Rohit Pawar on Ajit Pawar : रोहित पवारांच्या आरोपांतील 'तो' नेता कोण? Special Report

अजित पवारांच्या अपघाती मृत्यूनंतर दोन्ही राष्ट्रवादीचे नेते घातपाताचा संशय व्यक्त करत होते. मात्र रोहित पवारांनी मंगळवारी घेतलेल्या पत्रकार परिषदेत सविस्तर मांडणी केल्यानंतर या विषयाचं गांभिर्य अधिक वाढलंय. मुंबईतल्या पत्रकार परिषदेनंतर आज दिल्लीतही रोहित पवारांनी पत्रकार परिषद घेतली. मंगळवारी केलेल्या आरोपांचा त्यांनी दिल्लीत पुनरुच्चार केला आणि आंतरराष्ट्रीय संस्थेकडून तपास करण्याची मागणी केली. दुसरीकडं मुख्यमंत्र्यांनी चौकशीचा निष्कर्ष येईपर्यंत थांबण्याचा सल्ला दिलाय. बघूया, आज दिवसभरात नेमकं काय घडलं याचा आढावा घेणारा हा स्पेशल रिपोर्ट.

अजित पवारांचं विमान कोसळणं हा अपघात नव्हे तर घातच होता, अशी भूमिका घेत चौकशीची मागणी रोहित पवारांनी कायम ठेवलीय.

मंगळवारी मुंबईत घेतलेल्या सविस्तर पत्रकार परिषदेनंतर बुधवारी दिल्लीतही पत्रकार परिषद घेत संपूर्ण देशाचं लक्ष या मुद्द्याकडं वेधण्याचा प्रयत्न केला. 

केवळ सीआयडी आणि सीबीआयवर अवलंबून न राहता आंतरराष्ट्रीय तपास यंत्रणांकडून या विमान अपघाताची चौकशी करण्याची मागणी रोहित पवारांनी केली.

 

विमान अपघाताचे तपशील आंतरराष्ट्रीय संस्थांकडं जाण्यापासून कोण रोखतंय, असा सवाल उपस्थित करत रोहित पवारांनी थेट नाव न घेता एका मोठ्या नेत्यावर निशाणा साधला.

काल 'पूर्व विदर्भातला मोठा नेता' असा उल्लेख करणाऱ्या रोहित पवारांनी आज आणखी एक हिंट देत आरोपाची धार वाढवलीय. 

विमान अपघातानंतर अजित पवारांचा मृतदेहावर सूज दिसत असल्याचं सांगत त्यांनी संशयात भर घातली. 

 

व्हीएसआर कंपनीच्या यापूर्वीच्या घटनांचा उल्लेख करत त्यांनी कंपनीचा व्यवसाय तातडीनं बंद करण्याचीही मागणी केली. 

शिवाय मुख्यमंत्र्यांपासून ते सेलेब्रिटींपर्यंतच्या व्हीआयपी व्यक्तींना अशा विमानांपासून धोका असल्याचा मुद्दाही अधोरेखित केला.