Rishabh Pant In IPL 2024 : विस्फोटक फलंदाज ऋषभ पंत आयपीएल 2024 मधून क्रिकेटच्या मैदानात परतणार आहे. पंत पुन्हा एकदा दिल्लीच्या संघाची धुरा संभाळताना दिसेल. याबाबत दिल्ली कॅपिटल्सनेच माहिती दिली आहे. जवळपास वर्षभर क्रिकेटपासून दूर असलेला ऋषभ पंत आयपीएलच्या आगामी हंगामात दिल्ली कॅपिटल्सची जबाबदारी निश्चितपणे सांभाळेल, असे  दिल्लीच्या व्यवस्थापनाने म्हटले आहे. ऋषभ पंत याचा गेल्यावर्षी अपघात झाला होता, त्यामधून तो थोडक्यात बचावला होता. मागील वर्षभरापासून तो क्रिकेटपासून दूर होता. आता पुन्हा एकदा कमबॅक करण्यासाठी पंत तयार झालाय. 


दिल्ली कॅपिटल्सच्या व्यवस्थापनाने म्हटले आहे की, ऋषभ पंत सध्या बंगळुरू येथील एनसीए अर्थात राष्ट्रीय क्रिकेट अकादमीमध्ये फिटनेसवर काम करतोय.  फेब्रुवारीच्या अखेरीस तो पूर्ण तंदुरुस्त होईल, असा अंदाज आहे.  मात्र, त्याचा आयपीएलमधील सहभाग NCA व्यवस्थापकांच्या संमतीवरच अवलंबून आहे. त्यामुळे एनसीएमधील त्याचा रिपोर्ट कसा आहे, यावरच त्याच्या खेळण्याचा निर्णय होईल. 


विकेटकीपिंग करणार का पंत? 


मागील वर्षीच्या अखेरीस ऋषभ पंत एका भीषण कार अपघातात बळी पडला होता. या अपघातात तो थोडक्यात बचावला. त्यानंतर त्याच्या उजव्या गुडघ्यावर शस्त्रक्रिया करावी लागली. तेव्हापासून आजपर्यंत तो क्रिकेटच्या मैदानापासून दूरच आहे. गुडघ्याच्या शस्त्रक्रियेमुळे पंत भविष्यात कधीच विकेटकीपिंग करु शकणार नाही, अशी भीती आहे. कारण इतर खेळाडूंच्या तुलनेत यष्टीरक्षकांच्या गुडघ्यांवर जास्त ताण असतो.


ऋषभ पंतच्या यष्टिरक्षणाबाबत दिल्ली फ्रँचायझीने म्हटले आहे की, बीसीसीआयने हिरवा सिग्नल दिला तरच ऋषभ आयपीएलमध्ये विकेटकीपिंग करेल. अन्यथा तो फक्त फलंदाजी आणि क्षेत्ररक्षणावर लक्ष केंद्रित करेल. पंत यष्टिरक्षण करणार नसला तरी मैदानावर कर्णधार म्हणून तो नक्कीच राहील.



गेल्या हंगामात दिल्लीचा पंतची उणीव भासली - 


वर्षभरापासून ऋषभ पंत क्रिकेटच्या मैदानापासून दूर आहे. ऋषभ पंत फक्त आयपीएलला मुकला नाही तर भारतीय संघाने खेळलेल्या 62 आंतरराष्ट्रीय सामन्या केवळ प्रेक्षक म्हणून सहभागी होऊ शकला. गेल्या मोसमात पंतची अनुपस्थिती दिल्ली फ्रँचायझीला जाणवली. पंतच्या अनुपस्थितीत दिल्ली कॅपिटल्सची अवस्था बिकट झाली. गेल्या मोसमात दिल्लीचा संघ 9व्या स्थानावर होता. यंदाच्या हंगामात दिल्लीचा संघ चांगली कामगिरी करण्यासाठी मैदानात उतरेल. 


19 डिसेंबर रोजी आयपीएलचा लिलाव - 
आयपीएल 2024 (IPL) साठी लिलावाची (Player Auction) अधिकृत घोषणा करण्यात आली आहे. 19 डिसेंबर 2023 रोजी दुबाईमध्ये लिलाव पार पडणार आहे. भारतीय वेळेनुसार, दुपारी एक वाजता लिलावाला सुरुवात होणार आहे. 333 खेळाडू लिलावात नशीब अजमावणार आहेत. त्यापैकी 214 खेळाडू भारतीय आहेत तर 119 खेळाडू परदेशी (overseas players) आहेत. 


लिलावात नावं दिलेल्या 333 खेळाडूंपैकी दोन खेळाडू असोशिएट देशांचे आहेत. 116 खेळाडू आंतरराष्ट्रीय सामने खेळलेले आहेत तर 215 खेळाडू अनकॅप (uncapped players) आहेत. 23 खेळाडूंनी आपली मूळ किंमत दोन कोटी रुपये ठेवली आहे तर 13 खेळाडूंची मूळ किंमत 1.5 कोटी रुपये इतकी आहे. दहा संघामध्ये फक्त 77 खेळाडूंसाठी जागा शिल्लक आहे, त्यामध्ये 30 जागा या विदेशी खेळाडूंसाठी राखीव आहेत.