IND vs PAK Asian Games 2026 Final : भारताचा आशियावर झेंडा, पाकिस्तान चारीमुंड्या चीत, श्रेयस अय्यरच्या टीम इंडियाने गोल्ड मेडल जिंकलं!
Shreyas Iyer Team India Won Gold Medal Asian Games 2026 : आशियाई क्रीडा स्पर्धा 2026 च्या अंतिम सामन्यात भारतीय संघाने पुन्हा एकदा आपला दबदबा सिद्ध करत प्रतिस्पर्धी पाकिस्तानचा पराभव केला.
India VS Pakistan Asian Games 2026 Final : आशियाई क्रीडा स्पर्धा 2026 च्या अंतिम सामन्यात भारतीय संघाने पुन्हा एकदा आपला दबदबा सिद्ध करत प्रतिस्पर्धी पाकिस्तानचा 19 धावांनी दणदणीत पराभव केला. जपानमधील कोरोगी स्पोर्ट्स पार्क येथे रंगलेल्या या हाय-व्होल्टेज सामन्यात कर्णधार श्रेयस अय्यरने नाणेफेक जिंकून प्रथम फलंदाजीचा घेतलेला निर्णय फलंदाजांनी पूर्णपणे सार्थ ठरवला. अभिषेक शर्मा आणि तिलक वर्मा यांच्या तुफानी अर्धशतकांच्या जोरावर भारताने बोर्डावर 6 बाद 211 धावांचा डोंगर उभारला. या भल्यामोठ्या आव्हानाचा पाठलाग करताना भारतीय गोलंदाजांच्या भेदक मारासमोर पाकिस्तानचा हसन नवाझ एकटा पडला. त्याने 96 धावांची धडाकेबाज खेळी केली, परंतु तो आपल्या संघाला विजय मिळवून देऊ शकला नाही. कर्णधार श्रेयस अय्यरच्या नेतृत्वाखाली टीम इंडियाने सुवर्णपदकावर आपले नाव कोरले, तर पाकिस्तानला रौप्यपदकावर समाधान मानावे लागले.
𝙂𝙊𝙇𝘿-standard performance ✨🥇
— BCCI (@BCCI) October 3, 2026
Scorecard ▶️ https://t.co/g4wzZagyGj#TeamIndia | #AsianGames | @OfficialAbhi04 pic.twitter.com/RB9vv1ikcb
भारताची पाकिस्तानविरुद्ध धडाकेबाज फलंदाजी
पाकिस्तानविरुद्धच्या सुवर्णपदकाच्या सामन्यात भारतीय सलामीवीर वैभव सूर्यवंशी आणि अभिषेक शर्मा यांनी आक्रमक सुरुवात केली. मात्र, भारताला पहिला धक्का वैभवच्या रूपाने बसला. वैभव 9 चेंडूंमध्ये 15 धावा करून बाद झाला. त्याने दोन षटकार ठोकले. मोठा फटका खेळण्याच्या प्रयत्नात त्याला विकेट गमवावी लागली. वैभव स्वस्तात बाद झाल्यानंतर अभिषेक शर्माने भारताचा डाव सावरत पाकिस्तानच्या गोलंदाजांची धुलाई केली. अभिषेकने अवघ्या 28 चेंडूंमध्ये 61 धावांची तुफानी खेळी केली. त्याच्या खेळीत 7 चौकार आणि 3 षटकार होते. दरम्यान, संजू सॅमसन 4 चेंडूंमध्ये 2 धावा करून बाद झाला. कर्णधार श्रेयस अय्यरने 24 चेंडूंमध्ये 21 धावा केल्या, तर इशान किशनने 18 चेंडूंमध्ये 20 धावांचे योगदान दिले.
तिलक-शिवमने भारताला 200 पार नेले
भारताच्या डावाला मोठी धावसंख्या मिळवून देण्यात तिलक वर्मा आणि शिवम दुबे यांनी अखेरच्या टप्प्यात महत्त्वाची भूमिका बजावली. सातव्या क्रमांकावर फलंदाजीला आलेल्या शिवम दुबेने 15 चेंडूंमध्ये 27 धावा ठोकल्या. त्याने 2 चौकार आणि 2 षटकार मारले. दुसरीकडे, तिलक वर्माने नाबाद 51 धावांची खेळी करत भारताला 200 धावांचा टप्पा ओलांडून दिला. तिलकने अवघ्या 22 चेंडूंमध्ये 3 चौकार आणि 4 षटकारांसह 51 धावा केल्या. अशाप्रकारे भारताने 20 षटकांत 6 गडी गमावून 211 धावा केल्या.
हसन नवाझ एकटा पडला, भारताचा विजय
भारताने दिलेल्या 212 धावांच्या आव्हानाचा पाठलाग करताना पाकिस्तानसाठी साहिबजादा फरहान आणि माझ सदाकत यांनी डावाची सुरुवात केली. कर्णधार फरहान 10 धावांवर, तर सदाकत 23 धावांवर बाद झाला. त्यानंतर उस्मान खान 3 धावांवर बाद झाला. सॅम अयुबने संघासाठी 29 धावा केल्या, तर अब्दुल समद 9 धावांवर बाद झाला. या सामन्यात पाकिस्तान क्रिकेट संघासाठी हसन नवाझने सर्वाधिक धावा केल्या. त्याने 28 चेंडूंमध्ये 5 षटकारांसह 50 धावा पूर्ण करत आपले अर्धशतक पूर्ण केले. त्याने 51 चेंडूंमध्ये 5 चौकार आणि 7 षटकारांसह 96 धावांची धडाकेबाज खेळी केली, परंतु तो आपल्या संघाला विजय मिळवून देऊ शकला नाही. भारतासाठी अक्षर पटेल आणि वॉशिंग्टन सुंदर यांनी प्रत्येकी 2 बळी घेतले. भारताने सुवर्णपदकावर कब्जा केला. तर पाकिस्तानला रौप्यपदकावर समाधान मानावं लागलं.
𝗚𝗢𝗟𝗗 𝗠𝗘𝗗𝗔𝗟𝗟𝗜𝗦𝗧𝗦 𝗔𝗚𝗔𝗜𝗡 🥇
— BCCI (@BCCI) October 3, 2026
Congratulations #TeamIndia for successfully defending the Asian Games Gold Medal 👏👏
Scorecard ▶️ https://t.co/g4wzZagyGj#AsianGames pic.twitter.com/sg7z4dhUzH
हे ही वाचा -
महत्त्वाच्या बातम्या
