India vs New Zealand ODI : भारत आणि न्यूझीलंड (IND vs NZ) यांच्यातील एकदिवसीय मालिकेतील तिसरा आणि अखेरचा सामना भारतानं 90 धावांच्या फरकानं जिंकत मालिका खिशात घातली आहे. इंदूरच्या होळकर क्रिकेट स्टेडियमवर भारताने एका अप्रतिम खेळीचं प्रदर्शन घडवलं असून फलंदाजी आणि गोलंदाजी दोन्हीत कमाल केली आहे. आधी भारतीय सलामीवीरांनी दोघांनी शतकं ठोकली. शुभमन गिलनं 112 आणि रोहित शर्मानं 101 धावांची खेळी केली. तर, हार्दिक पांड्यानंही तुफानी फटकेबाजी करत 54 धावांची दमदार खेळी केली. ज्यामुळे भारतानं 50 षटकांत 385 धावा करत न्यूझीलंडला 386 धावांचं लक्ष्य दिलं. जे पार करताना डेव्हॉन कॉन्वेनं 138 धावांची खेळी केली, पण इतर कोणाची साथ न मिळाल्यानं अखेर न्यूझीलंड 90 धावांनी पराभूत झाला.
पहिल्या दोन्ही सामन्यात नाणेफेक जिंकणाऱ्या भारतानं आज नाणेफेक गमावली, न्यूझीलंडनं टॉस जिंकत गोलंदाजी करण्याचा निर्णय घेतला. मागील काही सामन्याप्रमाणे भारतानं आजही तुफान फलंदाजी करत तब्बल 386 धावांची मोठी धावसंख्या उभारली. सर्वात आधी सलामीवीर रोहित शर्मा आणि शुभमन गिल यांनी सुरुवातीपासूनच स्फोटक खेळी सुरु ठेवली. दोघांनी आपआपली शतकं पूर्ण केली, ज्यामुळे भारताची धावसंख्याही 200 पार गेली. रोहित 101 धावा करुन बाद झाला. ज्यानंतर काही वेळात शुभमनही 112 धावा करुन तंबूत परतला. विराटनं 36 धावांची खेळी केली पण तोही तंबूत परतला. त्यानंतर हार्दिक पांड्यानं 54 धावांची स्फोटक खेळी केली, ज्यामुळे भारताची धावसंख्या आणखी मजबूत झाली. 385 धावा भारताने स्कोरबोर्डवर लावल्या असून आता न्यूझीलंडला 386 धावा 50 षटकांत करायच्या होत्या.
न्यूझीलंडचा संघ 386 धावा करण्यासाठी मैदानात आला असताना सुरुवातीला त्यांनी ठिकठाक खेळी केली. पण काही विकेट्स गेल्यावर इतर फलंदाज झटपट बाद झाले अखेर 41.2 षटकांत 295 धावांवर न्यूझीलंडचा संघ सर्वबाद झाला आणि भारताने 90 धावांनी सामना जिंकला. न्यूझीलंडकडून डेव्हॉन कॉन्वेने 138 धावांची एकहाती झुंज दिली. याशिवाय हेन्री निकोल्सने 42 आणि मिचेल सँटनरनं 34 धावांची खेळी केली पण अखेर न्यूझीलंडचा संघ पराभूत झाला. भारतानं श्रीलंकेनंतर न्यूझीलंडलाही व्हाईट वॉश दिला आहे. सामनावीर म्हणून शार्दूल ठाकूर तर मालिकावीर म्हणून शुभमन गिलला पुरस्कृत करण्यात आलं आहे.
हे देखील वाचा-