IND vs AUS World Cup 2023 Final : भारत आणि ऑस्ट्रेलिया (IND vs AUS World Cup) यांच्यामध्ये होणाऱ्या विश्वचषकाच्या रणसंग्रामाला काही वेळात सुरवात होणार आहे. दरम्यान, यापूर्वी काही राजकीय नेत्यांच्या प्रतिक्रिया देखील येतांना पाहायला मिळत आहे. तर, मंत्री छगन भुजबळ (Chhagan Bhujbal) यांनी पत्रकारांच्या प्रश्नांना उत्तर देतांना मिश्किल प्रतिक्रिया दिली आहे. "रोजचे प्रश्न बाजूला ठेवा आणि आज विश्वचषक सामन्याचा आनंद घ्या, भारत आज जिंकणार आहे. त्यामुळे, बाकी सगळं डोक्यातून काढून टाका आणि आमच्याही डोक्यात काही टाकू नका असे म्हणत भुजबळांनी मिश्किल टोला लगावला आहे.
दरम्यान, यावेळी बोलतांना भुजबळ म्हणाले की, 'तुम्ही रोजच्या या सर्व कटकटी सोडा, कारण आज विश्वचषकाचा सामना होत आहे. या सामन्याचा आनंद लुटा, बाकी सर्व काही डोक्यातून काढून टाकले पाहिजे. तसेच आमच्या देखील काही घालू नका, बाकीच्यांना देखील डोक्यातून काढायला सांगा. तसेच, भारत आणि ऑस्ट्रेलिया यांच्यामध्ये होणाऱ्या विश्वचषक सामना एन्‍जॉय करा. भारत जिंकणार अशी अपेक्षा करू यात, आणि मॅचचा आनंद लुटा, असे भुजबळ म्हणाले.
भुजबळांनी राजकीय भाष्य टाळले...
मागील काही दिवसांपासून मराठा आरक्षणावरून छगन भुजबळ आणि मनोज जरांगे यांच्यातील वाद पाहायला मिळत आहे. त्यामुळे दोन्ही नेते एकमेकांवर टीका करण्याची कोणतीही संधी सोडताना दिसत नाहीये. त्यातच, अंबड येथील सभेतून देखील भुजबळ यांनी जरांगे यांच्यावर जोरदार हल्लाबोल केला होता. त्यामुळे, प्रत्येक वेळी या दोन्ही नेत्यांना माध्यमांनी गाठल्यावर आरक्षणाचा प्रश्न हमखास विचारला जातो, आणि त्यांच्याकडून त्यावर उत्तर देखील देण्यात येते. मात्र, आज भुजबळांनी माध्यमांना प्रतिक्रिया देतांना भारत आणि ऑस्ट्रेलिया क्रिकेट सामन्याचा आनंद लुटण्याचा सल्ला दिला. तसेच, आज आमच्या डोक्यात काही घालू नका असे म्हणत मिश्किल टोलाही लगावला.
इतर महत्वाच्या बातम्या:
तर ठरलं! छगन भुजबळांना जालन्यातूनच उत्तर मिळणार, मनोज जरांगेंच्या भव्य सभेचं आयोजन