INDW vs PAKW T20 WC 2026 Updates : दीप्ती शर्माने एकहाती केला पाकिस्तानचा खेळ खल्लास, भारताचा पहिल्याच सामन्यात 64 धावांनी दणदणीत विजय

INDW vs PAKW T20 WC 2026 Live Updates : भारत आणि पाकिस्तान यांच्यात रविवारी महिला टी-20 विश्वचषक 2026 मधील हायव्होल्टेज सामना रंगणार आहे.

किरण महानवरLast Updated: 14 Jun 2026 10:32 PM

पार्श्वभूमी

India vs Pakistan ICC Women's T20 World Cup 2026 Live Updates : भारत आणि पाकिस्तान यांच्यात रविवारी महिला टी-20 विश्वचषक 2026 मधील हायव्होल्टेज सामना रंगणार आहे. हा सामना बर्मिंगहॅममधील एजबेस्टन मैदानावर खेळवला जाणार असून, तेथील वातावरण अत्यंत उत्साहपूर्ण आणि रंगतदार असण्याची शक्यता आहे. बर्मिंगहॅममध्ये मोठ्या प्रमाणात वास्तव्य करणाऱ्या दक्षिण आशियाई समुदायामुळे भारत-पाकिस्तान सामने नेहमीच खास पर्वणी ठरतात. हरमनप्रीत कौरच्या नेतृत्वाखालील भारतीय संघात अनुभव आणि आक्रमक खेळ यांचा उत्तम संगम पाहायला मिळतो. विशेषतः सलामीवीर स्मृती मानधना आणि शेफाली वर्मा सुरुवातीपासूनच आक्रमक फलंदाजी करत सामन्याचा वेग ठरवू शकतात.भारतीय संघाकडे संतुलित गोलंदाजी आक्रमणही आहे. इंग्लंडमधील स्विंगला पोषक परिस्थितीत रेणुका सिंगची गोलंदाजी आणि दीप्ती शर्माची सातत्यपूर्ण कामगिरी संघासाठी महत्त्वाची ठरू शकते. तसेच क्रांती गौडलाही या सामन्यात चमक दाखवण्याची मोठी संधी असेल.दुसरीकडे, फातिमा सना हिच्या नेतृत्वाखालील युवा पाकिस्तानी संघ आपली छाप पाडण्यासाठी सज्ज आहे. पाकिस्तानकडून अनुभवी फिरकीपटू सादिया इक्बाल आणि निदा दार यांच्यावर मोठी जबाबदारी असेल. वेगवान गोलंदाज डायना बेग भारतीय फलंदाजांसमोर आव्हान उभे करू शकते.कागदावर भारत या सामन्यात विजयाचा प्रबळ दावेदार मानला जात असला, तरी पाकिस्तानचा संघ उलटफेर घडवून आणण्याची क्षमता ठेवतो. त्यामुळे दोन्ही संघ विजयाने स्पर्धेची सुरुवात करण्यासाठी सर्वस्व पणाला लावतील, यात शंका नाही.

14/06/2026 22:32:31

INDW vs PAKW T20 WC 2026 Updates : दीप्ती शर्माने एकहाती केला पाकिस्तानचा खेळ खल्लास, भारताचा पहिल्याच सामन्यात 64 धावांनी दणदणीत विजय

भारतीय संघाने 2026 च्या आयसीसी महिला टी-20 विश्वचषक स्पर्धेची सुरुवात विजयाने केली.

भारतीय संघाने पाकिस्तान महिला संघाचा 64 धावांनी पराभव केला.

प्रथम फलंदाजी करताना भारतीय संघाने 170 धावा केल्या.

प्रत्युत्तरात, पाकिस्तानचा संघ 17 षटकांत 106 धावांवर सर्वबाद झाला.

