भारतीय संघाला मोठा धक्का! अफगाणिस्तान विरुद्धच्या मालिकेदरम्यान स्टार खेळाडू संघाबाहेर, आशियाई क्रीडा स्पर्धेतील सहभागावरही प्रश्नचिन्ह

Ind beat Afg 2nd T20 : संजूची वादळी बॅटिंग, अफगाणिस्तानचा धुव्वा; 15 षटकांत खेळ संपवला, श्रेयसच्या नेतृत्वात टीम इंडियाचा मालिकेवर कब्जा

किरण महानवर — Tue, 15 Sep 2026 22:33:16 +0530

India beat Afghanistan 2nd T20I : दिल्लीच्या अरुण जेटली स्टेडियमवर झालेल्या दुसऱ्या टी-20 सामन्यात टीम इंडियाने अफगाणिस्तानवर दणदणीत विजय मिळवत तीन सामन्यांच्या मालिकेत 2-0 अशी विजयी आघाडी घेत मालिका खिशात घातली. श्रेयस अय्यरच्या नेतृत्वाखाली भारतीय संघाने पुन्हा एकदा आपली ताकद दाखवत अफगाणिस्तानला तब्बल 7 विकेट्सने पराभूत केलं. या सामन्यात नाणेफेक जिंकून प्रथम फलंदाजी करताना अफगाणिस्तानच्या संघाने 20 षटकांत 158 धावांचे सन्मानजनक लक्ष्य उभे केले होते. पण, धावांचा पाठलाग करताना मैदानात उतरताच संजू सॅमसनने आपल्या तुफानी फलंदाजीचा जलवा दाखवत प्रेक्षकांची मने जिंकली. त्याच्या स्फोटक अर्धशतकी खेळीच्या जोरावर भारताने अवघ्या 15 षटकांतच हे लक्ष्य गाठले.

इब्राहिम झद्रान सोडला तर सगळे अफगाणिस्तानी फलंदाज नापास

भारताने नाणेफेक जिंकून प्रथम गोलंदाजी करण्याचा निर्णय घेतला. अफगाणिस्तानच्या फलंदाजांना मोठी भागीदारी करण्यात अपयश आले. एकाही फलंदाजाला अर्धशतक झळकावता आले नाही. मात्र, मधल्या फळीतील फलंदाजांच्या छोट्या-छोट्या योगदानामुळे अफगाणिस्तानला 159 धावांपर्यंत मजल मारता आली. अफगाणिस्तानचा कर्णधार इब्राहिम झद्रान याने संघाकडून सर्वाधिक धावा केल्या. त्याने 33 चेंडूंत 6 चौकारांच्या मदतीने 37 धावा केल्या.

इब्राहिम झद्राननंतर रशीद खानने 28, दरविश रसूलीने 26 आणि मोहम्मद नबीने 20 धावांचे योगदान दिले. सेदिकुल्ला अटलने 12, अझमतुल्ला ओमरझाईने 11 आणि गुलबदिन नायबने 10 धावा केल्या. नूर अहमद 7 धावांवर नाबाद राहिला, तर मुजीब उर रहमानने नाबाद 4 धावा केल्या. भारताकडून नितीश कुमार रेड्डीने सर्वाधिक 3 विकेट घेतल्या, तर अर्शदीप सिंगने 2 फलंदाजांना माघारी धाडले. जसप्रीत बुमराह, अक्षर पटेल आणि रवी बिश्नोई यांनी प्रत्येकी एक विकेट घेतली.

संजूची वादळी बॅटिंग, अफगाणिस्तानचा धुव्वा

160 धावांच्या लक्ष्याचा पाठलाग करताना भारतीय संघाने पॉवरप्लेमध्येच सामना एकतर्फी केला. भारताने पहिल्या सहा षटकांत एकही गडी न गमावता तब्बल 82 धावा केल्या. भारतीय फलंदाजांना रोखण्यासाठी अफगाणिस्तानने दोन्ही बाजूंनी फिरकी गोलंदाजांना आक्रमणावर आणले. मात्र, सॅमसन आणि अभिषेक शर्माच्या आक्रमक फलंदाजीसमोर त्यांचा काहीच निभाव लागला नाही. संजू सॅमसनने अवघ्या 22 चेंडूंत 7 चौकार आणि 4 षटकारांच्या मदतीने 57 धावांची तुफानी खेळी केली. तर अभिषेक शर्माने 19 चेंडूंत 2 चौकार आणि 4 षटकारांसह 39 धावा ठोकल्या. या दोघांच्या धडाकेबाज सुरुवातीमुळे भारताचा विजय जवळपास निश्चित झाला. अखेर भारतीय संघाने 14.5 षटकांत 3 गडी गमावून 160 धावांचे लक्ष्य सहज पार करत शानदार विजय मिळवला.

हे ही वाचा -

Sofia Hayat on Rohit Sharma : रोहित शर्माला डेट केलं, पण... अभिनेत्रीने बेडरूम सीक्रेट सांगत केले बोल्ड वक्तव्य; क्रिकेटविश्वात खळबळ, नेमकं काय म्हणाली?

Sofia Hayat on Rohit Sharma : रोहित शर्माला डेट केलं, पण... अभिनेत्रीने बेडरूम सीक्रेट सांगत केले बोल्ड वक्तव्य; क्रिकेटविश्वात खळबळ, नेमकं काय म्हणाली?

एबीपी माझा वेब टीम — Tue, 15 Sep 2026 21:42:23 +0530

Sofia Hayat on Rohit Sharma : भारताचा स्टार क्रिकेटपटू आणि माजी कर्णधार रोहित शर्मा याचं नाव काही वर्षांपूर्वी अभिनेत्री आणि गायिका सोफिया हयात हिच्यासोबत जोडलं गेलं होतं. आता सोफियाने पुन्हा एकदा रोहितसोबतच्या कथित नात्याबाबत धक्कादायक दावे केले आहेत. नुकत्याच एका पॉडकास्टमध्ये बोलताना तिने त्यांच्या नात्यापासून ते ब्रेकअपपर्यंत अनेक गोष्टींचा खुलासा केला. सोफियाने केलेल्या एका बोल्ड वक्तव्यामुळे सोशल मीडियावरही चर्चा रंगली आहे. मात्र, रोहित शर्माने या दाव्यांवर अजून तरी कधीही प्रतिक्रिया दिलेली नाही.

