T20 World Cup 2026 Semi Final Schedule Marathi News : आयसीसी टी-20 विश्वचषक 2026 आता आपल्या अंतिम टप्प्यात पोहोचला असून उपांत्य फेरीचे (Semi-finals) चारही संघ निश्चित झाले आहेत. सुपर-8 च्या चुरशीच्या लढतीत वेस्ट इंडिजचा पराभव करत भारतीय संघाने उपांत्य फेरीत धडक मारली आहे. भारतासोबतच इंग्लंड, दक्षिण आफ्रिका आणि न्यूझीलंड या संघांनी आधीच आपली जागा पक्की केली होती.
संजू सॅमसनची मॅच विनिंग खेळी! भारत ऐतिहासिक विजयासह उपांत्य फेरीत
भारताने वेस्ट इंडिजला एका महत्त्वाच्या सामन्यात पाच विकेट्सने हरवून टी-20 विश्वचषकाच्या उपांत्य फेरीत प्रवेश केला. आता संघ 5 मार्च रोजी वानखेडे स्टेडियमवर इंग्लंडशी सामना करेल. रविवारी कोलकाता येथे खेळल्या गेलेल्या सामन्यात भारताने नाणेफेक जिंकून वेस्ट इंडिजला प्रथम फलंदाजीसाठी आमंत्रित केले. संघाने 20 षटकांत चार विकेट्सच्या मोबदल्यात 195 धावा केल्या. प्रत्युत्तर, भारतीय संघाने संजू सॅमसनच्या 97 धावांच्या स्फोटक खेळीच्या मदतीने 19.2 षटकांत पाच विकेट्सच्या मोबदल्यात 199 धावा केल्या आणि सामना जिंकला.
टीम इंडियाची दिमाखदार कामगिरी
ग्रुप-1 मधून उपांत्य फेरीत पोहोचणारा भारत हा शेवटचा संघ ठरला. 'करो या मरो' अशा स्थितीत असलेल्या सामन्यात भारताने वेस्ट इंडिजवर विजय मिळवून त्यांचे आव्हान संपुष्टात आणले. तत्पूर्वी, भारताने झिम्बाब्वेचाही पराभव केला होता. आता दुसऱ्या उपांत्य फेरीत भारताचा सामना बलाढ्य इंग्लंडशी होणार आहे.
टी-20 विश्वचषक 2026 संपूर्ण वेळापत्रक
| सामना | संघ | दिनांक आणि वेळ | ठिकाण |
| पहिला सेमीफायनल | दक्षिण आफ्रिका विरुद्ध न्यूझीलंड | 4 मार्च 2026 (बुधवार), संध्याकाळी 7:00 वा. | कोलकाता |
| दुसरा सेमीफायनल | इंग्लंड विरुद्ध भारत | 5 मार्च 2026 (गुरुवार), संध्याकाळी 7:00 वा. | मुंबई |
| अंतिम सामना | विजेता SF1 विरुद्ध विजेता SF2 | 8 मार्च 2026 (रविवार) | - |
उपांत्य फेरीपर्यंतचा संघांचा प्रवास
इंग्लंड : ग्रुप-2 मधून पात्र ठरणारा हा पहिला संघ होता. दोन वेळच्या चॅम्पियन इंग्लंडने श्रीलंका, पाकिस्तान आणि न्यूझीलंडला पराभूत करत आपली ताकद सिद्ध केली आहे.
दक्षिण आफ्रिका : ग्रुप-1 मधून दक्षिण आफ्रिकेने दिमाखात प्रवेश केला. भारत आणि वेस्ट इंडिजसारख्या मोठ्या संघांना धूळ चारत त्यांनी आपले स्थान निश्चित केले.
न्यूझीलंड : सातत्यपूर्ण कामगिरीच्या जोरावर न्यूझीलंडने ग्रुप-2 मधून तिसऱ्या संघाच्या रूपात सेमीफायनलचे तिकीट मिळवले.
भारत : वेस्ट इंडिजविरुद्धचा सामना हा 'व्हर्च्युअल क्वार्टर फायनल' होता. या सामन्यात विजय मिळवून भारताने चौथ्या संघाच्या रूपात दिमाखदार एन्ट्री केली. आता संपूर्ण जगाचे लक्ष 5 मार्चला मुंबईत होणाऱ्या भारत विरुद्ध इंग्लंड या हाय-व्होल्टेज सामन्याकडे लागले आहे. घरच्या मैदानावर भारतीय संघ इंग्लंडला रोखून फायनलमध्ये धडक मारणार का, हे पाहणे उत्सुकतेचे ठरेल.
हे ही वाचा -