Vaibhav Sooryavanshi Hit By Ball During Practice Session : क्रिकेट जगतात सध्या सर्वांच्या नजरा युवा फलंदाज वैभव सूर्यवंशी याच्यावर खिळल्या आहेत. 4 जुलै रोजी इंग्लंडविरुद्ध पदार्पण करताच, तो भारतीय क्रिकेटच्या इतिहासात सर्वात कमी वयात आंतरराष्ट्रीय पदार्पण करणारा खेळाडू ठरला आहे. पहिल्या सामन्यात त्याच्या बॅटमधून फक्त 14 धावा निघाल्या असल्या, तरी त्याच्याकडून लवकरच एका मोठ्या खेळीची अपेक्षा आहे. परंतु, या सगळ्यात आता एक चिंताजनक व्हिडिओ समोर आला आहे. सरावादरम्यान वैभव गंभीररित्या दुखापतग्रस्त झाला असून वेदनेने मैदानावरच विव्हळत बसल्याचे या व्हिडिओत दिसत आहे.
सरावादरम्यान चेंडू थेट बरगड्यांना लागला!
सोशल मीडियावर सध्या एक व्हिडिओ तुफान व्हायरल होत आहे, ज्यामध्ये वैभव सूर्यवंशी नेटमध्ये फलंदाजीचा सराव करताना दिसत आहे. टीम इंडियाच्या सपोर्ट स्टाफमधील थ्रोडाउन स्पेशलिस्ट राघवेंद्र द्विवेदी त्याला थ्रोडाउन देत होते. यादरम्यान एक वेगवान शॉर्ट-पिच चेंडू वैभवला नीट खेळता आला नाही आणि तो थेट त्याच्या बरगड्यांवर जाऊन लागला. चेंडूचा वेग इतका जास्त होता की, तो लागताच वैभव वेदनेने विव्हळत मैदानावरच खाली बसला. मात्र, व्हिडिओमध्ये राघवेंद्र त्याला पाहण्याऐवजी आधी चेंडू उचलण्यासाठी जाताना दिसत आहेत.
वैभव पुढचा सामना खेळू शकणार का?
या घटनेनंतर आता सर्वात मोठा प्रश्न हा निर्माण झाला आहे की, वैभव सूर्यवंशीची दुखापत किती गंभीर आहे? यावर अद्याप बीसीसीआय किंवा संघ व्यवस्थापनाकडून (Team Management) कोणतेही अधिकृत वक्तव्य समोर आलेले नाही. सरावादरम्यान खेळाडूंना अशा दुखापती अनेकदा होत असतात, ज्या प्राथमिक उपचारानंतर ठीक होतात. भारतीय संघ आणि क्रिकेट चाहते हीच प्रार्थना करत आहेत की वैभव तिसऱ्या टी-20 सामन्यापूर्वी पूर्णपणे तंदुरुस्त व्हावा.
पहिल्या सामन्यात खेळली होती आक्रमक खेळी
वैभव सूर्यवंशीने आपल्या पदार्पणाच्या सामन्यात 10 चेंडूंत 14 धावा केल्या होत्या. विशेष म्हणजे, इंग्लंडचा घातक वेगवान गोलंदाज जोफ्रा आर्चर याच्या पहिल्याच चेंडूवर वैभवने खणखणीत षटकार ठोकला होता. तो एक मोठी खेळी खेळण्याच्या तयारीत दिसत होता, पण विल जॅक्सच्या ऑफ-स्पिनवर मोठा फटका मारण्याच्या नादात तो यष्टीचित झाला. आता नॉटिंगहॅम येथे होणाऱ्या तिसऱ्या टी-20 सामन्यात त्याच्याकडून एका मोठ्या खेळीची अपेक्षा असणार आहे. हा सामना भारतीय वेळेनुसार रात्री 10:00 वाजता सुरू होईल. आता सगळ्यांचे लक्ष वैभवच्या फिटनेस अपडेटकडे लागले आहे.
हे ही वाचा -