England beat Nepal T20 World Cup 2026 : टी-20 वर्ल्डकप 2026 मधील पाचव्या सामन्यात मुंबईच्या ऐतिहासिक वानखेडे स्टेडियमवर इंग्लंड आणि नेपाल आमनेसामने होते. या सामन्यात मोठा उलटफेर होण्याची शक्यता निर्माण झाली होती, पण अखेर इंग्लंडने अनुभवाच्या जोरावर सामना आपल्या बाजूने वळवला आणि अवघ्या 4 धावांनी रोमांचक विजय मिळवला. सामन्याच्या एका टप्प्यावर नेपाल सहजपणे इंग्लंडला पराभूत करेल असे चित्र दिसत होते. मात्र, निर्णायक क्षणी इंग्लिश खेळाडूंनी जबरदस्त पुनरागमन करत सामन्यावर पकड मिळवली.
सॅम करण ठरला इंग्लंडचा हिरो
सामन्याच्या शेवटच्या षटकात नेपालला विजयासाठी 10 धावा हव्या होत्या. त्या निर्णायक क्षणी सॅम करणने अचूक यॉर्कर टाकत केवळ 5 धावा दिल्या आणि इंग्लंडच्या विजयावर शिक्कामोर्तब केले. या कामगिरीमुळे सॅम करण सामन्याचा खरा हिरो ठरला.
नेपालच्या झुंजार खेळीला अपयशाची किनार
नेपालकडून दीपेंद्रसिंह ऐरी आणि लोकश बाम यांनी झुंजार फलंदाजी केली, मात्र त्यांची मेहनत अपुरी ठरली. दीपेंद्रसिंहने 29 चेंडूत 6 चौकार आणि 1 षटकारासह 44 धावा केल्या. तर आठव्या क्रमांकावर फलंदाजीला आलेल्या लोकश बामने 20 चेंडूत 4 चौकार आणि 2 षटकारांच्या मदतीने 39 धावांची तडाखेबंद खेळी साकारली.
इंग्लंडची दमदार फलंदाजी
प्रथम फलंदाजी करताना इंग्लंडने 20 षटकांत 184/7 धावा फलकावर लावल्या. जेकब बेथेल याने 35 चेंडूत 4 चौकार आणि 4 षटकारांच्या मदतीने 55 धावांची शानदार खेळी केली. तर कर्णधार हॅरी ब्रूक याने 32 चेंडूत 4 चौकार आणि 3 षटकारांसह 53 धावा करत संघाला मजबूत पाया दिला.
184 धावांच्या लक्ष्याचा पाठलाग करताना नेपालचा संघ 20 षटकांत 180/6 धावांपर्यंतच मजल मारू शकला. विजय अगदी हातात असतानाच संघाला केवळ 4 धावांनी पराभव स्वीकारावा लागला. इंग्लंडकडून गोलंदाजीत लियाम डॉसनने 2 विकेट्स घेतल्या, तर ल्यूक वूड, जोफ्रा आर्चर, विल जॅक्स आणि सॅम कर्रन यांनी प्रत्येकी एक बळी मिळवला.
हे ही वाचा -