‘मी रोहित शर्माला डेट केलं होतं...’

स्ट्रेट टॉक क्वेयर विस्डम पॉडकास्टमध्ये सोफियाने आपल्या जुन्या आयुष्याबद्दल बोलताना रोहित शर्माचा उल्लेख केला. क्रिकेटबद्दल आपल्याला फारशी माहिती नव्हती, असं तिने सांगितलं. तिच्या म्हणण्यानुसार, तिच्या मॅनेजरमुळे तिचा क्रिकेटशी संबंध आला. त्यावेळी प्रसिद्धी मिळवण्यासाठी आपण काही खोट्या गोष्टीही सांगितल्या, असा दावा तिने केला. याचदरम्यान आपण रोहित शर्माला डेट केल्याचंही सोफियाने सांगितलं. रोहितबद्दल बोलताना तिने अत्यंत वैयक्तिक आणि बोल्ड टिप्पणी केली. तिच्या दाव्यानुसार, रोहितसोबतचा तिचा बेडवर अनुभव चांगला नव्हता. मात्र हे सर्व दावे केवळ सोफिया हयातच्या बाजूने करण्यात आले असून, त्याची स्वतंत्र पुष्टी झालेली नाही.

2012 मध्ये सुरू झालं होतं कथित नातं

सोफियाने याआधीही रोहितसोबतच्या कथित रिलेशनशिपबाबत वक्तव्य केलं आहे. तिच्या जुन्या दाव्यानुसार, 2012 मध्ये दोघांनी डेटिंग सुरू केली होती आणि हे नातं जवळपास वर्षभर टिकले. मात्र, एका मुद्द्यावरून दोघांमध्ये दुरावा निर्माण झाल्याचं सोफियाने सांगितलं होतं. रोहितने माध्यमांसमोर तिला केवळ फॅन म्हटल्याने ती नाराज झाली होती. त्यानंतर तिने रोहितला सर्वत्र ब्लॉक केलं आणि त्यांचं कथित नातं संपुष्टात आलं, असा दावा तिने केला होता.

रोहितने 2015 मध्ये रितिकासोबत केलं लग्न

दरम्यान, रोहित शर्माने 2015 मध्ये त्याची मॅनेजर रितिका सजदेह हिच्यासोबत लग्न केलं. 2018 मध्ये दोघांना कन्यारत्न झालं. त्यांच्या मुलीचं नाव समायरा आहे. 2024 मध्ये रोहित आणि रितिका दुसऱ्यांदा पालक झाले. रोहित सध्या आंतरराष्ट्रीय क्रिकेटमध्ये केवळ वनडे फॉरमॅटमध्ये खेळताना दिसतो. तसेच तो लवकरच एका टीव्ही शोच्या माध्यमातून नव्या भूमिकेत प्रेक्षकांसमोर येणार आहे.

I was Rohits first. Someone needs to teach men how to be sensual in bed. It is not a sprint. Watch this and other secrets of my sex life on my new show, Straight Talk Queer Wisdom. Link in bio. #rohitsharma pic.twitter.com/cR7TOUvrZb
— Sofia Hayat (@sofiahayat) September 14, 2026

हे ही वाचा -

India Squad For West Indies ODI Series : वेस्ट इंडिजविरुद्ध टीम इंडियाचा चेहरामोहरा बदलणार; अर्ध्या संघाला डच्चू, कोणाला मिळणार संधी? नावाची लिस्ट आली समोर

India Squad For West Indies ODI Series : वेस्ट इंडिजविरुद्ध टीम इंडियाचा चेहरामोहरा बदलणार; अर्ध्या संघाला डच्चू, कोणाला मिळणार संधी? नावाची लिस्ट आली समोर

किरण महानवर — Tue, 15 Sep 2026 20:56:59 +0530

India Squad For West Indies ODI Series : वेस्ट इंडिजविरुद्ध होणाऱ्या तीन सामन्यांच्या वनडे मालिकेसाठी भारतीय संघाची निवड बुधवारी (16 सप्टेंबर) होणार आहे. भारतीय क्रिकेट नियामक मंडळच्या निवड समितीसमोर संघ निवडताना अनेक महत्त्वाचे प्रश्न असणार आहेत. ऋषभ पंत आणि हार्दिक पांड्या यांचे पुनरागमन, तसेच आशियाई क्रीडा स्पर्धेमुळे काही प्रमुख खेळाडूंची अनुपलब्धता यामुळे वनडे संघात मोठे बदल पाहायला मिळू शकतात. भारत आणि वेस्ट इंडिज यांच्यात तीन वनडे आणि पाच टी-20 सामन्यांची मालिका होणार आहे. टी-20 मालिकेला 6 ऑक्टोबरपासून सुरुवात होणार असून, आशियाई क्रीडा स्पर्धेसाठी निवडलेल्या संघातील बहुतांश खेळाडूंनाच या मालिकेतही संधी मिळण्याची शक्यता आहे. मात्र, 50 षटकांच्या क्रिकेटसाठी संघ निवडताना निवड समितीची चांगलीच कसोटी लागणार आहे.

हार्दिक पांड्याचे पुनरागमन?

