Los Angeles Olympics 2028 Cricket News : 128 वर्षांच्या प्रदीर्घ प्रतीक्षेनंतर पुन्हा एकदा क्रिकेट ऑलिंपिकमध्ये खेळताना दिसणार आहे. लॉस एंजेलिस ऑलिंपिक 2028 मध्ये क्रिकेटचे सामने होणार असून, आंतरराष्ट्रीय क्रिकेट परिषद (ICC) आणि आंतरराष्ट्रीय ऑलिंपिक समिती (IOC) यांनी यासाठी जोरदार तयारी सुरू केली आहे. दुबईत 7 नोव्हेंबर रोजी संपलेल्या आयसीसी बोर्ड बैठकीत या स्पर्धेत कोणत्या संघांना संधी मिळेल, किती संघ खेळतील आणि पात्रता प्रक्रिया कशी असेल याचा खुलासा करण्यात आला.
महिला आणि पुरुष दोन्ही गटात टी-20 स्वरूपातील सामने
क्रिकेट ऑलिंपिकमध्ये टी-20 फॉरमॅटमध्ये खेळवले जाणार असून, वनडे किंवा कसोटी स्वरूपाला संधी दिली जाणार नाही. हे सामने 12 ते 29 जुलै 2028 दरम्यान खेळले जातील. महिला गटातील फायनल २० जुलैला, तर पुरुष गटातील फायनल 29 जुलैला होईल. सर्व सामने पोमोना फेअरग्राउंड्स येथे खेळले जातील, जे लॉस एंजेलिसपासून सुमारे 50 किमी अंतरावर आहे.
प्रत्येकी 6 संघांना संधी
पुरुष आणि महिला दोन्ही विभागात 90-90 खेळाडूंना (15 खेळाडूंचे स्क्वाड) प्रवेश दिला जाईल. म्हणजे प्रत्येकी 6-6 संघांना ऑलिंपिकमध्ये संधी मिळेल.
भारताची थेट एन्ट्री, पण पाकिस्तान अडचणीत
आयसीसीने ठरवले आहे की 5 प्रांतांतील (Regions) सर्वोच्च रँक असलेल्या संघांना थेट ऑलिंपिकचा तिकीट मिळेल, तर सहावी टीम ग्लोबल क्वालिफायरमधून ठरवली जाईल.
आशिया : भारत (थेट प्रवेश), तर पाकिस्तान, श्रीलंका आणि बांगलादेश यांना क्वालिफायर खेळावे लागतील.
ओशिनिया : ऑस्ट्रेलिया थेट, न्यूझीलंडला क्वालिफायर खेळावे लागतील.
युरोप : इंग्लंड थेट, तर आयर्लंड व इतर संघ क्वालिफायर खेळावे लागतील.
आफ्रिका : दक्षिण आफ्रिका थेट पात्र.
वेस्टइंडिज आणि अमेरिकामध्ये गोंधळ
वेस्टइंडिज एकत्रित संघ म्हणून खेळतो, परंतु ऑलिंपिकमध्ये प्रत्येक कॅरिबियन देश स्वतंत्रपणे भाग घेतो. त्यामुळे अमेरिका यजमान म्हणून आपोआप पात्र ठरेल का, की वेस्टइंडिजचा दावा ग्राह्य धरला जाईल, हे अद्याप स्पष्ट नाही.
पाकिस्तानसाठी कठीण आहे मार्ग?
ग्लोबल क्वालिफायरची रचना अद्याप निश्चित नाही. प्रथम विभागीय (Regional) स्तरावर स्पर्धा होईल का, की थेट जगातील इतर संघांशी सामना खेळून पात्र ठरावे लागेल, हे स्पष्ट नाही. त्यामुळे पाकिस्तानसाठी ऑलिंपिकचे तिकीट मिळवणे अवघड मानले जात आहे.
1900 मध्ये झाला होता एकमेव ऑलिंपिक सामना
क्रिकेटचा शेवटचा ऑलिंपिक सामना 1900 च्या पॅरिस ऑलिंपिकमध्ये झाला होता. त्यावेळी फक्त दोन संघ ग्रेट ब्रिटन आणि फ्रान्स पात्र ठरले होते. एकाच सामन्यात ग्रेट ब्रिटनने फ्रान्सचा पराभव करून सुवर्णपदक जिंकले होते.
हे ही वाचा -