GT vs MI Eliminator : 'टाटा, बाय-बाय, खत्म...' गुजरात टायटन्सचे आव्हान संपुष्टात! एलिमिनेटरमध्ये मुंबई इंडियन्सचा 20 धावांनी विजय

GT vs MI Eliminator IPL 2025 Live Updates : मुंबई इंडियन्स आणि गुजरात टायटन्स यांच्यातील आयपीएल 2025 चा एलिमिनेटर सामना मुल्लानपूर येथे खेळवला जात आहे.

पार्श्वभूमी

Gujarat Titans vs Mumbai Indians Eliminator IPL 2025 Live Updates : मुंबई इंडियन्स आणि गुजरात टायटन्स यांच्यातील आयपीएल 2025 चा एलिमिनेटर सामना मुल्लानपूर येथे खेळवला जात आहे. दोन्ही संघ या मैदानावर आमनेसामने येण्यास सज्ज आहेत. जो संघ हरेल, त्यांचा प्रवास येथेच संपेल. त्याचबरोबर, जो संघ हा सामना जिंकेल तो क्वालिफायर 2 मध्ये पंजाब किंग्जशी सामना करेल. तिथे, जिंकणारा संघ अंतिम फेरीत रॉयल चॅलेंजर्स बंगळुरूशी सामना करेल.मुंबई इंडियन्स विरुद्धच्या सामन्यात गुजरात टायटन्सचा वरचष्मा राहिला आहे. दोन्ही संघांमध्ये आतापर्यंत एकूण 7 सामने झाले आहेत, या काळात गुजरातने सर्वाधिक सामने जिंकले आहेत. त्यांनी 7 पैकी एकूण 5 सामने जिंकले आहेत. त्याच वेळी, मुंबईने 2 सामने जिंकले आहेत. या वर्षी 2025 मध्ये देखील दोन्ही संघांमध्ये 2 सामने झाले होते, ज्यामध्ये गुजरातने मुंबई इंडियन्सचा पराभव केला होता.

30/05/2025 23:54:03

'टाटा, बाय-बाय, खत्म...' गुजरात टायटन्सचे आव्हान संपुष्टात! एलिमिनेटरमध्ये मुंबई इंडियन्सचा 20 धावांनी विजय

न्यू चंदीगड येथे खेळल्या गेलेल्या एलिमिनेटर सामन्यात मुंबई इंडियन्सने नाणेफेक जिंकून प्रथम फलंदाजी करण्याचा निर्णय घेतला आणि 20 षटकांत पाच गडी गमावून 228 धावा केल्या. प्रत्युत्तरात गुजरातला निर्धारित षटकांत सहा गडी गमावून फक्त 208 धावा करता आल्या. त्यांच्याकडून साई सुदर्शनने 80 धावा केल्या. मुंबईने हा सामना 20 धावांनी जिंकला आणि क्वालिफायर-2 मध्ये प्रवेश केला.

30/05/2025 21:33:24

रोहित अन् बेअरस्टोचे चंदीगडमध्ये वादळ! मुंबईने गुजरातला दिले 229 धावांचे लक्ष्य

रोहित शर्माच्या अर्धशतकी खेळीच्या जोरावर मुंबई इंडियन्सने गुजरात टायटन्ससमोर 229 धावांचे लक्ष्य ठेवले आहे. न्यू चंदीगड येथे खेळल्या जाणाऱ्या एलिमिनेटर सामन्यात नाणेफेक जिंकून प्रथम फलंदाजी करणाऱ्या मुंबईने 20 षटकांत पाच गडी गमावून 228 धावा केल्या. मुंबईकडून हिटमॅनने सर्वाधिक 81 धावा केल्या. त्याच वेळी गुजरातकडून प्रसिद्ध कृष्णा आणि साई किशोरने प्रत्येकी दोन विकेट घेतल्या तर मोहम्मद सिराजला एक यश मिळाले.

