Rohit Sharma Thanks Abhishek Nayar : इंडियन प्रीमियर लीग 2025 मध्ये रविवारी (20 एप्रिल) चेन्नई सुपर किंग्जविरुद्ध मुंबई इंडियन्सचा माजी कर्णधार रोहित शर्माने तुफानी कामगिरी करत अर्धशतक ठोकले. रोहितने आता या खेळीबद्दल भारतीय संघाच्या माजी सपोर्ट स्टाफ सदस्य अभिषेक नायरचे आभार मानले. नंतर अभिषेक नायर यांनी यावर प्रतिक्रिया दिली. अलिकडेच अभिषेक नायरला भारतीय संघातून वगळण्यात आले. त्यानंतर तो कोलकाता नाईट रायडर्सच्या (KKR) सपोर्ट स्टाफमध्ये सामील झाला आहे.
भारतीय संघातून विश्रांती घेऊन कोलकाता नाईट रायडर्समध्ये परत येण्यापूर्वी अभिषेक नायर भारतीय कर्णधारासोबत पडद्यामागे काम करत होता. क्रिकबझच्या मते, रोहित आणि नायर बऱ्याच काळापासून एकमेकांसोबत काम करत आहेत. खरं तर, 17 एप्रिल रोजी वानखेडे स्टेडियमवर सनरायझर्स हैदराबादविरुद्ध रोहितने केलेल्या प्रभावी 26 धावांच्या खेळच्या एक दिवस आधी, दोघेही मुंबई क्रिकेट असोसिएशनच्या बीकेसी सराव करताना दिसले होते.
हंगामाच्या सुरुवातीला रोहित होता खराब फॉर्ममध्ये
रविवारी (20 एप्रिल) वानखेडे मैदानावर चेन्नई सुपर किंग्जविरुद्ध रोहितने नाबाद 76 धावा केल्या. त्यानंतर त्याने त्याच्या इंस्टाग्राम स्टोरीवर नायरचे आभार मानले. हंगामाच्या सुरुवातीला रोहित खराब फॉर्ममध्ये होता. त्याने 0, 8, 13, 17 आणि 18 धावा केल्या. सलग दोन प्रभावी डावांनंतर, तो आता फॉर्ममध्ये दिसू लागला आहे.
बीसीसीआयने नायरला सपोर्ट स्टाफमधून वगळले...
बीसीसीआयने गौतम गंभीरच्या नेतृत्वाखालील भारतीय संघाच्या सपोर्ट स्टाफमधून नायरला वगळले. बीसीसीआयने इतर तीन सदस्यांनाही वगळले आहे, ज्यामध्ये क्षेत्ररक्षण प्रशिक्षक टी. दिलीप, स्ट्रेंथ अँड कंडिशनिंग ट्रेनर सोहम देसाई आणि मालिश करणारा अरुण कानडे. असे मानले जाते की हे चौघेही रोहितचे जवळचे आहेत.
केएल राहुलनेही दिले श्रेय...
ऑस्ट्रेलियातील बॉर्डर-गावसकर ट्रॉफीमध्ये भारतीय फलंदाजांच्या निराशाजनक कामगिरीसाठी नायरला जबाबदार धरण्यात आले. त्यानंतर बीसीसीआयने सीतांशू कोटक यांची फलंदाजी प्रशिक्षक म्हणून नियुक्ती केली आहे. अभिषेक नायरने फक्त रोहित शर्माला मदत केली आहे असे नाही. केएल राहुलने अलीकडेच म्हटले होते की नायरने त्याला टी-20 मध्ये फलंदाजी सुधारण्यास मदत केली.
हे ही वाचा -