India Squad For England Tour : करुण नायरचा वनवास संपणार, तर 17 महिन्यांनंतर रोहित शर्माच्या लाडक्यालाही संधी? टीम इंडियाच्या गोटातून महत्वाची माहिती आली समोर

England vs India Test Series News : बीसीसीआय आयपीएल 2025 पुन्हा सुरू करण्याची तयारी करत आहे. यासोबतच भारत आणि इंग्लंड यांच्यातील कसोटी मालिकेचीही विचार करत आहे.

India Squad For England Tour Update : बीसीसीआय आयपीएल 2025 पुन्हा सुरू करण्याची तयारी करत आहे. यासोबतच भारत आणि इंग्लंड यांच्यातील कसोटी मालिकेचीही विचार करत आहे. इंग्लंड दौऱ्यापूर्वी होणाऱ्या सराव सामन्यासाठी निवड समितीने भारत 'अ' संघ जवळजवळ निश्चित केला आहे असे वृत्त आहे. ज्यामध्ये करुण नायर संघात परतू शकतो. त्याच वेळी, रोहित शर्माचा लाडका 'लॉर्ड' शार्दुल ठाकूर देखील कसोटी संघात परतू शकतो. वृत्तानुसार, भारत 'अ' संघाची घोषणा 13 मे रोजी केली जाईल आणि वरिष्ठ कसोटी संघाची निवड 23 मे रोजी केली जाईल. रोहित शर्माच्या जागी शुभमन गिलला नवा कर्णधार बनवले जाऊ शकते.

करुण नायरचा वनवास संपणार?

2017 नंतर करुण नायर पहिल्यांदाच भारतीय संघात खेळू शकतो. जर त्याची भारत 'अ' संघात निवड झाली तर ते त्याच्या देशांतर्गत क्रिकेटमधील चांगल्या कामगिरीचे बक्षीस असेल. 32 वर्षीय करुण नायरने 2016 मध्ये इंग्लंडविरुद्ध त्रिशतक झळकावले होते. त्याने रणजी ट्रॉफीमध्ये भरपूर धावा केल्या आणि विदर्भाला चॅम्पियन बनवण्यात महत्त्वाची भूमिका बजावली. विजय हजारे ट्रॉफीमध्येही त्याने चांगली कामगिरी केली होती.

'लॉर्ड' शार्दुल ठाकूर मिळणार संधी?

यासोबतच शार्दुल ठाकूर देखील कसोटी संघात परतू शकतो. त्याने शेवटचा कसोटी सामना डिसेंबर 2023 मध्ये दक्षिण आफ्रिकेविरुद्ध खेळला होता. यावेळी इंग्लंड मालिकेसाठी त्याची थेट वरिष्ठ संघात निवड होऊ शकते अशी बातमी आहे. शार्दुल ठाकूर एक चांगला फलंदाज आणि गोलंदाज आहे. 2021 मध्ये इंग्लंड दौऱ्यात त्याने संघासाठी महत्त्वपूर्ण योगदान दिले. क्रिकबझच्या अहवालात हा दावा करण्यात आला आहे.

वृत्तानुसार, भारत 'अ' संघाचा कर्णधार अभिमन्यू ईश्वरन संघाचे नेतृत्व करू शकतो. भारत 'अ' संघ इंग्लंड लायन्सविरुद्ध दोन चार दिवसांचे सामने खेळेल. हे सामने 30 मे ते 2 जून आणि 6 जून ते 9 जून या कालावधीत खेळवले जातील. यानंतर, भारत 'अ' संघ 13 जून ते 16 जून दरम्यान वरिष्ठ भारतीय संघाविरुद्ध आणखी एक सामना खेळेल. वरिष्ठ कसोटी संघाची निवड 23 मे रोजी केली जाईल. 

रोहितच्या निवृत्तीनंतर टीम इंडियामध्ये बदल निश्चित आहे. रोहित व्यतिरिक्त, विराटच्या कसोटी कारकिर्दीबद्दलही अटकळ बांधली जात आहे. इंग्लंड मालिकेपूर्वी कोहली कसोटी क्रिकेटलाही अलविदा म्हणू शकतो. कोहली कसोटीतून निवृत्त होण्याच्या मनःस्थितीत आहे आणि त्याने बीसीसीआयलाही याबद्दल माहिती दिली आहे. याशिवाय, रोहितच्या जाण्यानंतर टीम इंडियाला नवीन कर्णधार मिळेल. शुभमन गिल कसोटी संघाची जबाबदारी घेऊ शकतो.