रोहित शर्मा आणि जॉनी बेअरस्टोच्या सलामी जोडीने मुंबईला तुफानी सुरुवात करून दिली. दोघांमध्ये पहिल्या विकेटसाठी 84 धावांची भागीदारी झाली. या सामन्यात पदार्पण करणाऱ्या बेअरस्टोला साई किशोरने जेराल्ड कोएत्झीने झेलबाद केले. तो 22 चेंडूत चार चौकार आणि तीन षटकारांच्या मदतीने 47 धावा काढल्यानंतर बाद झाला. त्यानंतर रोहितला सूर्यकुमार यादवची साथ मिळाली. दोघांनीही 34 चेंडूत 59 धावा जोडल्या. यादरम्यान सूर्यकुमारने 20 चेंडूंचा सामना केला आणि 33 धावा काढल्यानंतर पॅव्हेलियनमध्ये परतला.

या सामन्यात रोहित शर्माने 28 चेंडूंमध्ये आपले अर्धशतक पूर्ण केले. याशिवाय, त्याने आयपीएलमध्ये 300 षटकारही पूर्ण केले. तो आयपीएलमध्ये 300 षटकारांचा आकडा गाठणारा पहिला सक्रिय खेळाडू ठरला. आता त्याच्या नावावर 302* षटकार आहेत. आयपीएलमध्ये सर्वाधिक षटकार मारण्याचा विक्रम ख्रिस गेलच्या नावावर आहे. हिटमॅनने तिलक वर्मासोबत तिसऱ्या विकेटसाठी 22 चेंडूंमध्ये 43 धावा केल्या. माजी कर्णधाराने 50 चेंडूंमध्ये 9 चौकार आणि 4 षटकारांच्या मदतीने 81 धावा केल्या. त्याच वेळी, तिलक 11 चेंडूंमध्ये 25 धावा आणि नमन धीर 9 धावा काढून बाद झाला. हार्दिक पंड्या नऊ चेंडूंमध्ये तीन षटकारांच्या मदतीने 22 धावा करून नाबाद राहिला तर सँटनर खाते न उघडता नाबाद राहिला.

30/05/2025 20:19:41

मुंबईला बसला पहिला धक्का

मुंबईला पहिला धक्का जॉनी बेअरस्टोच्या रूपात बसला. साई किशोरने त्याला आऊट केले. पदार्पणाच्या सामन्यात 47 धावा करून बेअरस्टो बाद झाला. आता सूर्यकुमार यादव क्रीजवर आला आहे.

30/05/2025 20:11:54

हायव्होल्टेज सामन्यात मुंबईची तुफानी फलंदाजी, चंदीगडमध्ये रोहित शर्माचे वादळ

मुंबई इंडियन्सने पॉवरप्लेमध्ये एकही विकेट न गमावता 79 धावा केल्या आहेत. सहाव्या षटकात 14 धावा आल्या. जॉनी बेअरस्टो 17 चेंडूत 44 धावांवर आणि रोहित शर्मा 19 चेंडूत 33 धावांवर फलंदाजी करत आहे.

30/05/2025 19:10:45

गुजरात टायटन्स संघाची प्लेइंग इलेव्हन

शुभमन गिल, साई सुदर्शन, कुसल मेंडिस, शाहरुख खान, वॉशिंग्टन सुंदर, राहुल तेवतिया, रशीद खान, साई किशोर, जेराल्ड कोएत्झी, मोहम्मद सिराज, प्रसिद्ध कृष्णा.

30/05/2025 19:10:29

मुंबई इंडियन्स संघाची प्लेइंग इलेव्हन

रोहित शर्मा, जॉनी बेअरस्टो, सूर्यकुमार यादव, तिलक वर्मा, हार्दिक पांड्या, नमन धीर, राज बावा, मिचेल सँटनर, ट्रेंट बोल्ट, जसप्रीत बुमराह, रिचर्ड ग्लीसन

30/05/2025 19:07:41

कुसल मेंडिस पदार्पण करणार

श्रीलंकेचा यष्टीरक्षक फलंदाज कुसल मेंडिस गुजरात टायटन्सकडून आयपीएलमध्ये पदार्पण करत आहे. त्याला जोस बटलरच्या जागी संघात स्थान देण्यात आले आहे.

30/05/2025 19:07:13

हायव्होल्टेज सामन्यात मुंबईने नाणेफेक जिंकली!

मुंबई इंडियन्सचा कर्णधार हार्दिक पांड्याने नाणेफेक जिंकून प्रथम फलंदाजी करण्याचा निर्णय घेतला आहे. शुभमन गिलचा गुजरात टायटन्स प्रथम गोलंदाजी करेल.