Punjab Kings Playoff Scenario In Marathi News : पंजाब किंग्सने आयपीएल 2026 ची सुरुवात ज्या दमदार अंदाजात केली होती, ते पाहता ही टीम प्लेऑफच्या शर्यतीत अडचणीत येईल, असं कुणालाही वाटलं नव्हतं. पण आता परिस्थिती पूर्णपणे बदलली आहे. सोमवारी धर्मशाला येथे झालेल्या सामन्यात दिल्ली कॅपिटल्सकडून पंजाबला 3 विकेट्सने पराभव स्वीकारावा लागला. हा पीबीकेएसचा सलग चौथा पराभव ठरला असून आता श्रेयस अय्यरच्या संघावर प्लेऑफमधून बाहेर पडण्याचा धोका निर्माण झाला आहे.
पंजाब किंग्सचा सलग चौथा धक्का (Punjab Kings Playoff Scenario)
आयपीएल 2026 मधील 55वा सामना दिल्ली कॅपिटल्स आणि पंजाब किंग्स यांच्यात खेळला गेला. या सामन्यात दिल्लीने थरारक विजय मिळवत पंजाबचा पराभव केला. विशेष म्हणजे, हा पंजाबचा सलग चौथा पराभव ठरला. हंगामाच्या सुरुवातीला पंजाबने सलग 7 सामने गमावले नव्हते. मात्र पहिल्या पराभवानंतर संघाची घसरगुंडी सुरू झाली. राजस्थान रॉयल्स, गुजरात टायटन्स, सनरायझर्स हैदराबाद आणि आता दिल्ली कॅपिटल्सकडून पंजाबला हार पत्करावी लागली आहे.
गुणतालिकेत अजूनही चौथ्या स्थानावर (IPL 2026 Points Table)
सलग चार पराभवांनंतरही पंजाब किंग्स सध्या गुणतालिकेत चौथ्या स्थानावर कायम आहे. पंजाबने आतापर्यंत 11 सामने खेळले असून त्यापैकी 6 विजय, 4 पराभव आणि 1 सामना पावसामुळे रद्द झाला आहे. त्यामुळे संघाच्या खात्यात 13 गुण आहेत. पंजाबचा नेट रनरेट +0.428 इतका आहे.
आता प्लेऑफमध्ये कसं पोहोचणार?
पंजाबसाठी आता प्रत्येक सामना करो किंवा मरो असा असणार आहे. संघाला अजून 3 सामने खेळायचे आहेत आणि त्यापैकी किमान 2 सामने जिंकणे अत्यावश्यक आहे. सध्या गुणतालिकेतील अव्वल 3 संघांकडे 14 गुण आहेत. त्यामुळे यंदा प्लेऑफमध्ये पोहोचण्यासाठी किमान 16 गुणांची गरज भासू शकते.
अशा परिस्थितीत पंजाबने उर्वरित 3 पैकी 2 सामने जिंकले, तर त्यांच्या खात्यात 17 गुण होतील आणि प्लेऑफमध्ये प्रवेश जवळपास निश्चित होईल. मात्र आणखी एक पराभव झाला, तर पीबीकेएसची अडचण मोठ्या प्रमाणात वाढू शकते.
हे ही वाचा -