India vs Pakistan Asia Cup 2025 : आशिया कप 2025 च्या सुपर-4 फेरीतील दुसरा सामना भारत आणि पाकिस्तान यांच्यात दुबई इंटरनॅशनल स्टेडियमवर रंगत आहे. या स्पर्धेत हे दोन्ही संघ दुसऱ्यांदा भिडणार आहेत. याआधी ग्रुप स्टेजमध्येही भारत-पाकिस्तान आमनेसामने आले होते. मात्र, मागच्या वेळेसारखंच यंदाही नाणेफेकदरम्यान भारतीय कर्णधार सूर्यकुमार यादव याने पाकिस्तानी कर्णधार सलमान अली आगाशी हस्तांदोलन करण्यास नकार दिला.
सुपर-4 सामन्यात सूर्याने पुन्हा पाकिस्तानच्या सलमानकडे पाठ फिरवली
टॉसच्या वेळी सूर्याने संघाची यादी पंचांकडे सुपूर्द केली, समालोचकांशी चर्चा केली आणि थेट ड्रेसिंगरूमकडे रवाना झाला. यावेळी त्याने सलमान अली आगाकडे पाहिले सुद्धा नाही. साधारणपणे टॉसच्या वेळी दोन्ही कर्णधार हस्तांदोलन करतात, ज्याला खेळभावनेचं प्रतीक मानलं जातं. पण भारत-पाकिस्तानमधील तणावपूर्ण संबंधांमुळे सलग दुसऱ्यांदा अशी वेळ आली आहे की या दोन संघांच्या कर्णधारांनी हस्तांदोलन केलं नाही.
सुपर-4 सामन्यात सूर्याने टॉस जिंकला
सुपर-4 मध्ये पाकिस्तानविरुद्धच्या सामन्यात भारताने नाणेफेक जिंकून प्रथम क्षेत्ररक्षण करण्याचा निर्णय घेतला. मोठी बातमी अशी होती की भारतीय संघाने संघात दोन आश्चर्यकारक बदल केले. अर्शदीप सिंग आणि हर्षित राणा दोघांनाही प्लेइंग इलेव्हनमधून वगळण्यात आले. त्यांच्या जागी वरुण चक्रवर्ती आणि जसप्रीत बुमराह परतले आहेत. अर्शदीप आणि हर्षित ओमानविरुद्धच्या सामन्यात खेळले होते पण पाकिस्तानविरुद्ध त्यांना वगळण्यात आले. पाकिस्ताननेही आपल्या प्लेइंग इलेव्हनमध्ये दोन बदल केले. हसन नवाज आणि खुशदीन शाह यांना टीममधून वगळण्यात आले.
टीम इंडियाची प्लेइंग-11 : अभिषेक शर्मा, शुभमन गिल, संजू सॅमसन, सूर्यकुमार यादव, तिलक वर्मा, शिवम दुबे, हार्दिक पांड्या, अक्षर पटेल, जसप्रीत बुमराह, कुलदीप यादव, वरुण चक्रवर्ती.
पाकिस्तान संघाची प्लेइंग-11 : सैम अयुब, साहिबजादा फरहान, फखर जमान, सलमान आगा, हुसैन तलत, मोहम्मद हरीस, मोहम्मद नवाज, फहीम अश्रफ, शाहीन आफ्रिदी, हरिस रौफ, अबरार अहमद.