Irfan Pathan Commentary IPL 2025: भारतीय क्रिकेट संघाचा माजी अष्टपैलू इरफान पठाण (Irfan Pathan) आयपीएल 2025 च्या (IPL 2025) समालोचन पॅनेलचा भाग नाही. आयपीएलच्या कॉमेंट्रीवरुन इरफान पठाणची हकालपट्टी करण्यात आली आहे. गेल्या अनेक वर्षांपासून इरफान पठाणला प्रत्येक मोठ्या क्रिकेट स्पर्धेत समालोचक म्हणून पाहिले जात आहे. पण यावेळी यादीत त्याचे नाव न दिसल्याने सर्वांनाच आश्चर्य वाटले आहे.
काही खेळाडूंवर वैयक्तिक टीका केल्याने इरफान पठाणला आयपीएलच्या कॉमेंट्री पॅनलवरुन वगळल्याची चर्चा रंगली आहे. याचदरम्यान इरफान पठाणचा एक व्हिडीओ व्हायरल होत आहे. यामध्ये इरफान पठाण भारतीय क्रिकेट संघाचा दिग्गज खेळाडू विराट कोहलीवर टीका करताना दिसत आहे. यामुळे बीसीसीआयने इरफान पठाणला आयपीलएच्या कॉमेंट्री पॅनलमधून वगळल्याचे बोलले जात आहे.
इरफान पठाण काय म्हणाला होता?
सोशल मीडियावर बॉर्डर गावस्कर ट्रॉफीशी संबंधित एक व्हिडीओ क्लिप शेअर केली आहे. या व्हिडीओमध्ये इरफान पठाण विराट कोहलीवर टीका करताना दिसतोय. विराट कोहली घरगुती स्पर्धेमध्ये शेवटचा कधी खेळला होता तर एका दशकापूर्वी. पहिल्या डावामध्ये 2024 ला विराटची सरासरी 15 इतकी होती. वरिष्ठ खेळाडू भारतीय संघात हवेत का? याचा विचार व्हायला हवा. याऐवजी एखाद्या तरुण खेळाडूला वारंवार संधी दिली तर तो सुद्धा 25-30 ची सरासरी देईल, असं इरफान पठाण या व्हिडीओमध्ये बोलताना दिसतोय. दरम्यान, इरफान पठाणने रोहित शर्मावर देखील टीका केली होती.
इरफान पठाणला वगळले, नेटकरी संतापले-
इरफान पठाण खेळातील राजकारणाचा बळी ठरतोय का? असा प्रश्न देखील विचारला जातोय. इरफान पठाण गौतम गंभीरचा जवळचा मानला जातो. परंतू इरफान पठाणने कठोर शब्दात टीका केल्याचं काही खेळाडूंना पटलं नाही. सुनील गावस्कर, रवी शास्त्री, कपिल देव आणि सर्व समालोचक वेळोवेळी खेळाडूंवर टीका आणि कौतुक करत आहेत. त्यांच्यावर कारवाई झाली का? असा सवाल देखील नेटकरी करत आहेत.