Delhi : राहुल गांधींना बाळासाहेबांचं कुतूहल? संजय राऊत - राहुल गांधी यांच्या भेटीत नेमकं काय झालं?

नवी दिल्ली : राजकीय वर्तुळात दिल्लीतल्या एका भेटीची सध्या जोरदार चर्चा रंगलीय. ही भेट जरी दिल्लीतली असली तरी ती महाराष्ट्राच्या दृष्टीनं अत्यंत महत्वाची आहे. शिवसेना आणि काँग्रेस कधीकाळी राजकीय क्षितीजावरचे दोन ध्रुव वाटावेत अशी स्थिती आहे. पण महाराष्ट्रातल्या सत्ता समीकरणानं या दोन ध्रुवांना चांगलंच जवळ आणलंय. काल दिल्लीत शिवसेना खासदार संजय राऊत आणि राहुल गांधींची ही भेट यावरच शिक्कामोर्तब करणारी आहे.12 तुघलक लेन या राहुल गांधींच्या दिल्लीतल्या निवासस्थानी या दोघांची ही भेट झाली. महाराष्ट्रातलं सरकार दीर्घकाळ चालावं ही इच्छा या भेटीत राहुल गांधींनी बोलून दाखवली असं नंतर संजय राऊत म्हणाले.