हार्दिक पांड्या स्पर्धात्मक क्रिकेटमध्ये 20 सप्टेंबरला पुनरागमन करण्याची शक्यता आहे. ऑस्ट्रेलिया अ विरुद्ध भारत अच्या तीन सामन्यांच्या वनडे मालिकेसाठी त्याची निवड आधीच झाली आहे. वेस्ट इंडिजविरुद्धची वनडे मालिका 27 सप्टेंबरपासून तिरुवनंतपुरम येथे सुरू होणार आहे. त्यामुळे पांड्या 50 षटके क्षेत्ररक्षण करण्यास आणि 10 षटके गोलंदाजी करण्यास पूर्णपणे तयार आहे का, याचा विचार निवडकर्त्यांना करावा लागेल. हार्दिक पांड्या उपलब्ध नसल्यास भारतासाठी वेगवान गोलंदाजी करणाऱ्या अष्टपैलू खेळाडूंची कमतरता जाणवू शकते. नीतीश कुमार रेड्डी आशियाई क्रीडा स्पर्धेसाठी जपानमध्ये असणार आहेत. तर सूर्यांश शेडगे आणि वेंकटेश अय्यर दुखापतीमुळे सध्या उपलब्ध नाहीत. त्यामुळे पांड्याचे फिटनेस आणि उपलब्धता हे वनडे संघ निवडीतील सर्वात महत्त्वाचे मुद्दे ठरू शकतात.

पंत की जुरेल? राहुलची उपकर्णधारपदावर वर्णी?

ऋषभ पंतला वनडे संघात स्थान मिळण्याची शक्यता निर्माण झाली आहे. ईशान किशन आशियाई क्रीडा स्पर्धेसाठी उपलब्ध नसल्याने पंतच्या नावाचा विचार होऊ शकतो. मात्र, पंतचा संघात समावेश झाला तरी केएल राहुलच पहिली पसंतीचा यष्टिरक्षक राहण्याची शक्यता आहे. श्रेयस अय्यर आशियाई क्रीडा स्पर्धेत असल्याने राहुलकडे वनडे संघाच्या उपकर्णधारपदाची जबाबदारीही दिली जाऊ शकते. पंतला संधी मिळाली नाही, तर ध्रुव जुरेलचा पर्याय निवड समितीसमोर असेल. पंतला इराणी कपमध्ये शेष भारताचे नेतृत्व करण्याची जबाबदारी दिली जाऊ शकते.

गायकवाडला मोठी संधी, जैस्वाल-पाटीदारही शर्यतीत

श्रेयस अय्यरच्या अनुपस्थितीत ऋतुराज गायकवाडला वनडे संघात महत्त्वाची संधी मिळू शकते. शुभमन गिल, रोहित शर्मा आणि विराट कोहलीनंतर चौथ्या क्रमांकाच्या फलंदाजीसाठी गायकवाडचा विचार होऊ शकतो. यशस्वी जैस्वालला राखीव सलामीवीर म्हणून, तर रजत पाटीदारला मधल्या फळीतील राखीव फलंदाज म्हणून संघात स्थान मिळण्याची शक्यता आहे. वेस्ट इंडिजविरुद्धच्या मालिकेनंतर गायकवाड आणि पाटीदार भारत 'ए'कडूनही खेळू शकतात. गायकवाडकडे भारत 'ए'च्या नेतृत्वाची जबाबदारी सोपवली जाण्याची शक्यता आहे.

जडेजा की मानव सुथार?

इंग्लंडविरुद्धच्या वनडे मालिकेत स्थान न मिळालेल्या रविंद्र जडेजाचे पुनरागमन होऊ शकते. दुलीप ट्रॉफीच्या उपांत्य सामन्यात हर्ष दुबे दुखापतग्रस्त झाल्याने डावखुऱ्या फिरकीपटूंच्या पर्यायांमध्ये बदल करावा लागू शकतो. हर्ष दुबे आणि अक्षर पटेल हे डावखुरे फिरकी अष्टपैलू म्हणून विचारात होते. मात्र, त्यांच्या अनुपस्थितीत जडेजाला पुन्हा संधी मिळू शकते. मानव सुथारच्या नावाचाही विचार केला जाऊ शकतो.

अक्षर पटेल आशियाई क्रीडा स्पर्धेत खेळणार आहेत. दुसरीकडे वरुण चक्रवर्ती दुखापतीमुळे आशियाई स्पर्धेत सहभागी होऊ शकला नाही आणि कुलदीप यादवला वनडे संघात स्थान मिळाले, तर कलाईच्या फिरकीपटूचा आणखी एक पर्याय निवडावा लागू शकतो. अशा परिस्थितीत विपराज निगम किंवा जीशान अन्सारी यांच्यापैकी एकाला संधी मिळण्याची शक्यता आहे.

सिराजचेही पुनरागमन?

मोहम्मद सिराज इंग्लंडविरुद्धच्या वनडे मालिकेत भारतीय संघाचा भाग नव्हता. मात्र, वेस्ट इंडिजविरुद्ध त्याचे पुनरागमन होण्याची शक्यता आहे. वेगवान गोलंदाजी विभागात गुरनूर बरार, प्रसिद्ध कृष्णा आणि प्रिन्स यादव यांचा मागील मालिकेसाठी संघात समावेश होता. जसप्रीत बुमराह मात्र आशियाई क्रीडा स्पर्धेत व्यस्त असल्याने या मालिकेसाठी उपलब्ध नसेल.

हे ही वाचा -

अफगाणिस्तानविरुद्ध टीम इंडिया जिंकली नाणेफेक, संघात मोठा बदल; वैभव सूर्यवंशी बाहेरच, मग Playing-11मध्ये कोणाची एन्ट्री?

