Pakistan vs England 1st Test : पाकिस्तान आणि इंग्लंड यांच्यातील तीन सामन्यांच्या कसोटी मालिकेला आजपासून सुरुवात होत आहे. मालिकेतील पहिला सामना लीड्समध्ये खेळवला जाणार आहे. मात्र, या सामन्याला सुरुवात होण्याआधीच इंग्लंडचा माजी वेगवान गोलंदाज स्टुअर्ट ब्रॉड याच्या एका वक्तव्यामुळे क्रिकेटविश्वात चर्चेला उधाण आलं आहे. ब्रॉडने पाकिस्तानच्या सध्याच्या संघावर जोरदार टीका करताना चक्क या संघाला बकवास म्हटलं आहे. एवढंच नाही तर इंग्लंड पाकिस्तानचा 3-0 असा क्लीन स्वीप करेल, अशी भविष्यवाणीही त्याने केली आहे.
स्टुअर्ट ब्रॉडने निवृत्तीनंतर समालोचक आणि स्पोर्ट्स प्रेझेंटर म्हणून आपली नवी इनिंग सुरू केली आहे. एका पॉडकास्टमध्ये पाकिस्तान-इंग्लंड कसोटी मालिकेबाबत चर्चा करताना त्याने पाकिस्तानच्या संघाच्या क्षमतेवरच प्रश्नचिन्ह उपस्थित केलं. विशेष म्हणजे, पाकिस्तानच्या वेगवान गोलंदाजीच्या आक्रमणालाही त्याने कमकुवत असल्याचं म्हटलं आहे.
‘पाकिस्तानचा संघ बकवास आहे...’ - ब्रॉडचं वादग्रस्त वक्तव्य
पॉडकास्टमध्ये बोलताना ब्रॉडने पाकिस्तानच्या संघाबाबत अत्यंत बोचरी प्रतिक्रिया दिली. त्याच्या मते, पाकिस्तानकडे इंग्लंडला आव्हान देण्याइतकी मजबूत टीम नाही. त्यामुळे इंग्लंड ही मालिका सहजपणे 3-0 ने जिंकेल, असा दावा त्याने केला. ब्रॉड म्हणाला, “त्यांच्याकडे मोहम्मद अब्बास आहेत. ते 36 वर्षांच्या वयात संघात परतले आहेत. पण त्यांचा संघ बकवास आहे. त्यांची टीम चांगली नाही. त्यामुळे इंग्लंड ही मालिका 3-0 ने सहज जिंकेल, असा माझा अंदाज आहे.” ब्रॉडच्या या वक्तव्यामुळे पाकिस्तान क्रिकेट संघाची जोरदार चर्चा सुरू झाली आहे. विशेष म्हणजे, त्याने पाकिस्तानच्या अनुभवी वेगवान गोलंदाज मोहम्मद अब्बास यांना संघातील सर्वात कमकुवत दुवा ठरवलं आहे.
36 वर्षांच्या अब्बासची दमदार कमबॅक
स्टुअर्ट ब्रॉडने मोहम्मद अब्बास यांच्या वयावर प्रश्न उपस्थित केला असला, तरी मैदानावरील त्यांची कामगिरी मात्र प्रभावी राहिली आहे. 36 वर्षांच्या वयात पाकिस्तानच्या कसोटी संघात पुनरागमन केल्यानंतर अब्बासने शानदार गोलंदाजी केली आहे. पुनरागमनानंतर केवळ तीन सामन्यांमध्ये त्याने तब्बल 18 विकेट्स घेतल्या आहेत. त्यामुळे ब्रॉडने केलेली टीका मैदानावरील अब्बासच्या अलीकडच्या कामगिरीशी विसंगत असल्याचंही पाहायला मिळत आहे. आता इंग्लंडविरुद्धच्या मालिकेत अब्बास आपल्या गोलंदाजीने या टीकेला उत्तर देतात का, याकडे सर्वांचं लक्ष असेल.
इंग्लंडमध्ये पाकिस्तानचा तीन दशकांचा दुष्काळ
पाकिस्तानसाठी इंग्लंडमधील कसोटी क्रिकेटचा इतिहास फारसा दिलासादायक नाही. पाकिस्तानने इंग्लंडला त्यांच्याच भूमीवर अखेरची कसोटी मालिका 1996 मध्ये पराभूत केली होती. त्यानंतर तब्बल तीन दशके उलटली आहेत, मात्र पाकिस्तानला ब्रिटनमध्ये कसोटी मालिका जिंकता आलेली नाही. याच पार्श्वभूमीवर ब्रॉडचा 3-0 विजयाचा दावा पाकिस्तानसाठी आणखी बोचरा ठरला आहे. दुसरीकडे, इंग्लंडला आपल्या घरच्या मैदानावर पुन्हा एकदा वर्चस्व कायम ठेवण्याची संधी आहे.
बाबर आझम पहिल्या कसोटीतून बाहेर
पाकिस्तानला मालिकेच्या सुरुवातीलाच मोठा धक्का बसला आहे. बाबर आझम एका सराव सामन्यादरम्यान उजव्या हाताला दुखापत करून बसला. या दुखापतीमुळे तो इंग्लंडविरुद्धच्या पहिल्या कसोटीत खेळू शकणार नाही. काही आठवड्यांपूर्वीच शान मसूदच्या जागी बाबर आझमकडे पुन्हा पाकिस्तानच्या कसोटी संघाचं नेतृत्व सोपवण्यात आलं होतं. त्यामुळे त्याचं पहिल्या सामन्यातून बाहेर पडणं हा पाकिस्तानसाठी मोठा धक्का मानला जात आहे. मात्र, पाकिस्तानच्या संघ व्यवस्थापनाला बाबरच्या पुनरागमनाची आशा आहे. संघाचे मुख्य प्रशिक्षक सरफराज खान यांनी बाबर लॉर्ड्सवर होणाऱ्या दुसऱ्या कसोटीत नक्कीच पुनरागमन करेल, असा विश्वास व्यक्त केला आहे.
हे ही वाचा -