SRH vs RR Eliminator IPL 2026 : वैभव सुर्यवंशीच्या वादळी 97 धावा; हैदराबादचा धुव्वा उडवत राजस्थान क्वालिफायर-2 मध्ये

SRH vs RR Eliminator Live Update IPL 2026 : आज आयपीएल 2026 च्या एलिमिनेटरमध्ये सनरायझर्स हैदराबाद आणि राजस्थान रॉयल्स आणि यांच्यात जबरदस्त लढत रंगणार आहे.

किरण महानवरLast Updated: 27 May 2026 11:27 PM

पार्श्वभूमी

Sunrisers Hyderabad vs Rajasthan Royals Eliminator Live Update IPL 2026 : आज आयपीएल 2026 च्या एलिमिनेटरमध्ये सनरायझर्स हैदराबाद आणि राजस्थान रॉयल्स आणि यांच्यात जबरदस्त लढत रंगणार आहे. न्यू चंदीगडमधील महाराजा यादविंद्र सिंह इंटरनॅशनल क्रिकेट स्टेडियम, मुल्लांपूर येथे हा हायव्होल्टेज सामना संध्याकाळी 7:30 वाजता सुरू होणार आहे. या करो किंवा मरो सामन्यात राजस्थानचा कर्णधार रियान पराग याच्यासमोर दोन मोठी मिशन्स असणार आहेत. ही दोन कामं आरआरने साध्य केली, तर क्वालिफायर-2 चे तिकीट जवळपास पक्कं मानलं जात आहे.पहिलं मोठं काम म्हणजे पॅट कमिन्स यांच्या नेतृत्वाखालील हैदराबादच्या धडाकेबाज फलंदाजीला लवकर रोखणं. एसआरएचची बॅटिंग एकदा तळपली की कोणत्याही संघाचा खेळ काही षटकांत संपवण्याची ताकद त्यांच्यात आहे. त्यामुळे पॉवरप्लेमध्ये विकेट्स घेणं राजस्थानसाठी अत्यंत महत्त्वाचं असेल.दुसरं महत्त्वाचं काम म्हणजे राजस्थानच्या टॉप ऑर्डरने मोठी भागीदारी उभी करणं. एलिमिनेटरसारख्या दबावाच्या सामन्यात सुरुवातीची फलंदाजी कोसळली, तर सामना हातातून निसटू शकतो. त्यामुळे आरआरला शांत, संयमी आणि आक्रमक खेळाचं योग्य मिश्रण दाखवावं लागेल. जर राजस्थानने ही दोन्ही कामं अचूक पार पाडली, तर त्यांचा क्वालिफायर-2 मध्ये प्रवेश जवळपास निश्चित मानला जात आहे. मात्र दुसरीकडे एसआरएचसाठी हा सामना ‘करो या मरो’ असणार आहे. पराभव झाला, तर हैदराबादचं आयपीएल 2026 मधील आव्हान संपुष्टात येणार आहे.

27/05/2026 23:27:00

SRH vs RR Eliminator IPL 2026 : वैभव सुर्यवंशीच्या वादळी 97 धावा; हैदराबादचा धुव्वा उडवत राजस्थान क्वालिफायर-2 मध्ये

एलिमिनेटरमध्ये सनरायझर्स हैदराबादला पराभूत केल्यानंतर, राजस्थान रॉयल्सने आयपीएल 2026 च्या क्वालिफायर 2 मध्ये प्रवेश केला आहे.

मुल्लानपूर येथे खेळल्या गेलेल्या एलिमिनेटर सामन्यात, राजस्थान रॉयल्सने सनरायझर्स हैदराबादला 47 धावांनी पराभूत केले.

या पराभवामुळे हैदराबादच्या स्पर्धेतील वाटचालीस पूर्णविराम लागला.

244 धावांचे लक्ष्य समोर असताना, हैदराबादचा संघ 196 धावांवर सर्वबाद झाला.

29 मे रोजी होणाऱ्या क्वालिफायर 2 मध्ये राजस्थान रॉयल्सचा सामना गुजरात टायटन्सशी होईल, ज्यांनी क्वालिफायर-1 मध्ये रॉयल चॅलेंजर्स बंगळूरविरुद्ध पराभव पत्करला होता.

27/05/2026 21:30:25

SRH vs RR Eliminator Live Update IPL 2026 : शतक हुकले पण मन जिंकले! वैभव सूर्यवंशीचे 29 चेंडूत 97 धावांचा तांडव; राजस्थान रॉयल्स सुसाट, हैदराबादसमोर 244 धावांचा डोंगर

आयपीएल 2026 च्या एलिमिनेटर (Eliminator) सामन्यात राजस्थान रॉयल्सने (RR) सनरायझर्स हैदराबादविरुद्ध (SRH) धावांचा पाऊस पाडत 20 षटकांत 8 बाद 243 धावांचा डोंगर उभा केला आहे.

हैदराबादने नाणेफेक जिंकून प्रथम गोलंदाजी करण्याचा निर्णय घेतला, पण राजस्थानच्या फलंदाजांनी तो पूर्णपणे चुकीचा ठरवला.

वैभवने हैदराबादच्या गोलंदाजांचा चांगलाच समाचार घेतला, अवघ्या 29 चेंडूंमध्ये 9 चौकार आणि 12 षटकारांच्या मदतीने 97 धावांची स्फोटक खेळी केली. त्याचे शतक अवघ्या 3 धावांनी हुकले.

वैभवने पहिल्या विकेटसाठी यशस्वी जैस्वाल (29) सोबत अवघ्या 48 चेंडूत 125 धावांची वादळी भागीदारी करून संघाला ऐतिहासिक सुरुवात करून दिली.

यानंतर मधल्या फळीत विकेटकीपर ध्रुव जुरेलने 21 चेंडूत 50 धावा ठोकून राजस्थानचा डाव वेगाने पुढे नेला.

कर्णधार रियान परागने 12 चेंडूत 26 धावा केल्या. शेवटच्या षटकांमध्ये हैदराबादने काही प्रमाणात पुनरागमन केले, मात्र राजस्थानने 240 चा टप्पा ओलांडलाच.

हैदराबादकडून फिरकीपटू प्रफुल हिंगे याने महागडा ठरला असला सर्वाधिक 3 बळी घेतले.

शिवांग कुमार आणि नितीश कुमार रेड्डी यांनी प्रत्येकी 1-1 बळी घेतला, तर मुख्य गोलंदाज पॅट कमिन्स आणि ईशान मलिंगा यांना एकही विकेट मिळाली नाही.

सामना जिंकून क्वालिफायर-2 मध्ये जागा मिळवण्यासाठी आता सनरायझर्स हैदराबादला 20 षटकांत 244 धावांचे कठीण आव्हान पार करावे लागणार आहे.

ट्रेव्हिस हेड, अभिषेक शर्मा आणि हेनरिक क्लासेन यांच्यावर हैदराबादच्या विजयाची मोठी जबाबदारी असेल.