Zimbabwe Brendan Taylor News : झिम्बाब्वेच्या पठ्ठ्याने क्रिकेटचा इतिहास-भूगोलच बदलून टाकला! मोडले वयाचे सारे विक्रम, सचिन तेंडुलकरला टाकले मागे

किरण महानवर — Tue, 15 Sep 2026 18:59:52 +0530

Zimbabwe Brendan Taylor News : झिम्बाब्वे आणि ऑस्ट्रेलिया यांच्यात तीन सामन्यांची एकदिवसीय मालिका सुरू झाली आहे. मालिकेतील पहिला सामना मंगळवारी (15 सप्टेंबर) हरारे स्पोर्ट्स कॉम्प्लेक्समध्ये खेळला जात आहे. या सामन्यात क्रिकेटच्या इतिहासात यापूर्वी कधीही न पाहिलेला विक्रम पाहायला मिळाला आहे. झिम्बाब्वेच्या प्लेइंग इलेव्हनमध्ये तब्बल 40 वर्षांपेक्षा जास्त वयाचे तीन खेळाडू मैदानात उतरले आहेत. एका पूर्ण सदस्य देशाच्या संघाने एकदिवसीय सामन्याच्या प्लेइंग इलेव्हनमध्ये 40 वर्षांपेक्षा जास्त वयाच्या तीन खेळाडूंना स्थान देण्याची ही पहिलीच वेळ आहे.

या ऐतिहासिक प्लेइंग इलेव्हनमध्ये क्रेग एर्विन (41 वर्षे 27 दिवस), ब्रेंडन टेलर (40 वर्षे 221 दिवस) आणि सिकंदर रझा (40 वर्षे 144 दिवस) यांचा समावेश आहे. क्रिकेटमध्ये अनेक खेळाडू चाळीशीपूर्वीच निवृत्ती घेतात. मात्र, या तिन्ही अनुभवी खेळाडूंनी आंतरराष्ट्रीय क्रिकेटमध्ये आपली कारकीर्द कायम ठेवत वय हा केवळ एक आकडा असल्याचे पुन्हा एकदा दाखवून दिले आहे.

ब्रेंडन टेलरने सचिन तेंडुलकरचा विक्रम मोडला

या सामन्यात मैदानात उतरताच यष्टीरक्षक-फलंदाज ब्रेंडन टेलरने सचिन तेंडुलकरचा मोठा विक्रम मोडला. टेलर आता सर्वाधिक काळ एकदिवसीय क्रिकेट खेळणारा क्रिकेटपटू ठरला आहे. सचिन तेंडुलकरची एकदिवसीय कारकीर्द तब्बल 22 वर्षे आणि 3 महिने होती. तर ब्रेंडन टेलरची ODI कारकीर्द आता 22 वर्षे आणि 4 महिने इतकी झाली आहे. त्यामुळे त्याने मास्टर ब्लास्टरचा हा विक्रम आपल्या नावावर केला आहे.

WHAT A CATCH BY 40-YEAR-OLD BRENDON TAYLOR 🤯 pic.twitter.com/6FrbGzOLTB
— Johns. (@CricCrazyJohns) September 15, 2026

ऑस्ट्रेलियाची 294 धावांची मजल

दरम्यान, नाणेफेक जिंकून प्रथम फलंदाजी करण्याचा निर्णय घेतलेल्या ऑस्ट्रेलियाने निर्धारित 50 षटकांत 8 गडी गमावून 294 धावा केल्या. ऑस्ट्रेलियाकडून सहाव्या क्रमांकावर फलंदाजीला आलेल्या मॅट रेनशॉने शानदार शतक झळकावले. त्याने 94 चेंडूंचा सामना करत 7 चौकार आणि 3 षटकारांच्या मदतीने 109 धावांची खेळी केली. त्याचा स्ट्राईक रेट 115.96 इतका राहिला. तर तिसऱ्या क्रमांकावर फलंदाजी करणाऱ्या कूपर कॉनॉलीने 46 चेंडूंमध्ये 4 चौकार आणि 3 षटकारांसह 51 धावा केल्या.

झिम्बाब्वेकडून न्यूमन न्यामहुरीने सर्वाधिक 5 विकेट्स घेतल्या. त्याला ब्रॅड इव्हान्सने 2 विकेट्स घेत साथ दिली, तर कर्णधार सिकंदर रझाने एक विकेट मिळवली. या सामन्यामुळे झिम्बाब्वेने केवळ ऑस्ट्रेलियाविरुद्धच्या मालिकेची सुरुवात केली नाही, तर क्रिकेटच्या इतिहासात एक अनोखा वयाचा विक्रमही आपल्या नावावर केला आहे.

हे ही वाचा -

Ind vs Afg 2nd T20 Live : दुसऱ्या टी-20चा काउंटडाऊन सुरू! टॉसला काही मिनिटं बाकी, भारत-अफगाणिस्तान सामना Free कुठे बघणार? जाणून घ्या LIVE अपडेट

Ind vs Afg 2nd T20 Live : दिल्लीत श्रेयसच्या सेनेचा धुमाकूळ; 5 षटके आधीच ठोकला विजय, अफगाणिस्तानला लोळवत भारताने कोरले मालिकेवर नाव

किरण महानवर — Tue, 15 Sep 2026 18:39:00 +0530

Afghanistan vs India 2nd T20I Live Update In Marathi : भारत आणि अफगाणिस्तान यांच्यातील दुसरा टी-20 सामना आज दिल्लीतील अरुण जेटली स्टेडियमवर खेळला जाईल. सामना भारतीय प्रमाणवेळेनुसार सायंकाळी 7:30 वाजता सुरू होईल. दोन्ही संघांचे कर्णधार सायंकाळी 7 वाजता नाणेफेकीसाठी मैदानात उतरतील. पहिल्या टी-20 सामन्यात भारताने अफगाणिस्तानचा 7 गडी राखून पराभव केला होता. अभिषेक शर्माने धमाकेदार खेळी केली होती.

वैभव सूर्यवंशी खेळणार का?

मागील सामन्यात भारतीय संघाने संजू सॅमसनला संधी दिली होती. मात्र, तो फक्त 10 धावा करून पॅव्हेलियनमध्ये परतला. प्रश्न असा आहे की, आज वैभव सूर्यवंशीला संधी मिळेल की भारतीय संघ संजूलाच कायम ठेवेल. संभाव्य प्लेइंग इलेव्हनमध्ये वैभवचा सहभाग अनिश्चित असून, संजूला पसंती देण्यात आली आहे.

