India Playing 11 vs New Zealand 3rd T20 : भारत आणि न्यूझीलंड यांच्यातील पाच सामन्यांच्या टी-20 मालिकेतील पहिले दोन सामने आतापर्यंत खेळले गेले असून दोन्ही सामने भारताने जिंकले आहेत. नागपूर आणि रायपूर येथे झालेल्या सामन्यांमध्ये टीम इंडियाने दमदार कामगिरी करत 2-0 अशी आघाडी घेतली आहे. आता मालिकेतील तिसरा टी-20 सामना गुवाहाटी येथे खेळवला जाणार आहे. हा सामना भारताने जिंकला तर 3-0 अशी अजेय आघाडी घेत मालिका आपल्या नावावर करेल.
दरम्यान, तिसऱ्या टी-20 सामन्यासाठी भारतीय प्लेइंग इलेव्हनमध्ये बदल होण्याची शक्यता वर्तवली जात आहे. मिळालेल्या माहितीनुसार, हर्षित राणा याच्यासह दोन खेळाडूंना प्लेइंग 11 मधून बाहेर बसावे लागू शकते.
बुमराहच्या पुनरागमनामुळे हर्षित राणा बाहेर?
हर्षित राणा प्लेइंग इलेव्हनमधून बाहेर का होऊ शकतो, हा प्रश्न सध्या चर्चेत आहे. हर्षित राणाला मालिकेतील दुसऱ्या टी-20 सामन्यात खेळण्याची संधी मिळाली होती. पहिल्या सामन्यात तो प्लेइंग 11 मध्ये नव्हता. दुसऱ्या टी-20 मध्ये त्याला जसप्रीत बुमराहच्या जागी संघात स्थान देण्यात आले होते. त्या वेळी कर्णधार सूर्यकुमार यादवने बुमराहला विश्रांती देण्यात आल्याचे सांगितले होते. मात्र आता गुवाहाटी येथे होणाऱ्या तिसऱ्या टी-20 सामन्यात जसप्रीत बुमराह पुन्हा प्लेइंग 11 मध्ये परतण्याची शक्यता आहे. तसे झाल्यास हर्षित राणाला संघाबाहेर बसावे लागू शकते.
गुवाहाटीत टीम इंडियाचा टी-20 रेकॉर्ड
गुवाहाटी येथे टीम इंडियाचा टी-20 मधील रेकॉर्ड फारसा चांगला राहिलेला नाही. आतापर्यंत भारताने येथे चार टी-20 सामने खेळले असून त्यापैकी केवळ एक सामना जिंकला आहे. दोन सामन्यांत भारताला पराभव पत्करावा लागला आहे, तर एक सामना अनिर्णीत राहिला होता. विशेष म्हणजे, गुवाहाटीमध्ये भारत आणि न्यूझीलंड संघ पहिल्यांदाच टी-20 सामन्यात आमनेसामने येणार आहेत. त्यामुळे या मैदानावर भारत मजबूत संघ उतरवण्याचा विचार करू शकतो.
कुलदीप यादवही होऊ शकतो बाहेर
हर्षित राणासोबतच कुलदीप यादव यालाही प्लेइंग 11 मधून बाहेर बसावे लागू शकते, अशी शक्यता आहे. कारण अक्षर पटेल दुखापतीतून सावरून तिसऱ्या टी-20 सामन्यात पुनरागमन करू शकतो. जर अक्षर पटेल खेळण्यासाठी उपलब्ध झाला, तर कुलदीप यादवला संघाबाहेर ठेवले जाऊ शकते. मात्र, अक्षरच्या दुखापतीबाबत अद्याप कोणतीही अधिकृत माहिती समोर आलेली नाही.
महत्त्वाचे म्हणजे, हर्षित राणा आणि कुलदीप यादव यांनी दुसऱ्या टी-20 सामन्यात चांगली कामगिरी केली होती. कुलदीपने दोन विकेट्स घेतल्या, तर हर्षित राणाने एक विकेट मिळवली. तरीही बुमराह आणि अक्षर पटेल जर प्लेइंग 11 मध्ये परतले, तर या दोघांसाठी संघात जागा बनवणे कठीण ठरू शकते. कारण दुसऱ्या सामन्यात हर्षित आणि कुलदीप यांना संधीही बुमराह आणि अक्षर यांच्या जागीच मिळाली होती.
तिसऱ्या टी-20 साठी संभाव्य प्लेइंग 11 : सूर्यकुमार यादव (कर्णधार), अभिषेक शर्मा, संजू सॅमसन, ईशान किशन, हार्दिक पांड्या, रिंकू सिंग, शिवम दुबे, अक्षर पटेल / कुलदीप यादव, जसप्रीत बुमराह / हर्षित राणा, अर्शदीप सिंग, वरुण चक्रवर्ती.
हे ही वाचा -