Jasprit Bumrah : सेमीफायनलपूर्वी बूम-बूम बुमराहची टीम इंडियात होणार एन्ट्री? व्हिडिओसमोर आल्यानंतर चाहत्यांचा आनंद गगनात मावेना
टीम इंडियाने चॅम्पियन्स ट्रॉफीच्या सेमीफायनलमध्ये आधीच स्थान मिळवले आहे. पण, गट टप्प्यात अजूनही एक सामना बाकी आहे, जो 2 मार्च रोजी न्यूझीलंडविरुद्ध खेळला जाईल.
Jasprit Bumrah Resumes Bowling at NCA : टीम इंडियाने चॅम्पियन्स ट्रॉफीच्या सेमीफायनलमध्ये आधीच स्थान मिळवले आहे. पण, गट टप्प्यात अजूनही एक सामना बाकी आहे, जो 2 मार्च रोजी न्यूझीलंडविरुद्ध खेळला जाईल. यानंतर, भारतीय संघाला 4 मार्च रोजी दुबईमध्ये उपांत्य फेरीचा सामना खेळायचा आहे. या महत्त्वाच्या सामन्यापूर्वी वेगवान गोलंदाज जसप्रीत बुमराहने भारतीय चाहत्यांना एक मोठी आनंदाची बातमी दिली आहे. खरं तर, त्याने बेंगळुरूमधील राष्ट्रीय क्रिकेट अकादमीमध्ये गोलंदाजी सुरू केली आहे. बुमराहने याचा एक व्हिडिओही शेअर केला आहे. हा व्हिडिओ समोर आल्यानंतर, तो सेमीफायनलपूर्वी टीम इंडियामध्ये प्रवेश करेल का, अशी अटकळ बांधली जात आहे.
बूम-बूम बुमराहची टीम इंडियात होणार एन्ट्री?
जसप्रीत बुमराहला पाठीच्या दुखापतीमुळे चॅम्पियन्स ट्रॉफीमधून बाहेर पडावे लागले. स्कॅन रिपोर्ट्स आल्यानंतर, त्याला एनसीएमध्ये पाठवण्यात आले, जिथे बीसीसीआयच्या वैद्यकीय कर्मचाऱ्यांच्या देखरेखीखाली त्याचे पुनर्वसन सुरू झाले आहे. जवळजवळ महिनाभर मैदानापासून दूर असलेल्या बुमराहने आता नेटमध्ये गोलंदाजी करण्यास सुरुवात केली आहे. व्हिडिओमध्ये तो उत्तम लयीतही दिसत आहे. पण 4 मार्च रोजी होणाऱ्या चॅम्पियन्स ट्रॉफीच्या उपांत्य फेरीत त्याचा प्रवेश कठीण दिसत आहे. कारण आता फक्त 4 दिवस बाकी आहेत. त्याच वेळी, बीसीसीआयकडूनही अशी कोणतीही माहिती आलेली नाही. अहवालानुसार, तो 22 मार्चपासून सुरू होणाऱ्या आयपीएलमधूनच पुनरागमन करू शकेल.
View this post on Instagram
ऑस्ट्रेलिया दौऱ्यावर झाली दुखापत
ऑस्ट्रेलिया दौऱ्यावर सिडनी कसोटीदरम्यान त्याच्या पाठ दुखत होती. यामुळे तो या सामन्याच्या दुसऱ्या डावात गोलंदाजी करू शकला नाही. बीसीसीआयच्या वैद्यकीय पथकाने त्याला 5 आठवडे विश्रांती घेण्याचा सल्ला दिला होता आणि चॅम्पियन्स ट्रॉफीसाठी तो तंदुरुस्त होईल अशी आशा होती, पण तसे झाले नाही. तर जसप्रीत बुमराहच्या स्कॅननंतर त्याला चॅम्पियन्स ट्रॉफी संघातून वगळण्यात आले. त्यानंतर स्पष्टपणे सांगण्यात आले की बोर्ड त्याच्याबाबत कोणतीही घाई करू इच्छित नाही. त्यामुळे त्याला या महत्त्वाच्या स्पर्धेतून वगळणेच योग्य मानले गेले.
चाहत्यांकडून बुमराहला चॅम्पियन्स ट्रॉफीमध्ये खेळवण्याची मागणी
मात्र, जसप्रीत बुमराहचा व्हिडिओ पाहिल्यानंतर चाहते खुप आनंदी आहेत. ते उत्सुक झाले आहेत आणि बुमराहला चॅम्पियन्स ट्रॉफीमध्ये खेळवण्याची मागणी करत आहेत. काहींना तो उपांत्य फेरीत तर काहींना अंतिम फेरीत खेळताना पहायचे आहे. म्हणूनच त्याने बुमराहच्या व्हिडिओवर कमेंट करून ही मागणीही केली आहे. सध्या चाहत्यांची ही मागणी पूर्ण होणे कठीण दिसते आहे. पण भारताचा हा स्टार वेगवान गोलंदाज लवकरच शानदार पुनरागमन करेल अशी अपेक्षा आहे.
महत्त्वाच्या बातम्या