Imran Khan News : इम्रान खानला वाचवण्यासाठी क्रिकेटविश्व एकवटलं; 7 ऑस्ट्रेलियन कर्णधारांनी उचललं मोठं पाऊल

किरण महानवर — Tue, 15 Sep 2026 17:14:03 +0530

Imran Khan finds support from Australia : पाकिस्तान क्रिकेट संघाचे माजी कर्णधार आणि देशाला पहिला वनडे वर्ल्ड कप जिंकून देणारे इम्रान खान सध्या तुरुंगात आहेत. तुरुंगातील त्यांची प्रकृती चिंताजनक असल्याच्या बातम्या समोर आल्यानंतर क्रिकेट विश्वातून त्यांच्या समर्थनार्थ आवाज उठू लागला आहे. आता ऑस्ट्रेलियाच्या तब्बल सात माजी कर्णधारांनी इम्रान खान यांच्या मदतीसाठी पुढाकार घेतला आहे. ऑस्ट्रेलियाच्या सात माजी कर्णधारांनी आपल्या देशाच्या परराष्ट्रमंत्री पेनी वोंग यांना पत्र लिहून इम्रान खान यांच्या प्रकरणात हस्तक्षेप करण्याची मागणी केली आहे. तुरुंगातील त्यांच्या कथित खराब प्रकृतीबाबत या माजी कर्णधारांनी चिंता व्यक्त केली आहे.

इम्रान खान यांच्या सुटकेसाठी 7 ऑस्ट्रेलियन कर्णधार मैदानात (Imran Khan finds support from Australia)

या पत्रावर ऑस्ट्रेलियाचे माजी कर्णधार आणि भारतीय संघाचे माजी प्रशिक्षक ग्रेग चॅपेल यांच्यासह ॲलन बॉर्डर, इयान चॅपेल, किम ह्यूज, मार्क टेलर, स्टीव्ह वॉ आणि ऑस्ट्रेलियाच्या महिला संघाची माजी कर्णधार बेलिंडा क्लार्क यांच्या स्वाक्षऱ्या आहेत. ग्रेग चॅपेल यांनी परराष्ट्रमंत्री पेनी वोंग यांची भेट घेण्याची इच्छाही व्यक्त केली आहे. त्यांनी इम्रान खान यांना अखेरचे 2022 मध्ये इस्लामाबादमध्ये भेटले होते. त्यावेळी इम्रान खान पाकिस्तानचे पंतप्रधान होते.

या पत्रात माजी कर्णधारांनी म्हटले आहे की, इम्रान खान यांच्या सध्याच्या प्रकृतीबाबत समोर येणाऱ्या बातम्यांवर विश्वास ठेवणे कठीण आहे. राजकीय व्यक्ती किंवा राजनैतिक प्रतिनिधी म्हणून नव्हे, तर ऑस्ट्रेलियाचे माजी क्रिकेट कर्णधार म्हणून या प्रकरणात आवाज उठवणे आवश्यक असल्याचे त्यांनी म्हटले आहे.

'इम्रान खान यांचा तुरुंगात मृत्यू होण्याची भीती'

ग्रेग चॅपेल यांनी इम्रान खान यांच्या जीविताबाबत गंभीर चिंता व्यक्त केली आहे. हिंदुस्तान टाइम्स डिजिटलशी बोलताना त्यांनी, "आम्हाला चिंता आहे की त्यांचा तुरुंगात मृत्यू होऊ शकतो," अशी भीती व्यक्त केली. इम्रान खान सध्या रावळपिंडीतील अदियाला तुरुंगात बंद आहेत. भ्रष्टाचाराच्या आरोपांप्रकरणी त्यांना तुरुंगवास भोगावा लागत आहे. दरम्यान, इम्रान खान यांच्या मुलांनीही नुकतीच स्काय स्पोर्ट्सला मुलाखत देत त्यांच्या वडिलांना तुरुंगात मारण्याचा कट रचला जात असल्याचा दावा केला होता.

हे ही वाचा -

India Squad For West Indies ODI Series : रोहित शर्मा OUT की IN... अजित आगरकरांच्या बैठकीत होणार फैसला, वेस्ट इंडिजविरुद्ध 'या' दिवशी होणार टीम इंडियाची घोषणा

India Squad For West Indies ODI Series : रोहित शर्मा OUT की IN... अजित आगरकरांच्या बैठकीत होणार फैसला, वेस्ट इंडिजविरुद्ध 'या' दिवशी होणार टीम इंडियाची घोषणा

किरण महानवर — Tue, 15 Sep 2026 16:31:37 +0530

India Squad For West Indies ODI Series Update : वेस्ट इंडिजविरुद्ध भारताला तीन सामन्यांची वनडे मालिका खेळायची आहे. या मालिकेला 27 सप्टेंबरपासून सुरुवात होणार असून, त्यासाठी भारतीय संघाची निवड 16 सप्टेंबरला होण्याची शक्यता आहे. या निवड बैठकीत सर्वांच्या नजरा रोहित शर्मा आणि हार्दिक पांड्या दोन मोठ्या नावांवर असतील. विशेष म्हणजे 2027 मध्ये दक्षिण आफ्रिकेत होणाऱ्या वनडे विश्वचषकासाठी आता फारसा वेळ शिल्लक नाही. त्यामुळे वेस्ट इंडिजविरुद्धच्या मालिकेसाठी रोहित शर्माची निवड होते की नाही, यावर त्याच्या वनडे कारकिर्दीबाबत मोठे संकेत मिळू शकतात.

रोहित शर्माचं काय होणार?

