असतानाही, केवळ महिला म्हणून त्यांच्यासोबत घृणास्पद प्रकार घडणार असतील, तर खरंच आपण माणसांच्या जगात राहतो का, हा प्रश्न भारतीय रेल्वेला आणि केंद्र सरकारला विचारावासा वाटतो. हे सारं ऐकल्यावर तुम्हाला प्रश्न पडला असावा, की, नेमकं असं घडलं तरी काय? तर ऐका. नागपूरच्या काही महिला आपापल्या कुटुंबीयांसोबत बिहार आणि उत्तर प्रदेशमध्ये पर्यटन आणि देवदर्शनासाठी गेल्या होत्या. या महिलांचं दानापूर-सिकंदराबाद एक्स्प्रेसनं परतीचं तिकीट आरक्षित होतं. बिहारच्या दानापूरमधून निघालेली ही ट्रेन नागपूरच्या महिलांना उत्तर प्रदेशातल्या वाराणसीतून पकडायची होती. पण प्रत्यक्षात तो डबा समोर येताच त्या महिलांना मोठा धक्का बसला. नेमक्या ७२ जणांच्या त्या आरक्षित डब्यात तब्बल चारशेहून अधिक लोकांचा जमाव घुसला होता. त्या जमावापैकी किती जणांनी तिकीटं काढली होती, हा प्रश्नय? नागपूरच्या त्या महिला आपल्या कुटुंबियांसह कशाबशा ट्रेनमध्ये चढल्या खऱ्या, पण तिथून सुरू झाला विनयभंग, छेडछाड आणि अश्लील शेरेबाजीचा किळसवाणा अनुभव. ट्रेनच्या दारातून आपल्या आरक्षित आसनापर्यंत जाताना, त्या महिलांना धक्के, अचकट विचकट शेरेबाजी, विनाकारण होणारे स्पर्श या घाणेरड्या प्रकारांना त्यांना सामोरं जावं लागलं. जमावातले ते नराधम कोणालाही ऐकत नव्हते, जुमानत नव्हते. त्यामुळं महिलांनी रेल्वेच्या १३९ या क्रमांकासह एक्स हँडलवर तक्रार केली. पण धक्कादायक बाब म्हणजे त्याचाही काही उपयोग झाला नाही. नमस्कार, मी विजय साळवी. एबीपी माझाच्या झीरो अवर या विशेष कार्यक्रमात आपलं स्वागत.