Delhi Capitals vs Royal Challengers Bengaluru IPL 2026 : अरुण जेटली स्टेडियमवर खेळल्या जाणाऱ्या आयपीएल 2026 च्या 39 व्या सामन्यात रॉयल चॅलेंजर्स बंगळुरूच्या (RCB) गोलंदाजांनी यजमान दिल्लीचा डाव क्षणात उद्ध्वस्त केला. नाणेफेक जिंकून प्रथम गोलंदाजी करण्याचा रजत पाटीदारचा निर्णय भुवनेश्वर कुमार आणि जोश हेझलवूड या जोडीने सार्थ ठरवला. फक्त 5.3 षटकांच्या खेळात दिल्लीचे 6 फलंदाज अवघ्या 13 धावांवर तंबूत परतले.
भुवनेश्वर आणि हेझलवूडची भेदक गोलंदाजी
सामन्याच्या सुरुवातीपासूनच बंगळुरूच्या वेगवान गोलंदाजांनी चेंडू दोन्ही बाजूंनी स्विंग करत दिल्लीच्या फलंदाजांना खेळणे अशक्य केले. अनुभवी भुवनेश्वर कुमारने आपल्या पहिल्याच षटकात साहिल पारखला बाद करून दिल्लीला पहिला धक्का दिला. त्यानंतर आलेल्या केएल राहुल आणि नितीश राणा यांनाही खेळपट्टीवर स्थिरावण्याची संधी मिळाली नाही.
दुसऱ्या टोकाकडून जोश हेझलवूडने दिल्लीच्या मधल्या फळीला उद्ध्वस्त केले. हेझलवूडने आपल्या स्पेलमध्ये सलग धक्के देत केएल राहुल (1), समीर रिझवी (0) आणि भरवशाच्या नितीश राणाला (1) माघारी धाडले. दिल्लीची अवस्था एका वेळी 3 बाद 2 धावा अशी अत्यंत दयनीय झाली होती.
कर्णधार अक्षर पटेलही शून्यावर बाद
यंदाच्या हंगामात फॉर्मात असलेल्या ट्रिस्टन स्टब्सने 5 धावा करत काहीसा प्रतिकार करण्याचा प्रयत्न केला, मात्र भुवनेश्वर कुमारने त्याला देवदत्त पडिक्कलच्या हाती झेल देण्यास भाग पाडले. सर्वात मोठा धक्का तेव्हा बसला जेव्हा कर्णधार अक्षर पटेल खातेही न उघडता बाद झाला. यष्टीरक्षक जितेश शर्माने यष्टीमागे झेल घेतला.
पॉवरप्लेच्या इतिहासातील सर्वात लाजिरवाणा रेकॉर्ड
पॉवरप्लेच्या शेवटी दिल्लीचा स्कोर फक्त 13 धावा आणि तब्बल 6 विकेट असा होता. आयपीएलच्या इतिहासात पॉवरप्लेमधील हा सर्वात कमी स्कोर ठरला आहे. याआधीचा सर्वात कमी पॉवरप्ले स्कोर 2009 साली राजस्थान रॉयल्सने रॉयल चॅलेंजर्स बंगळुरूविरुद्ध केपटाउनमध्ये 14/2 असा केला होता. आता दिल्ली कॅपिटल्सने तो विक्रम मोडत नवा नकारात्मक इतिहास रचला आहे.
हे ही वाचा -