रोहित शर्माने आगामी वनडे विश्वचषक खेळण्याची इच्छा यापूर्वीच स्पष्ट केली आहे. मात्र, निवड समिती रोहितकडे कोणत्या दृष्टिकोनातून पाहते, हा सध्या मोठा प्रश्न आहे. इंग्लंड दौऱ्यादरम्यान रोहित शर्माला भारतीय संघात ठेवण्याबाबत निवडकर्ते उत्सुक नसल्याची चर्चा रंगली होती. मात्र, बीसीसीआयचे सचिव देवजीत सैकिया यांनी त्यावेळी या वृत्तांचे खंडन केले होते. लॉर्ड्स वनडे सामन्यानंतर रोहित शर्मा वनडे क्रिकेटमधून निवृत्ती घेणार असल्याच्या चर्चांनाही उधाण आलं होतं. मात्र, रोहितने या सामन्यात शानदार शतक झळकावत या चर्चांना पूर्णविराम दिला. त्याने निवृत्तीची कोणतीही घोषणा केलेली नाही. आता वेस्ट इंडिजविरुद्धच्या वनडे मालिकेसाठी रोहित शर्माची निवड झाली, तर मुख्य निवडकर्ता अजित आगरकर आणि निवड समितीचा रोहितबाबतचा दृष्टिकोन बराच स्पष्ट होईल. रोहितची निवड झाल्यास 2027 च्या वनडे विश्वचषकासाठी त्याचा दावा आणखी मजबूत होऊ शकतो.

हार्दिक पांड्याच्या फिटनेसकडेही लक्ष

रोहित शर्मासोबतच हार्दिक पांड्याच्या निवडीवरही निवड समितीसमोर मोठा प्रश्न असणार आहे. हार्दिक अद्याप पूर्णपणे फिट झालेला नाही. मात्र, पुढील आठवड्यापर्यंत तो फिट घोषित होण्याची शक्यता आहे. हार्दिकच्या बाबतीत निवड समिती घाई करण्याची शक्यता कमी आहे. कारण 2027 च्या वनडे विश्वचषकासाठी हार्दिक हा टीम इंडियासाठी महत्त्वाचा खेळाडू मानला जातो. त्याच्यासारखा प्रभावी अष्टपैलू पर्याय सध्या भारतीय संघाकडे दिसत नाही. नीतीश कुमार रेड्डी हा पर्याय असला तरी त्याच्या फिटनेसच्या समस्या कायम आहेत. तर शिवम दुबेची कामगिरी चांगली असली तरी हार्दिक पंड्याच्या पातळीचा पर्याय म्हणून त्याच्याकडे पाहिलं जात नाही. दरम्यान, नीतीश कुमार रेड्डी, वॉशिंग्टन सुंदर आणि शिवम दुबे हे आशियाई क्रीडा स्पर्धेसाठी जपानला जाणार आहेत. त्यामुळे वेस्ट इंडिजविरुद्धच्या वनडे मालिकेसाठी अष्टपैलूंच्या पर्यायांमध्ये कोणाला संधी मिळणार, याकडेही लक्ष असेल.

कुलदीप, चहल आणि कृणाल पांड्याचं काय?

निवड समितीच्या बैठकीत आणखी काही खेळाडूंच्या नावांवरही चर्चा होण्याची शक्यता आहे. यामध्ये कुलदीप यादव, युजवेंद्र चहल आणि कृणाल पांड्या यांचा समावेश आहे. कुलदीप यादव आणि युजवेंद्र चहल यांनी इंग्लंड दौऱ्यात चांगली कामगिरी केली होती. त्यामुळे वेस्ट इंडिजविरुद्धच्या वनडे मालिकेसाठी या दोघांना स्थान मिळणार का, हे पाहणं महत्त्वाचं ठरणार आहे. एकीकडे 2027 च्या विश्वचषकासाठी संघाची तयारी सुरू आहे, तर दुसरीकडे अनुभवी खेळाडूंना आणखी संधी द्यायची की युवा खेळाडूंना प्राधान्य द्यायचं, याबाबत निवड समितीला निर्णय घ्यावा लागणार आहे.

हे ही वाचा -

IND vs AFG 2nd T20I : वरुण आणि संजू OUT, वैभव IN; अफगाणिस्तानविरुद्ध दुसऱ्या टी-20 सामन्यात अशी असेल टीम इंडियाची प्लेइंग-11

IND vs AFG 2nd T20I : वरुण आणि संजू OUT, वैभव IN; अफगाणिस्तानविरुद्ध दुसऱ्या टी-20 सामन्यात अशी असेल टीम इंडियाची प्लेइंग-11

किरण महानवर — Tue, 15 Sep 2026 15:34:20 +0530

Team India playing 11 vs Afghanistan 2nd T20I : भारत आणि अफगाणिस्तान यांच्यातील तीन सामन्यांच्या टी-20 मालिकेतील दुसरा सामना मंगळवारी (15 सप्टेंबर) दिल्लीतील अरुण जेटली स्टेडियमवर खेळवला जाणार आहे. पहिल्या सामन्यात विजय मिळवल्यानंतर भारतीय संघाची नजर आता मालिकेत 2-0अशी विजयी आघाडी घेण्यावर असेल. मात्र, दुसऱ्या सामन्यापूर्वी टीम इंडियाच्या प्लेइंग-11 मध्ये दोन महत्त्वाचे बदल होण्याची शक्यता आहे. श्रेयस अय्यरच्या नेतृत्वाखालील टीम इंडियाला या सामन्यात वरुण चक्रवर्ती आणि संजू सॅमसन यांच्याशिवाय मैदानात उतरावे लागू शकते. वरुण दुखापतीमुळे मालिकेतील उर्वरित दोन सामन्यांमधून बाहेर झाला आहे. त्यामुळे त्याच्या जागी रवी बिश्नोई किंवा वॉशिंग्टन सुंदर यापैकी एकाला संधी मिळू शकते.

