Team India Squad for Hong Kong Sixes : भुवनेश्वर कुमार टीम इंडियाचा कर्णधार; कृणाल पांड्या-शशांक सिंहसह हाँगकाँग सिक्सेस स्पर्धेसाठी भारताचा धडाकेबाज संघ जाहीर
Team India squad for Hong Kong Sixes 2026 : भुवनेश्वर कुमार गेल्या काही वर्षांपासून भारतीय संघापासून दूर आहे. मात्र, आता त्याच्याबाबत मोठी बातमी समोर आली आहे.

Team India squad for Hong Kong Sixes 2026 : भुवनेश्वर कुमार गेल्या काही वर्षांपासून भारतीय संघापासून दूर आहे. मात्र, आता त्याच्याबाबत मोठी बातमी समोर आली आहे. हाँगकाँग सिक्सेस 2026 स्पर्धेसाठी भारतीय संघाची घोषणा करण्यात आली असून, अनुभवी वेगवान गोलंदाज भुवनेश्वर कुमारकडे संघाच्या कर्णधारपदाची जबाबदारी सोपवण्यात आली आहे. भुवनेश्वरच्या नेतृत्वाखाली भारतीय संघ 30 ऑक्टोबर ते 1 नोव्हेंबरदरम्यान होणाऱ्या या स्पर्धेत सहभागी होणार आहे. सात सदस्यीय संघात कृणाल पांड्या, नितीश राणा आणि शशांक सिंह यांसारख्या अनुभवी खेळाडूंचा समावेश करण्यात आला आहे.
भारताचा पाकिस्तानसोबत एकाच गटात समावेश
हाँगकाँग सिक्सेस 2026 मध्ये एकूण 12 संघ विजेतेपदासाठी मैदानात उतरणार आहेत. भारताचा समावेश गट कमध्ये करण्यात आला असून, या गटात पाकिस्तान आणि संयुक्त अरब अमिरातीचाही समावेश आहे. स्पर्धेतील सर्व सामने टिन क्वाँग रोड रिक्रिएशन ग्राउंडवर खेळवले जाणार आहेत. भारतीय संघाला विजेतेपद मिळवून देण्याची जबाबदारी आता भुवनेश्वर कुमारवर असेल.
STACKED! 🔥 Maximum format. Maximum firepower. Team India is locked, loaded, and ready to take over the Hong Kong Sixes! 🇮🇳💥 #TurnItUpToSix #HongKongSixes https://t.co/aNSKqkDfd1
— Cricket Hong Kong, China (@CricketHK) October 5, 2026
भुवीच्या पुनरागमनाकडे सर्वांचं लक्ष
भुवनेश्वर कुमारसाठी ही स्पर्धा महत्त्वाची ठरणार आहे. त्याने भारतासाठी अखेरचा सामना नोव्हेंबर 2022 मध्ये न्यूझीलंडविरुद्ध खेळला होता. त्यानंतर तो राष्ट्रीय संघाबाहेर आहे. मात्र, आयपीएल 2026 मधील प्रभावी कामगिरीमुळे भुवनेश्वर पुन्हा चर्चेत आला. तो स्पर्धेतील सर्वाधिक बळी घेणाऱ्या गोलंदाजांमध्ये दुसऱ्या क्रमांकावर राहिला. त्यामुळे भारतीय व्हाइट-बॉल संघात त्याच्या पुनरागमनाची मागणीही झाली. आता हाँगकाँग सिक्सेसमध्ये भारतीय संघाचे नेतृत्व करण्याची संधी त्याला मिळाली आहे. भुवनेश्वरसोबत कृणाल पांड्याचाही संघात समावेश आहे. दोघेही आयपीएलमध्ये रॉयल चॅलेंजर्स बंगळुरूकडून खेळतात. त्यांच्यासोबत नितीश राणा, शशांक सिंह, टी. नटराजन, राहुल त्रिपाठी आणि राहुल तेवतिया यांचीही निवड झाली आहे.
भारताला 21 वर्षांनंतर विजेतेपदाची प्रतीक्षा
हाँगकाँग सिक्सेसचे स्वरूप पारंपरिक क्रिकेटपेक्षा वेगळे आहे. प्रत्येक संघात सहा खेळाडू असतात आणि सामन्यात प्रत्येकी सहा षटके टाकली जातात. भारताने आतापर्यंत या स्पर्धेचे एकदाच विजेतेपद पटकावले आहे. 2005 मध्ये भारताने ही ट्रॉफी जिंकली होती. 2024 मध्ये स्पर्धेचे पुनरागमन झाल्यानंतर मात्र भारताला अपेक्षित कामगिरी करता आलेली नाही. मागील दोन हंगामांत भारत गट फेरीतच बाहेर पडला असून, दहा सामन्यांपैकी नऊ सामने गमावले आहेत. यंदा भुवनेश्वर कुमारच्या नेतृत्वाखाली भारताला हा खराब रेकॉर्ड बदलण्याची संधी असेल.
हाँगकाँग सिक्सेस 2026 साठी भारतीय संघ (Team India squad for Hong Kong Sixes 2026) :
भुवनेश्वर कुमार (कर्णधार), कृणाल पांड्या, नितीश राणा, शशांक सिंह, टी. नटराजन, राहुल त्रिपाठी आणि राहुल तेवतिया.
हे ही वाचा -
क्रिकेटमध्ये आतापर्यंत कधीही न पाहिलेलं घडलं; पोलार्डच्या बॅटीला चेंडू न लागताही स्टँडमध्ये, पंचांच्या निर्णयाने सगळे खेळाडू चक्रावले, VIDEO




