14/06/2026 21:12:55

INDW vs PAKW T20 WC 2026 Live Updates : स्मृती मानधनाचे शानदार अर्धशतक, रिचा घोषची तुफानी फटकेबाजी; भारताचे पाकिस्तानसमोर 171 धावांचे टार्गेट

आयसीसी महिला टी-20 विश्वचषक 2026 मधील ग्रुप 'ए' च्या हाय-व्होल्टेज सामन्यात भारत आणि पाकिस्तानच्या महिला संघ आमनेसामने आले आहेत. बर्मिंगहॅमच्या एजबॅस्टन मैदानावर रंगलेल्या या सामन्यात भारताने नाणेफेक जिंकून प्रथम फलंदाजी करण्याचा निर्णय घेतला. सलामीवीर स्मृती मानधनाचे शानदार अर्धशतक आणि अखेरच्या षटकांमध्ये रिचा घोषने केलेल्या तुफानी फटकेबाजीच्या जोरावर भारतीय महिला संघाने निर्धारित 20 षटकांत 6 बाद 170 धावांची धावसंख्या उभारली. आता पाकिस्तानला विजयासाठी 171 धावांची गरज आहे.

भारताची खराब सुरुवात; शेफाली-जेमिमा स्वस्तात OUT

प्रथम फलंदाजीसाठी उतरलेल्या भारतीय संघाची सुरुवात निराशाजनक झाली. सलामीवीर शेफाली वर्मा अवघ्या 6 धावा करून सादिया इक्बालच्या गोलंदाजीवर मुनीबा अलीकडे झेल देऊन बाद झाली. त्यानंतर आलेली जेमिमा रॉड्रिग्सही खेळपट्टीवर फार काळ टिकू शकली नाही. तिला तस्मिया रुबाबने 1 धावेवर बाद करत भारताला दुसरा धक्का दिला. 6व्या षटकाच्या अखेरीस पॉवरप्लेमध्ये भारताने अवघ्या 38 धावा फलकावर लावल्या होत्या आणि 2 महत्त्वाचे फलंदाज गमावले होते.

स्मृती मानधना आणि हरमनप्रीतची 91 धावांची भागीदारी

2 बाद 18 अशी बिकट अवस्था झाल्यानंतर उपकर्णधार स्मृती मानधना आणि कर्णधार हरमनप्रीत कौर यांनी भारतीय डाव सावरला. या दोन्ही अनुभवी खेळाडूंनी तिसऱ्या विकेटसाठी 63 चेंडूंमध्ये 91 धावांची महत्त्वपूर्ण भागीदारी केली. स्मृती मानधनाने 44 चेंडूंत 4 चौकार आणि 4 षटकारांच्या मदतीने 68 धावांची धडाकेबाज खेळी केली. तिला रामीन शमीमने बाद केले. दुसऱ्या बाजूने कर्णधार हरमनप्रीत कौरने 35 चेंडूंत 3 चौकारांसह 36 धावांचे संयमी योगदान दिले. ती फातमा सनाच्या गोलंदाजीवर बाद झाली. मध्यक्रमात आलेली भारती फुलमाली अवघ्या 1 धावेवर बाद झाल्याने भारताची धावगती किंचित मंदावली होती.

रिचा घोषचे डेथ ओव्हर्समधील वादळ

हरमनप्रीत बाद झाल्यानंतर यष्टीरक्षक फलंदाज रिचा घोषने सामन्याची सूत्रे हाती घेतली. रिचाने पाकिस्तानी गोलंदाजीची पिसें काढत अवघ्या 17 चेंडूंमध्ये 34 धावांची आक्रमक खेळी केली, ज्यामध्ये तिने 5 चौकार आणि 1 गगनचुंबी षटकार ठोकला. तिने दीप्ती शर्मासोबत (12 चेंडूत नाबाद 12 धावा) मिळून सहाव्या विकेटसाठी अवघ्या 21 चेंडूंत 45 धावांची वेगवान भागीदारी केली आणि भारताला 170 धावांपर्यंत पोहोचवले.