वरुण चक्रवर्ती मालिकेतून OUT

वरुण चक्रवर्तीबाबत बीसीसीआयकडून अद्याप अधिकृत माहिती समोर आलेली नसली, तरी वृत्तसंस्था पीटीआयच्या माहितीनुसार दुखापतीमुळे तो मालिकेतील उर्वरित दोन सामन्यांना मुकणार आहे. त्यामुळे दुसऱ्या टी-20मध्ये त्याचा प्लेइंग-11 मध्ये समावेश होणार नाही, हे जवळपास निश्चित मानले जात आहे. वरुणच्या जागी रवी बिश्नोईला संधी मिळण्याची शक्यता अधिक आहे. मात्र, वॉशिंग्टन सुंदर हा देखील संघासमोरचा पर्याय आहे. सुंदरला संधी मिळाल्यास भारतीय संघाची फलंदाजी आणखी मजबूत होऊ शकते.

संजू सॅमसनलाही बसणार डच्चू?

पहिल्या टी-20 सामन्यात संजू सॅमसनला सलामीला पाठवण्यात आले होते. मात्र, त्याला आपल्या फलंदाजीची छाप पाडता आली नाही. संजूने 8 चेंडूंचा सामना करत दोन चौकारांच्या मदतीने फक्त 10 धावा केल्या. त्यामुळे दुसऱ्या सामन्यात त्याला प्लेइंग-11 मधून वगळण्याची शक्यता आहे. संजूच्या जागी अवघ्या 15 वर्षांच्या वैभव सूर्यवंशीला संधी मिळू शकते. पहिल्या टी-20मध्ये वैभवला अंतिम 11 मध्ये स्थान मिळाले नव्हते. त्यामुळे दिल्लीतील दुसऱ्या सामन्यात त्याला आंतरराष्ट्रीय क्रिकेटमध्ये भारताकडून मायदेशात पदार्पण करताना पाहण्यासाठी चाहत्यांमध्ये उत्सुकता आहे. वैभवने आंतरराष्ट्रीय क्रिकेटमध्ये पदार्पण केले असले तरी भारतात त्याचा अद्याप एकही आंतरराष्ट्रीय सामना झालेला नाही. त्यामुळे दिल्लीतील सामना त्याच्यासाठी खास ठरू शकतो.

अफगाणिस्तानविरुद्धच्या दुसऱ्या टी-20 साठी भारताच्या प्लेइंग-11 : वैभव सूर्यवंशी, अभिषेक शर्मा, इशान किशन, श्रेयस अय्यर, तिलक वर्मा, नितीश कुमार रेड्डी, शिवम दुबे, अक्षर पटेल, अर्शदीप सिंग, जसप्रीत बुमराह आणि रवी बिश्नोई/वॉशिंग्टन सुंदर.

हे ही वाचा -

Indian Ahletes Japan Visa Delays : ऐन आशियाई गेम्सच्या तोंडावर मोठी अडचण! 5 भारतीय खेळाडूंना जपानचा व्हिसा मिळेना

Indian Athletes Japan Visa Delays : ऐन आशियाई गेम्सच्या तोंडावर मोठी अडचण! 5 भारतीय खेळाडूंना जपानचा व्हिसा मिळेना

किरण महानवर — Tue, 15 Sep 2026 15:05:51 +0530

Indian Athletes Japan Visa Delays : आशियाई क्रीडा स्पर्धा 2026चं काउंटडाऊन सुरू झालं असून, भारताच्या 207 सदस्यीय पथकाची तयारी अंतिम टप्प्यात पोहोचली आहे. 2022 मधील कामगिरीपेक्षा यंदा सरस कामगिरी करण्याचं भारताचं लक्ष्य आहे. मात्र, स्पर्धा सुरू होण्याआधीच भारतीय टीमसमोर मोठी अडचण उभी राहिली आहे. भारताच्या सर्वात मोठ्या अॅथलेटिक्स पथकातील 4 ते 5 खेळाडूंना अद्याप जपानचा व्हिसा मिळालेला नाही. पीटीआयच्या वृत्तानुसार, भारताचे काही अॅथलीट टोकियोजवळील सुकुबा युनिव्हर्सिटीमध्ये आयोजित करण्यात आलेल्या अॅक्लिमेटायझेशन कॅम्पसाठी जपानमध्ये पोहोचले आहेत. नव्या वातावरणाशी जुळवून घेण्यासाठी हा कॅम्प आयोजित करण्यात आला आहे. मात्र, काही खेळाडूंच्या व्हिसाला अद्याप मंजुरी न मिळाल्याने त्यांच्या तयारीवर परिणाम होण्याची शक्यता आहे.

व्हिसाच्या अडचणीमागे नेमकं कारण काय?

अधिकृत सूत्रांच्या हवाल्याने दिलेल्या माहितीनुसार, व्हिसा आणि पासपोर्ट प्रशासनाचं काम पाहणाऱ्या आउटसोर्सिंग कंपनी VFSने अर्जदारांनी ज्या ठिकाणी त्यांचा पासपोर्ट जारी झाला आहे. त्याच ठिकाणी व्हिसासाठी अर्ज करावा, असा आग्रह धरला आहे. त्यामुळे काही भारतीय खेळाडूंच्या व्हिसा प्रक्रियेला विलंब होत आहे. दरम्यान, अॅथलेटिक्स फेडरेशन ऑफ इंडियाला (AFI) हा प्रश्न लवकरच मार्गी लागेल, अशी अपेक्षा आहे. गरज पडल्यास फेडरेशन सरकारची मदतही घेऊ शकते.

अॅक्लिमेटायझेशन कॅम्पचा फटका बसण्याची शक्यता

व्हिसा मिळण्यास उशीर झालेल्या खेळाडूंना अॅक्लिमेटायझेशन कॅम्पमध्ये पुरेसा वेळ मिळणार नाही, अशी चिंता आहे. काही खेळाडू कॅम्पमध्ये सहभागी होऊ शकणार नाहीत आणि थेट नागोया येथे भारतीय संघातील इतर सदस्यांशी जोडले जाण्याची शक्यता आहे. इतर भारतीय अॅथलीट्स 20 सप्टेंबरपर्यंत सुकुबा युनिव्हर्सिटीमध्ये प्रशिक्षण घेणार आहेत. त्यानंतर अॅथलेटिक्स स्पर्धा सुरू होण्याच्या दोन दिवस आधी म्हणजे 21 सप्टेंबरला ते टोकियोहून नागोयाला रवाना होतील.

