Mumbai Indians : मुंबई इंडियन्सनं चारवेळा एलिमिनेटरचे सामने खेळले, MI चं जुनं रेकॉर्ड पाहून चाहत्यांची धाकधूक वाढणार
Mumbai Indians : मुंबई इंडियन्सनं आयपीएलमध्ये प्लेऑफमध्ये प्रवेश केला आहे. मुंबई इंडियन्स गुणतालिकेत चौथ्या स्थानावर असल्यानं त्यांना एलिमिनेटरचा सामना करावा लागेल.
मुंबई : हार्दिक पांड्याच्या नेतृत्त्वात मुंबई इंडियन्सनं आयपीएलच्या 18 व्या हंगामात प्लेऑफमध्ये प्रवेश केला आहे. मुंबई इंडियन्सची आयपीएलच्या या पर्वाची सुरुवात चांगली झाली नव्हती. मात्र, मुंबई इंडियन्सनं कमबॅक करत प्लेऑफमध्ये प्रवेश केला आहे. पंजाब किंग्ज विरुद्ध झालेल्या पराभवामुळं मुंबई इंडियन्स गुणतालिकेत चौथ्या स्थानावर आहे. मुंबई चौथ्या स्थानावर असल्यानं त्यांना प्लेऑफमध्ये एलिमिनेटरचा सामना खेळावा लागेल. मुंबई विरुद्ध एलिमिनेटरचा सामना कोण खेळणार हे अद्याप स्पष्ट झालेलं नाही. मुंबई इंडियन्सनं यापूर्वी चार एलिमिनेटरचे सामने खेळले आहेत. त्यामध्ये काय घडलेलं यासंदर्भातील रेकॉर्ड कॅप्टन हार्दिक पांड्या आणि मुंबई इंडियन्सच्या चाहत्यांचं टेन्शन वाढू शकतं.
आयपीएलच्या गुणतालिकेत 10 संघांपैकी पहिले चार संघ प्लेऑफमध्ये प्रवेश करतात. पहिल्या दोन संघांमध्ये क्वालिफायर 1 चा सामना होतो. तर, एलिमिनेटरचा सामना तिसऱ्या आणि चौथ्या स्थानावर असलेल्या संघात होतो. एलिमिनेटरचा सामना जो संघ जिंकतो तो संघ क्वालिफायर 2 चा सामना खेळतो. क्वालिफायर 2 मधील दुसरा संघ हा पहिल्या क्वालिफायरमधील पराभूत संघ असतो. क्वालिफायर 1 आणि क्वालिफायर 2 हे सामने जिंकणारे संघ अंतिम फेरीत प्रवेश करतात. सध्या क्वालिफायर 1 मधील एक संघ निश्चित झाला आहे. पंजाब किंग्ज सध्या गुणतालिकेत पहिल्या स्थानावर आहे. गुजरात टायटन्स आणि मुंबई इंडियन्सच्या पुढं असल्यानं क्वालिफायर 1 चा सामना खेळणार हे निश्चित झालं आहे. तर, मुंबई इंडियन्स एलिमिनेटरचा सामना खेळणार आहे हे निश्चित आहे.
एलिमिनेटरमध्ये मुंबई इंडियन्स खेळणार हे निश्चित झालं आहे. दुसरा संघ कोणता असेल हे आज निश्चित होईल. मात्र, एलिमिनेटर सामना खेळणाऱ्या दोन पैकी एका संघाला सलग तीन सामने जिंकल्यास तो आयीएलचं विजेतेपद मिळवू शकतो. एलिमिनेटरचा सामना जिंकणारा संघ क्वालिफायर 2 चा सामना खेळेल. तर, एलिमिनेटरच्या लढतीत जो पराभूत होईल त्या संघाचा प्रवास समाप्त होईल.
हार्दिक पांड्याच्या नेतृत्त्वात मुंबई इंडियन्सनं आयपीएलमध्ये प्लेऑफमध्ये पहिल्यांदा प्रवेश केला आहे. रोहित शर्माच्या नेतृत्त्वात मुंबईनं पाचवेळा विजेतेपद मिळवलं आहे. तर, 10 व्यांदा प्लेऑफमध्ये प्रवेश केला आहे.रोहित शर्माच्या नेतृत्त्वात मुंबई इंडियन्सनं 2013 च्या हंगामात विजेतेपद मिळवलं होतं. 2015, 2017, 2019 आणि 2020 मध्ये विजेतेपद मिळवलं होतं. या सर्व हंगामामध्ये मुंबई इंडियन्स गुणतालिकेत टॉप 2 मध्ये होते.
मुंबई इंडियन्स पहिल्यांदा आयपीएल फायनमध्ये 2010 ला पोहोचली होती. त्यावेळी सचिन तेंडुलकरच्या नेतृत्त्वात मुंबई गुणतालिकेत पहिल्या स्थानावर होती. मात्र, चेन्नई सुपर किंग्जनं त्यांना अंतिम फेरीत पराभूत केलं. मुंबई इंडियन्सनं 2011, 2012, 2014 आणि 2023 मध्ये प्लेऑफमध्ये धडक दिली होती. मात्र, त्यावेळी मुंबई गुणतालिकेत तिसऱ्या आणि चौथ्या स्थानावर होती. मुंबई इंडियन्सला विजेतेपद मिळालं नव्हतं.
- 2011 मध्ये मुंबई इंडियन्सनं एलिमिनेटरमध्ये क्वालिफायर दोनमध्ये धडक दिली होती, त्या सामन्यात मुंबई पराभूत झाली.
- 2012 मध्ये मुंबई इंडियन्सचा एलिमिनेटरमध्ये पराभव झाला होता.
- 2014 मध्ये MI एलिमिनेटरमध्ये पराभूत झाली.
- 2023 मध्ये MI एलिमिनेटर मॅच जिंकली मात्र क्वालिफायर 2 मध्ये पराभूत झाली होती.
मुंबई इंडियन्सनं आयपीएलमध्ये चारवेळा एलिमिनेटरचे सामने खेळले. त्यात त्यांना दोन वेळा पराभव स्वीकारावा लागला, तर दोनवेळा क्वालिफायर 2 मध्ये पराभव स्वीकारावा लागला. एलिमिनेटरचा सामना 30 मे रोजी मुल्लानूपर क्रिकेट स्टेडियममध्ये खेळला जाणार आहे. मुंबई इंडियन्स सोबत कोण लढणार हे अद्याप निश्चित झालेलं नाही. लखनौ आणि आरसीबी यांच्यातील निकालानंतर हे निश्चित होईळ. आरसीबी जिंकल्यास गुजरात एलिमिनेटर खेळेल. आरसीबी पराभूत झाल्यास ते एलिमिनेटर खेळतील.
महत्त्वाच्या बातम्या
