GT vs RCB Live Score IPL 2026 : गिल-बटलरच्या वादळापुढे 'आरसीबी' ढेर; गुजरातचा 4 विकेट्सने शानदार विजय

GT vs RCB Live Score IPL 2026 Update In Marathi : गुजरात टायटन्स आणि रॉयल चॅलेंजर्स बंगळुरु यांच्यात आज अहमदाबादच्या नरेंद्र मोदी स्टेडियम येथे एक हाय-व्होल्टेज सामना रंगणार आहे.

किरण महानवरLast Updated: 30 Apr 2026 11:03 PM

पार्श्वभूमी

Gujarat Titans vs Royal Challengers Bengaluru Live Update In Marathi : गुजरात टायटन्स आणि रॉयल चॅलेंजर्स बंगळुरु यांच्यात आज अहमदाबादच्या नरेंद्र मोदी स्टेडियम येथे एक हाय-व्होल्टेज सामना रंगणार आहे. हीच ती पिच आहे जिथे रॉयल चॅलेंजर्स बंगळुरुने गेल्या वर्षी पहिलं आयपीएल विजेतेपद पटकावलं होतं. त्यामुळे आजच्या सामन्याला वेगळीच रंगत आहे.धावांचा पाऊस की गोलंदाजांची कमाल?आजची पिच फलंदाजांसाठी अनुकूल असण्याची दाट शक्यता आहे. लाल मातीची पिच असल्यामुळे चेंडू चांगला बॅटवर येईल. उष्णतेमुळे पिचला थोडं जास्त पाणी देण्यात आलं आहे, त्यामुळे सुरुवातीला थोडा स्लो खेळ दिसू शकतो, पण एकदा सेट झाल्यावर फलंदाज मोठे फटके मारू शकतात. पिच आणि फॉर्म पाहता हा सामना हाय-स्कोरिंग होण्याची शक्यता आहे. आरसीबी सध्या जबरदस्त फॉर्ममध्ये आहे, पण GT चं होम अ‍ॅडव्हांटेज आणि गिलचा रेकॉर्ड लक्षात घेतला तर सामना चुरशीचा होणार यात शंका नाही.पॉईंट्स टेबलचा गेम बदलणार!या हंगामाबद्दल बोलायचे झाल्यास, गुजरात टायटन्स गुणतालिकेत पाचव्या स्थानावर आहे. गुजरातने आपल्या आठ सामन्यांपैकी चार जिंकले आहेत आणि तितकेच गमावले आहेत. संघाने आपल्या शेवटच्या तीन सामन्यांपैकी दोन गमावले आहेत, तरीही चेपॉकमधील शेवटच्या सामन्यात जीटीने चेन्नईला पराभूत केले. दरम्यान, रॉयल चॅलेंजर्स बंगळूरने प्रभावी कामगिरी केली आहे. आरसीबी आपल्या आठ सामन्यांपैकी सहा जिंकून गुणतालिकेत दुसऱ्या स्थानावर आहे. आजचा विजय बंगळूरला अव्वल स्थानावर पोहोचवेल.हे ही वाचा -Vaibhav Sooryavanshi : बॅटमध्ये AI चिप... पाकिस्तानी एक्सपर्टची जळफळाट; वैभव सूर्यवंशीने एका वाक्यातच विषय संपवला, नेमकं काय म्हणाला? VIDEO

30/04/2026 23:03:50

GT vs RCB IPL 2026 : गिल-बटलरच्या वादळापुढे 'आरसीबी' ढेर; गुजरातचा 4 विकेट्सने शानदार विजय

आयपीएल 2026 मधील 42वा सामना गुजरात टायटन्सने दमदार शैलीत जिंकत प्लेऑफच्या शर्यतीत आपली दावेदारी अधिक भक्कम केली.

अहमदाबादच्या नरेंद्र मोदी स्टेडियमवर झालेल्या या लढतीत गुजरातने रॉयल चॅलेंजर्स बंगळूरवर 4 विकेट्सने मात केली.

सामन्याची सुरुवात गुजरातचा कर्णधार शुभमन गिलने नाणेफेक जिंकून गोलंदाजी निवडण्याने झाली आणि हा निर्णय अक्षरशः सोन्याचा ठरला.

गुजरातच्या गोलंदाजांनी सुरुवातीपासूनच आरसीबीच्या फलंदाजांवर दबाव टाकत त्यांना मोठी धावसंख्या उभारू दिली नाही.