23 सप्टेंबरपासून अॅथलेटिक्सच्या स्पर्धांना सुरुवात

आशियाई क्रीडा स्पर्धेतील अॅथलेटिक्सचे सामने 23 सप्टेंबरपासून आयची-नागोया येथे सुरू होणार आहेत. त्यामुळे व्हिसाच्या समस्येवर लवकर तोडगा निघणं भारतीय खेळाडूंसाठी महत्त्वाचं ठरणार आहे. अॅथलेटिक्सनंतर भारताचं दुसरं सर्वात मोठं पथक हॉकीचं असून, त्यात 40 सदस्यांचा समावेश आहे. क्रिकेटमध्ये आयसीसी क्रमवारीच्या आधारे भारतासह चार संघांना थेट उपांत्यपूर्व फेरीत प्रवेश मिळाला आहे. भारतीय क्रिकेट संघाचा पहिला सामना 28 सप्टेंबरला होणार आहे.

हे ही वाचा -

IND vs AFG 2nd T20I Live Streaming : फ्री... फ्री... फ्री...! FanCodeवर पैसे मोजू नका; भारत-अफगाणिस्तानचा दुसरा टी-20 'इथे' पाहता येणार फुकटात; जाणून घ्या A टू Z

भारतीय संघाला मोठा धक्का! अफगाणिस्तान विरुद्धच्या मालिकेदरम्यान स्टार खेळाडू संघाबाहेर, आशियाई क्रीडा स्पर्धेतील सहभागावरही प्रश्नचिन्ह

गणेश लटके — Mon, 14 Sep 2026 23:37:23 +0530

India Afghanistan T20 series : भारतीय क्रिकेट संघाबद्दल एक महत्चावी अपडेट समोर आली आहे. अफगाणिस्तानविरुद्ध सुरू असलेल्या टी-20 मालिकेत भारतीय संघाला मोठा धक्का बसला आहे. कारण स्टार फिरकी गोलंदाज वरुण चक्रवर्ती दुखापतीमुळे मालिकेतून बाहेर पडला आहे. यामुळं आशियाई क्रीडा स्पर्धेतील त्याच्या सहभागावर प्रश्नचिन्ह निर्माण झाले आहे. विशेष म्हणजे, जुलैमध्ये इंग्लंड दौऱ्यादरम्यान झालेल्या हॅमस्ट्रिंगच्या दुखापतीतून तो नुकताच सावरला होता. त्यानंतर आता पुन्हा तो दुखापतीमुळे मालिकेतून बाहेर पडला आहे. त्याला नेमकी कोणत्या प्रकारची दुखापत झाली आहे, हे अद्याप स्पष्ट झालेले नाही.

पहिल्या सामन्यात वरुणने केली होती उत्कृष्ट गोलंदाजी

मिळालेल्या माहितीनुसार, वरुणच्या दुखापतीची आणि मालिकेतून त्याच्या बाहेर पडण्याची माहिती मिळत आहे. बीसीसीआयने वरुणच्या दुखापतीबाबत कोणतीही अधिकृत माहिती दिलेली नाही. या वृत्तानुसार, एका सूत्राने सांगितले की ही एक दुसरी दुखापत आहे, ज्यामुळे त्याला मालिकेतून वगळण्यात आले आहे. अफगाणिस्तान टी-20 मालिकेच्या पहिल्या सामन्यात वरुणने उत्कृष्ट गोलंदाजी केली. त्याने 4 षटकांत केवळ 16 धावा दिल्या आणि 1 बळी घेतला. त्याला भारतीय संघात सातत्याने संधी दिली जात आहे, परंतु त्याची दुखापत वरुणसाठी एक मोठी समस्या बनत आहे.

खेळाडूंना वारंवार होणाऱ्या दुखापती

अलीकडे, खेळाडूंना वारंवार होणाऱ्या दुखापतींचा मुद्दा उपस्थित झाला आहे. यामुळे भारतीय संघाला अडचणी येत आहेत. संघात वरुणची जागा कोणता खेळाडू घेतो हे पाहणे उत्सुकतेचे ठरेल.

वरुण चक्रवर्तीची आंतरराष्ट्रीय कारकीर्द

भारतासाठी व्हाईट-बॉल क्रिकेट खेळणाऱ्या वरुण चक्रवर्तीने आतापर्यंत चार एकदिवसीय आणि 49 टी-20 आंतरराष्ट्रीय सामने खेळले आहेत. चार एकदिवसीय डावांमध्ये त्याने 10 बळी घेतले असून, त्याची सर्वोत्तम कामगिरी 5/42 आहे. उर्वरित 46 टी-20आंतरराष्ट्रीय डावांमध्ये त्याने 75 बळी घेतले असून, त्याची सर्वोत्तम कामगिरी 5/17 आहे.

वरुण चक्रवर्ती हा सध्या भारतीय टी-20 संघातील महत्त्वाचा फिरकी गोलंदाज

वरुण चक्रवर्ती हा सध्या भारतीय टी-20 संघातील महत्त्वाचा फिरकी गोलंदाज मानला जातो. आपल्या अचूक गोलंदाजीसह मधल्या ओव्हर्समध्ये विकेट मिळवून देण्याची त्याची क्षमता ही भारतीय संघासाठी मोठी ताकद आहे. त्यामुळे त्याला दुखापत झाल्याचे समोर आले आहे. त्यामुळे टीम इंडियाची चिंता वाढली आहे. वरुणच्या दुखापतीबाबत भारतीय क्रिकेट नियामक मंडळ म्हणजेच बीसीसीआयकडून अद्याप कोणतेही अधिकृत निवेदन जारी करण्यात आलेले नाही. त्यामुळे उद्याच्या सामन्यात तो खेळू शकणार की नाही हे पहावे लागणार आहे.