अखेर आरसीबीचा संपूर्ण संघ 19.2 षटकांत 155 धावांवर गारद झाला.

156 धावांच्या लक्ष्याचा पाठलाग करताना गुजरातकडून कर्णधार शुभमन गिल आणि जोस बटलर यांनी आक्रमक सुरुवात केली.

दोघांनीही जोरदार फटकेबाजी करत सामना पूर्णपणे गुजरातच्या बाजूने झुकवला.

त्यांच्या वादळी खेळीमुळे गुजरातने हा सामना सहज जिंकत 4 विकेट्सने विजय मिळवला.

30/04/2026 21:26:51

GT vs RCB Live Score IPL 2026 : राशिद खान अन् अरशद खानपुढे आरसीबीची दाणादाण; गुजरातसमोर 156 धावांचे लक्ष्य, जाणून घ्या LIVE अपडेट्स

नरेंद्र मोदी स्टेडियमवर आज आयपीएल 2026 चा 42 वा सामना रंगला. घरच्या मैदानावर खेळणाऱ्या गुजरात टायटन्सने नाणेफेक जिंकून प्रथम गोलंदाजी करण्याचा निर्णय घेतला. गुजरातच्या गोलंदाजांनी हा निर्णय योग्य ठरला, कारण रॉयल चॅलेंजर्स बेंगळुरूच्या (RCB) तगड्या फलंदाजीला खिंडार पाडले आणि पूर्ण संघाला 19.2 षटकांत अवघ्या 155 धावांत गुंडाळले.

आरसीबीकडून सलामीला आलेल्या जॅकब बेथेल आणि विराट कोहली यांनी आक्रमक सुरुवात केली होती. विराटने अवघ्या 13 चेंडूंत 28 धावा फटकावत (5 चौकार, 1 षटकार) जुन्या लयीत असल्याचे संकेत दिले. मात्र, 34 धावांच्या स्कोअरवर बेथेल सिराजचा शिकार झाला आणि पाठोपाठ कागिसो रबाडाने विराटला बाद करून आरसीबीला मोठा धक्का दिला. पॉवरप्लेमध्ये आरसीबीने 59 धावा केल्या होत्या, पण नियमित अंतराने विकेट्स पडल्यामुळे त्यांचा धाववेग मंदावला.

पडिक्कलची एकाकी झुंज

एका बाजूला गडी बाद होत असताना देवदत्त पडिक्कलने डाव सावरला. त्याने 24 चेंडूंत 40 धावा केल्या, ज्यात 5 चौकार आणि 2 षटकारांचा समावेश होता. कर्णधार रजत पाटीदारने 15 चेंडूंत 19 धावांचे योगदान दिले, पण अरशद खानने त्याला बाद करून आरसीबीची गती रोखली. जितेश शर्मा (1), टिम डेव्हिड (9) आणि कृणाल पांड्या (4) यांसारखे मोठे फटके मारणारे फलंदाज आज सपशेल अपयशी ठरले.

गुजरातची भेदक गोलंदाजी: राशिद-अरशद खानची जादू

गुजरात टायटन्सच्या विजयात गोलंदाजांचा सिंहाचा वाटा राहिला. अनुभवी फिरकीपटू राशिद खानने आपल्या 4 षटकांत फक्त 19 धावा देत 2 महत्त्वाचे बळी टिपले. त्याच्या फिरकीने आरसीबीच्या फलंदाजांना जखडून ठेवले. युवा गोलंदाज अर्शद खानने 3.2 षटकांत 22 धावांच्या मोबदल्यात 3 गडी बाद करत मधल्या फळीचे कंबरडे मोडले. जेसन होल्डरने देखील उपयुक्त गोलंदाजी करत 2 बळी मिळवले, तर मोहम्मद सिराज आणि कागिसो रबाडाला प्रत्येकी १ बळी मिळाला.

आरसीबीची धावसंख्या एका वेळी 7 बाद 126 अशी होती. अशा परिस्थितीत रोमॅरियो शेफर्ड (17) आणि व्यंकटेश अय्यर (12) यांनी डाव सावरण्याचा प्रयत्न केला. तळाच्या फलंदाजीला भुवनेश्वर कुमारने (नाबाद 15) साथ दिली, पण दुसऱ्या बाजूला जोश हेझलवूड धावबाद झाल्यामुळे आरसीबीचा डाव 155 धावांवर आटोपला.